Taa, Saromaw ow ha, awakîretopo komo tan wekatîmyas awya so. Takîhsom me exitaw kumumuru tawake tasî, noro yîîm. Akpîra exitaw reha wooxamu mrerî, ahwora nasî yîson.

2 On wara naxe anarî komo, tupurantan komo nahsîyaxe kicicme cehtoponhîrî komo yepetho me mak, kir̂wan̂he ahsînî ro mak. Ero wa ahsîxapu tko kir̂wan̂he kirihra ro mak nasî. Kir̂wan̂he kehtopo reha nasî kukurunpen̂e me waipîra kehtome so.

3 Kporin komo xa nasî kir̂wan komo nahman̂e me roro waipîra ehtome so rooma yaka. Ero warahra reha nasî kicicme cehsom komo poko, yiixe n̂examro yehtopo nar̂mesî mak. Ero wa nasî Kporin komo.

4 On wara naxe anarî komo, wara mak cemyawno n̂iir̂axe okwe. Noro yipu komo naxe emyawnomra okwe. Cemyapore cemyawno rin̂e komo reha naxe tupurantai so okre.

5 On wara naxe kumumuru komo takîhso cexitaw so, mararî pono yeperîrî n̂enmekyaxe kaamo yimaw, twotme ka enmapîra exitaw. Anarî komo reha, nîwînîkyatu mak okwe mararî pono yeperîrî yenmetopo yimaw. Ero wa exitaw kumumuru komo noro pona tîhyapamyaxe mak okwe.

6 Taa, kir̂wan komo yehtopo wekatîmyasî, kicicitho komo yehtopo marha. On wara naxe kir̂wan komo, noro yipu komo nakronomesî Kporin komo. N̂examro yarokorî wara rma nasî yînmîthîrî yîwya so. Waihkano ritopo poko xa nîmtapowaxe kicicitho komo reha kica.

7 On wara taxe pahxan pen komo poko, kir̂wan pen yehtoponho ponaro kexitaw so tawake taxe. Kicicitho pen yosotî reha nasî kokem wara kica.

8 On wara naxe takîhsom me cexi xatî komo, tpanatanmetopo komo n̂ewehcaxe okre. Wara kyam mak tîmtapotaxmu komo reha n̂etwîrîmexe ro mak okwe.

9 On wara naxe takîhso cemyawno rin̂e komo, epîrkan me mak n̂etar̂axe okre. On wara naxe anarme cexi xatî kom hara, noro yipu komo yehtopo reha n̂esehtînomexpesî men amn̂e.

10 On wara naxe cewkpin̂em komo, kahwokan̂e me naxe kica. Kicicme marha naxe wara mak tîmtapotaxmu komo. Noro yipu komo naxe cepîrkaxmu me mak okwe.

11 On wara nasî kir̂wan komo mtapotarî, tuuna pîtho wara nasî, waipîra kiin̂e wara okre. Waihkano ritopo poko xa nîmtapowaxe kicicitho komo reha kica.

12 On wara taxe etîxatî pîn me kexitaw so, ceseisom me cehtîkexe okwe. Etîxatî me kexitaw so reha kicicme kpoyino komo yehtoponho yekatîmn̂e pîn me taxe.

13 Takîhso nîmtapowaxe yuhnari yîhtînon̂e komo. Tmaxkatapore tko nasî yuhnari yîhtînon̂e pîn komo reha.

14 On wara marha naxe takîhsom komo, mîn hak poko n̂ehcamhoketîkexe. Akpîra cehsom komo yetwîrîmacho reha nasî pahnoke yîmtapotarî komo yanme rma.

15 Tupurantayem komo wacan wara nasî yupurantan komo rma, yukurun komo wara nasî. Yupurantamnî komo yîwîrîmacho me reha nasî yupurantamra ehtopo komo rma.

16 Waipîra cehtopo nahsîyaxe kir̂wan komo cepethîrî komo me. Kicicitho poko cehtîkaxmu me mak tak naxe kicicitho komo cepethîrî komo me hara okwe.

