1-2 Ero yinhîrî tak Kporin komo mtapotarî tî n̂eyukyakn̂e Xoo. On wara tî kekn̂e yîwya, Miyan komo ciin̂e me rma kîhtînoyasî. Ahce na ciri xe awexitaw ero rma miir̂asî ehn̂an me ro mak.

3 On wara mîîka owya, Onoke xa moso takîhso kehtopo yawarparen̂e? Camkî ro mak mîmtapowasî kopi, mîîka. Yaaro rma mîîkesî. Camkî oyehtopo poko rma kîmtapota kica, oyesehtînotopo yopono ro poko kîmtapota. Ero yipu poko kîmtapota okwe.

4 On wara marha mîîka owya, Kîmtapowasî ka awakro. Omtapotarî ka entakî. Ero yinhîrî amtapotarî wences hara. Omtapotarî men eyuhko, mîîka owya.

5 Pahxa awehtopo wencekn̂e Apa. Oroto tak keen̂asî oyewru ke xa tak.

6 Ero ke kicicme ro mak tak kesen̂asî owî rma. Omtapotachonho tak poxunkesî ro mak. Roowo pona mak oyerema xe wasî, wemronho cheka marha, kekn̂e tî. Ero wa tî kekn̂e Xoo Kporin komo ya.

7 Ero yinhîrî tak, Xoo yakro tîmtapotache, Eripas yakro takî tî nîmtapowakn̂e hara Kporin komo, Teman pono yakro. On wara tî kekn̂e yîwya, Ai, apoko kîrwonasî, awakrono poko marha, asakno rorono poko rma. Takîhso yîmtapotara mehce okwe opoko. Wara n̂he moso nîmtapota opoko Xoo, oyanton ha.

8 Ero ke bui tak ahsîcoko 7, kahn̂eru marha ahsîcoko 7. Oyanton yaka arko, Xoo yaka. Owya tîmsom me akn̂icoko, akn̂itîkacoko. Akpîra amtapotachonhîrî komo yahrutopo me akn̂icoko. Oyanton Xoo marha nîmtapowasî oyakro apoko so. Noro mtapotarî wencesî. Noro yanme tak apanarera wasî akpîra amtapotachonhîrî poko. Oyanton Xoo xa nîmtapota wara n̂he opoko, kekn̂e tî. Ero wa tî kekn̂e Kporin komo Eripas ya.

9 Ero ke Kporin komo mtapotachonho yaw roro rma takî tî n̂iir̂atken̂e. Eripas, Teman pono, Biwtace, Sui pono, Soopa, Naamata pono, ero wara xatken̂e n̂examro. Ero yinhîrî Xoo marha nîmtapowakn̂e Kporin komo yakro n̂examro poko. Yîmtapotarî tî n̂encekn̂e Kporin komo kir̂wan̂he tak.

10 Ero yinhîrî on wara takî tî Xoo wakrekn̂e Kporin komo, takrono komo poko yîmtapotache, iyoku xa hara nîmyakn̂e, emyawno marha. Xakn̂e ka yîhyaw ero yopo ro mak tak nîmyakn̂e yîwya. Cewn̂anînhîrî pen retawno tak nîmyakn̂e iyok hara asak so tak okre.

11 Noro yenso marha tî mokyatken̂e akno komo, epeka komo. Pahxa yînîhtînorî komo ahnoro mokyatken̂e enso. Noro yakro takî tî n̂eseresmetken̂e yîmîn yaw. Noro nahworetken̂e, n̂ewyakîretken̂e marha Kporin komo n̂emetanmekîtho me exirî ke. Yîwya nîmyatken̂e exepeyu prata, cewn̂e so nîmyatken̂e yîwya etpoyino pîn. Emeknumci marha nîmyatken̂e yîwya ooru, cewn̂e so marha.

12 Miya xe xa tak Xoo wakrekn̂e Kporin komo pahxa noro wakretoponho yopo ro mak. 14.000 tak xakn̂e iyoku oper̂a, 6.000 tak xakn̂e iyoku kameru, 1.000 tak xakn̂e iyoku bui, asak hakno re yukuknomaxapu, 1.000 marha xakn̂e iyoku buhu. Ero wicakî tak xakn̂e Xoo yoku.

13 7 xa hara xatken̂e yumumuru komo, 3 xa hara xatken̂e emsîrî komo.

14 On wara cemsîrî komo nosohcekn̂e, poturme ewruxapu nosohcekn̂e Xemima, ponan hara nosohcekn̂e Kesia, ponan xa hara nosohcekn̂e Keren Apuke. Ero wara cemsîrî komo nosohcekn̂e Xoo.

15 Cenporem komo xa mîkyam xatken̂e Xoo yemsîrî komo. Anarî komo yopo ro mak xatken̂e wooxam komo yopo, poyino pono komo yopo. Ero yinhîrî cemyawnonhîrî yekamyataw tumumuru komo ya, cemsîrî komo ya marha n̂ekamyakn̂e cemyawnonhîrî.

16 Ero yinhîrî 140 cimn̂ipu rma tî xakn̂e Xoo waipîra. Tîmxîkrî komo tî n̂een̂akn̂e, tparî komo marha, tparî komo xîkrî marha, tparî komo parî marha. Ero wicakî tî n̂een̂akn̂e cepamrî komo.

17 Ero yinhîrî takî tî waihyakn̂e Xoo. Poritomotho me takî tî xakn̂e twaihyataw. Mer̂pora cimn̂ipu xakn̂e noro yewrutoponho. Ero wa tî xakn̂e Xoo.