Taa, awakîretopo komo wekatîmyasî rma. On wara naxe anarî komo twarawantaxmu komo, yaarono pîn nasî yîhyaw so kemyawno yawsîn kuknomacho. Kicicme ro mak nasî kica ero yipu Kporin komo ya. Tawake reha nasî Kaan yaarono poko, kemyawno yawsîn kuknomacho poko.

2 Owî xa takîhsom anarî komo yopono, kan̂e me kexitaw so, cehn̂axmu me tak men taxe amn̂e okwe tooto wero ro. Anarî komo xawyakan me makî reha kesen̂ataw so takîhso taxe okre.

3 Yaaro mak nîmtapowaxe takîhsom komo. Ero wa cexirî ke so kir̂wan mak nîhtînoyaxe ahce na poko cehtopo. Tanme ro mak cexi xe naxe cesemîknosom komo reha kica. Ero wa ehtopo komo rma tko nasî waihkan̂e komo me okwe.

4 Kukurun mera men nasî kupurantan komo Kaanî rwonîmtopo yimaw. Kir̂wan me kehtopo komo xa nasî kukurun me waipîra kehtome.

5 On wara naxe, Kicicitho mîkro, kacho pîn komo, kir̂wan̂he ehtopo komo rma wa nasî esamarî komo yînankan̂e me kir̂wan̂he totohme so. Kicicitho komo reha n̂etwîrîmexe kicicitho me cehtopo komo ke rma okwe.

6 On wara naxe kir̂wan komo, kir̂wan̂he n̂enmayaxe tîwîrîmacho komo chewra ro mak. Kir̂wan̂he ehtopo komo yanme rma ero wa naxe. Cesemetanmetopo komo chew mak n̂enmayaxe cesemîknosom komo reha. Mîn hak poko epohkacho komo rma nasî emetanmekn̂e komo me.

7 Kicicitho komo waihyataw nîtîtmamyasî tak, Tawake xa was amn̂e, kachonho yîwya. N̂ehcamnoyas amn̂e, Oyemyawno pen wahsîyas amn̂e, kachonho komo kicicitho komo mtapotachonho.

8 Kir̂wan komo nukurunpesî Kaan, ahwokacho komo yai ro mak n̂iir̂asî. Ahwora cehtopo tak nahsîyaxe kicicitho kom hara.

9 On wara naxe tohnaw cesenposom komo, tpoyino komo yîwîrîman̂e me naxe tîmtapotarî komo ke rma okwe. Takîhsom komo tko etwîrîmapora rma naxe yîwya so cehcamhokaxi cexirî ke so okre mîn hak poko.

10 Kar̂pe exitaw so kir̂wan komo tawake naxe enmayipu komo. Kicicitho pen komo waipuche marha, Okre, kexe ro mak enmayipunhîrî komo, tawake xa naxe.

11 Yaake exitaw kir̂wan komo ewto po iitono komo nakronomesî Kaan ahnoro. Ero ke, cekaiporesom me tak naxe iitono komo. Yaake exitaw kicicitho komo anarî po hara, ewto po, ero pen tak n̂ehcamnoyas okwe ewtotho pen. Kicicitho komo mtapotarî yanme rma n̂ehcamnoyasî.

12 On wara naxe kakîhretopo yîhtînon̂e pîn komo, tpoyino komo nîwîrîyakexe kica. Nîtîtmamyaxe makî reha yuhnari yîhtînon̂e komo reha.

13 Ekatîmnî ro n̂ekatîmyaxe kica tapota yakpan̂e komo. Ero yipu yekatîmra reha naxe cemaro xatî pîn komo.

14 Akîhreno rin̂e komo exihra exitaw ewto po twaparî komo nar̂marî me naxe iitono komo. Yaake exitaw so tko iitono yakîhren̂e komo ar̂man me tak naxe ewto pono komo.

15 On wara kexe anarî komo puranta tîmn̂enho ya, Awepethîkan̂enhîrî awepemara exitaw ow xa kepemes amn̂e, kexe. Tînîhtînorî pîn yanme rma ero wa kexe kopi. Ero wa tîmtapotaxmu me awexitaw so mesemetanmekyaxe men amn̂e. Esemetanmekîra tko naxe ero wa tîmtapota xatî pîn komo reha.

