Taa, awakîretopo komo rma tan wekatîmyas awya so. On wara wîîkes hara, tpoxwe awakîretopo komo yencetaw awya so mîn hak poko awehcamhoka xatî me mat ham okre. Camkî mak naxe poxumra ro mak tîtwermacho yentan̂e komo reha.

2 Kir̂wan komo nakronomesî Kporin komo. On wara reha kesî Noro emetanmekno ritopo ponarono komo ya, Kicicitho amoro kica, kesî noro yipu komo ya.

3 Pahkî keken komo po exihra ro mak wa taxe kicicme kehtopo komo yanme. Kir̂wan̂he kexitaw so reha weewe yepu wara taxe yuhnaka cimiciyem wara. Emacakan me ro mak taxe okre.

4 Kir̂wan̂he exitaw kipici, karokorî wara xa nas okre. Kicicme exitaw reha yipici ahwora ro mak nas iin̂o. Iyochîrî matacho wara mak nasî yipici okwe.

5 Yaarono ponaro mak naxe kir̂wan komo. Yaarono pîn poko makî reha kakîhrexe so kicicitho komo kica.

6 On wara kan̂e me naxe kicicitho komo, Wapantono ciicerî waihkano ritohme. Takîhsom komo reha nîmtapowaxe twaihkaxmu komo kurunpetopo poko.

7 Kicicitho pen komo nar̂mexe waapa komo. Ar̂maxapunhîrî tak n̂ehcamnoyaxe mak okwe. Ar̂man me ro mak naxe kir̂wan komo reha miya roro. Yîhyawno komo marha naxe ar̂man me.

8 Kir̂wan mîkro okre, kacho me naxe takîhsom komo. Kanwekn̂e ro komo reha naxe tîwîrîyakaxmu me kica.

9 On wara naxe anarî komo, takîhso ekaiporen me mak naxe. Anton komo rma tko naxe okre. Tawake rma naxe ero wara rma. Anarî komo reha naxe, Kir̂wan ow ham okre, kan̂e me. Yînapumra tko naxe okwe. Tawake exihra rma naxe noro yipu komo okwe.

10 Kir̂wan komo naxe toh komo ponaro rma kir̂wan̂he ciitome. Kicicitho komo reha naxe kîpînîn yawno wara rma cma ha tî re anarimaw. Kemetanmekn̂e me tko naxe okwe kîpînîn yawno pîn me rma okwe.

11 Amararîn komo pomon̂e ro me awexitaw so turke tak maxe amn̂e okre. Wara kyam mak cesehtînosom me mak maxe aweseman̂itopo komo poko mak awexitaw so.

12 N̂epohkexe mak kicicitho komo kicicme cehsom komo yotowatho poko. Weewe yepu wara tko naxe kir̂wan komo reha cimiciyem wara. Cepetaxmu wara xa naxe okre.

13 On wara naxe kicicitho komo, kicicitho me nîmtapowaxe kica. Yîmtapotarî rma tko nasî noro yipu komo yemcinotopo me. Kir̂wan komo reha n̂etowyaxe cesemetanmetoponhîrî komo yai.

14 Takîhso kîmtapowataw so kîmtapotarî rma tak nas amn̂e kerepotanmecho ke cepetaxmu me. Kamorî ke kn̂irithîrî komo yepetho marha tahsîyaxe.

15 On wara naxe akpîn komo, tanmero so mak nîhtînoyaxe ahce wa na cehtopo komo. Takîhsom komo reha n̂esencexe takîhren̂e komo yakro.

16 Yohno tîrwon n̂ekatîmyaxe akpîn komo. Tîtken̂e mak naxe takîhsom komo reha tapota yencetaw anarme tooto komo yehtoponho.

17 On wara naxe yaaro mak tîmtapotaxmu komo, yaaro mak tpoyino komo yehtoponho n̂ekatîmyaxe. Cemaronwaxe makî reha tohnawno yekatîmn̂e komo kica.

18 On wara naxe anarî komo, kacipara imo ke kparaxkan̂e wara nîmtapowaxe oko. Kropotarî yehceman̂e wara tko nîmtapowaxe takîhsom komo reha.

19 Yaarono yekatîmn̂e me kexitaw so miya roro nasî kîmtapotachonhîrî komo ehcamnopîn me. Tohnawno yekatîmn̂e me kexitaw so reha yohno rma n̂ehcamnoyasî kîmtapotachonhîrî komo.

20 On wara naxe emetanmekno ritopo poko cesentaxmu komo, cemaro ponaro mak naxe kica. Tahwore tko naxe tawake kehtopo poko cesentaxmu komo reha.

21 Miya xe xa esemetanmekîra ro mak naxe kir̂wan komo. Kicicitho komo reha n̂etwîrîmexe ro mak okwe.

22 Kicicme ro mak kîmtapotarî komo n̂encesî Kporin komo kîcemaronwataw so. Tawake tko nasî esemîknopîn me cehsom komo poko.

23 On wara naxe takîhsom komo, tînîhtînorî komo yekatîmra n̂he naxe. Ero warahra reha naxe akpîra cehsom komo. Noro yipu komo reha n̂enpetîkexe akpîra cehtopo tîmtapotacho komo ke rma kica.

24 On wara naxe cemyaporem komo, antomano rin̂e me tak naxe amn̂e. Antonano me makî reha n̂ehtîkexe okwe tuwun̂urem komo, epeman me tantomaxmu me ha.

25 On wara natu anarî komo, cesemetanmetopo komo ponaro mak nat okwe. Ero ke nahwokexe mak okwe. Ero wa kexitaw so tpoxwe xa cencexe kahworen̂e mtapotarî hara.

26 Kir̂wan̂he kexitaw so takîhso mak tîtmen̂ekexe kakrono ro komo. Kicicitho komo yakrono ro me kexitaw so n̂examro yehtopo poko tîtpohnaxe kica.

27 Anarimaw totowarî komo kan̂porera rma na natu tuwun̂urem komo. Cemyapore kehtopo komo tko nasî kemyawno wara rma, cepethîkem wara xa okre.

28 Kir̂wan̂he kehtopo nasî esama wara. Ero yaw roro kîwcetaw so kar̂pe n̂he taxe okre. Kwaihtopo komo keporîra nasî ero yaw. Ero wa taxe.