17 Awakîretopo komo ponaro awexitaw so waipîra awehtopo komo yesamarî yaw mîîcexe. Atwermacho komo yanwekn̂e me awexitaw so reha waipîra awehtopo komo yesamarî yai metowyaxe men okwe.

18 On wara naxe tpoyino xatî pîn komo anarimaw, Aaxera wasî, kahra rma tko na natu tpoyino komo ya. Cemaro me mak na nîmtapowatu kica yiixatî wara. Akpîra naxe kicicme tîmtapotaxmu komo tpoyino komo poko.

19 Mer̂pora ro mak kîmtapowataw kicicitho ken̂e thakwa wa nasî kîmtapotarî. Takîhso kexitaw reha wahra n̂he mak tîmtapowaxe.

20 Cepethîke xa nasî takîhsom komo mtapotarî, prata wara rma nasî kir̂wanî ro wara okre. Epethîmra reha nasî kicicitho komo mtapotarî.

21 Mer̂pono pîn komo nahman̂e wara naxe kir̂wan komo tîmtapotarî komo ke rma. Akpîn komo reha waihyaxe takîhretopo yentatorî ke okwe.

22 On wara nasî Kporin komo ya kakronmacho, cemyawnoyem warai me rma kiir̂asî okre. Kahwokacho ken̂ehra ro mak nasî yînmîthîrî okre.

23 Keseman̂iyasî kyam mak wara, kesî akpîn kicicitho poko cexitaw kica. Tpoxwe tko nasî takîhso kehtopo reha yuhnari yîhtînon̂e komo ya.

24 On wara naxe kicicitho komo anarimaw, tahwokacho komo pona n̂eraswaxe. Yaaro xa n̂eraswaxe, ero yipu rma n̂examro n̂epor̂asî okwe. On wara tko naxe kir̂wan komo, yiixe cehtopo komo rma wa nahsîyaxe. Ero yipu rma nîmyasî Kaan yîwya so.

25 Anarimaw kicicme cehsom pen komo naxe ocowo imo chewno wara rma okwe. Ahwokacho komo yîtîtînache hara kicicme cehsom pen komo exihra tak naxe okwe. Emacakara reha naxe kir̂wan komo. Eroromero n̂ecececexe toh pono wara.

26 Tuwun̂urem komo yehtopo wekatîmyas hara. Ahce wa nai kyorî kawawano yemeyataw? Ahce wa nai kewru komo yîsîn chew kexitaw so? Ero wara rma naxe tuwun̂urem komo tantoman̂e komo ya.

27 Twerî kexitaw Kporin komo poko pahkî n̂he tak taxe waipîra okre. Kicicitho komo yenmacho reha nîhkocesî Kporin komo, waipîra ehtopo kom ha.

28 Tawake xa was amn̂e, kexe kir̂wan komo. Yaaro, ero wara rma naxe okre. Tawake xa was amn̂e, kexe marha kicicitho kom hara. Tohnaw makî tko ero wa kexe n̂examro reha. Tawake ehtopo komo n̂ehcamnoyas okwe.

29 Kporin komo yehtopo yaw roro exirî ke so takîhsom komo ero rma nasî n̂examro yecehton̂e me okre. Kicicitho pokono komo reha n̂ehcamnoyaxe okwe.

30 Kir̂wan komo yen̂epen̂e kr̂a exihra ro mak nasî, eken komo poi en̂epen̂e kom ha. Pahkî exihra tko naxe kicicme cehsom komo reha ceken komo po.

31 Kakîhretopo komo me nîmtapowaxe kir̂wan komo. N̂ehkocesî kr̂a kicicitho poko tîmtapotaxmu komo n̂uru reha.

32 Tîmtapotarî yîhtînon̂e me naxe kir̂wan komo, kir̂wan mak men̂ekexe tîmtapotarî. Ero warahra reha naxe kicicitho komo, kanwetopo pokono makî reha nîhtînoyaxe tîmtapotarî komo noro yipu komo okwe. Ero wa naxe okwe.