16 Kir̂wan mîkro wooxam okre, kacho me nasî tawakem wooxam. On wara tko naxe kîrkom hara, kîpînîn yawno pîn kom ha, tupurantan komo yamenmekn̂e me naxe okwe.

17 On wara naxe kîpînîn yawno komo, tîropotarî karihcesî okre kîpînîn yaw so cehtopo komo ke rma. Kîpînîn yawno pîn komo reha n̂etwîrîmexe kîpînîn yawra cehtopo komo ke rma kica.

18 On wara naxe kicictho komo, wara kyam mak cemyawno n̂iir̂axe. Kir̂wan̂he wiirî okre, nîîke rma kica. Anarî komo reha naxe kir̂wan̂he ciino rin̂e me. Naatî ciitopo wara rma nasî kir̂wan̂he ciino ritopo yîwya so. Ero yipu yepetho rma nahsîyaxe amn̂e watohnî me ro mak okre.

19 Kir̂wan̂he roro kexitaw so waipîn me kehtopo yesamarî yaw taxe. Kicicitho poko roro kexitaw so reha kwaihkacho komo pona kaan̂e me rma nasî ero wara kehtopo okwe.

20 Kicicme ro mak naxe kanwekn̂e ro komo Kporin komo ya. Kicicitho mîkro kica, kacho pîn komo poko reha nasî tawake.

21 Anarimaw so n̂etakronomexe kicicme cehsom komo yaake cehtome so. Noro yipu komo panaretopo watohra ro mak nasî Kporin komo. Kir̂wan komo reha nukurunpesî Noro.

22 Ahce wa emekna ceen̂a kuuxi yewnarî poko exitaw, ooru ciixapu ha? Poxumra ro mak ceen̂asî kica. Ero wa xa marha ceen̂asî wooxam yenpotho twerîhra exitaw kica.

23 On wara kexe kir̂wan komo, Oyakronomesî Kporin komo amn̂e, kexe. On wara reha kexe kicicitho kom hara, Kaan mak nîrwonasî opoko amn̂e, kexe.

24 On wara naxe anarî komo, wakreno n̂iir̂axe roro. N̂epamyasî rma tko emyawno komo. Anarî komo reha cemyawno komo nîmcesî mer̂pora, poko cehtopo yopono ro mak. Wahra makî tko n̂ehtîkes okwe noro yipu komo yemyawno hara okwe.

25 Cemyawnoi xa n̂ehtîkexe wakreno rin̂e ro komo. Tuuna ke wokpano rin̂e ro komo marha tak naxe amn̂e anarî komo nwokparî me hara tuuna ke xa marha.

26 On wara kexe tooto komo tmararîyem ya tînatîrî komo yeperîrî yîmcetaw tîyopo ro mak, Awîrîmape tak amn̂e Kporin komo, kexe yîwya. Ero warahra reha kexe ero yipu tîmn̂e komo ya, Awakrepe tak amn̂e Kporin komo, kexe reha noro yipu komo ya.

27 On wara naxe anarî komo, akronomano ritopo ponaro xa naxe. Ero wara exitaw so takronoman̂e komo tak n̂een̂axe hara amn̂e. Emetanmekno rirî ponaro reha naxe anarî komo. Noro yipu komo naxe amn̂e cesemetanmesom me okwe.

28 On wara naxe cemyawno pona enîn̂e komo cecehton̂e komo me, n̂esemetanmekyaxe tak amn̂e okwe. Esemetanmekîra ro makî reha naxe kir̂wan komo. Weewe yarî wara mak naxe noro yipu komo, tahwore tatîhtaxmu wara.

29 Kîhyawno komo yemetanmekn̂e me rma kexitaw ocowo imo tak men nas amn̂e kmacakan̂e me okwe. Panatan me kexitaw takîhso cexi xatî komo yanton me tak tas amn̂e.

30 On wara nasî kir̂wan komo, naatî wara rma naxe ceperkem wara. Waipîn me kiin̂e yepu yeperîrî wara rma nasî noro yipu komo yeperîrî warai okre. Takîhso tasî tooto komo ropotarî yaknaman̂e me kexitaw so Kaan ponaro tak ehtome so.

31 On wara naxe kir̂wan komo, kir̂wan̂he cehtoponhîrî komo yepetho nahsîyaxe tan roowo po rma. Soroso xa tak kicicme cehtoponhîrî komo yepetho nahsîyaxe tan kicicitho kom hara. Ero wa nahsîyaxe.