Nîmtapowakn̂e rma ka Kporin komo. On wara tî kekn̂e hara Xoo ya, Taa, okopuci, repiatan xara enko. Noro ma re manîmya kiiwi ke? Noro n̂uru mimiya ruupu ke awya?

2 Noro yewnarî yaro ma re mumunukya yimici? Noro yohyarî ma re matpe kiiwi ke?

3 Owî cma re mahsîpînkesî, kee ma re noro awya? Tawake ma re nîmtapowa awakro?

4 Kewehcasî tak, nîîke ma re awya? Eroromero ow ahsîko awanton me, nîîke ma re awya?

5 Noro ma re mahsîya awok me tarin̂em nasî awok me ero wara? Noro yawyoci ma re mimiya yîpîmtari awemsîrî komo narîrî me?

6 Noro ma re nahsîyatu twarawantaxmu komo epethîrî pona? Noro pun n̂ekamyatu twarawantaxmu komo ya?

7 Tarîrka ke ma re yîhcîpîrî matpe yakeno ke? Ootî paraxkacho ke yîhtîpîrî matpe awya?

8 Noro yakro awetar̂mache awetar̂macho komo yîhcamnopîra ro mak masî. Ero yinhîrî noro yakro etar̂mara ro mak tak esko.

9 Noro yahsîtopo poko na nîmtapowatu anarî komo. Tohnaw ro mak ero wa ket okwe. Noro yenîche rma nahwokexe ro mak okwe.

10 Naxe rma ha re tooto komo, erasîn kom ha. Noro kurunkan̂e tko exihra ro mak nasî. Ero ke onoke thakwa re okurunke hara awya?

11 Onoke xa wepethîkekn̂e awya? Epethîkano ciin̂e pînî ro mak ow. Ahnoro kah yakwerî makatawno komo naxe owyan me. Ero wa naxe.

12 Taa, repiatan poko kîmtapowasî xa hara. Aporî poko tak kîmtapowasî, yîhrepu poko marha. Karitî xa mîk, cenporem marha.

13 Onoke ma re yîmkapîpîthîrî nowya? Onoke ma re yîhtîpîrî mici naar̂a yîhyaka yimitome?

14 Onoke thakwa re yîmtarî nahrunke metata wara? Yîmtarî wemcaw nasî iyorî eraspeto kopi.

15 Yaake yatî nasî yîmkapîpîthîrî, sowtatu yecen̂an wara. Ero poko tahwotaxmu me nasî. Etpoko cetasîsîknoso nasî yîmkapîpîthîrî etowîn me ro mak.

16 Etpoko xa nasî cetasîsîknoso. Ocowo torî yarohra ro mak nasî iyotari so.

17 Ceipu xa nasî etasîsîknotopo. Etpoko xa nasî akpan me ro mak ha.

18 Noro yacinataw sakasaka kesî kopi. Enmayataw nîhrewasî katpan ero wara nasî noro yewru hara.

19 Wehto roron n̂epatake yîmtai. Saka kan̂e nahronasî yîmtai kopi.

20 Ewnarî yai n̂epatakesî yîsîn. Wooto mîyetu anarimaw tahrem yaw. Tuuwa ke na wehto mîkamecetu turpem ke. Ero warai xa nîsînasî. Ero wara yîsîn n̂epatakesî repiatan yewnarî yai.

21 Weewe pore puu ketaw wehto roron me tak n̂etahsîyas oco. Wehto n̂epatakesî yîmtai tun̂kem ha.

22 Kar̂pe xa nasî yîpîmîrî. Ahna na cetaw nahwokexe ro mak iitono komo.

23 Cetasîsîknoso marha nasî yupun raconho mko. Cekuswe xa nasî yupun raconho mko towhnî me ro mak.

24 Ceipu xa nasî noro coro toopu mak oko. Ceipu nasî puruma yakihtopo toopu, makatawno, ero wara xa marha nasî noro coro.

25 Noro yawomyataw piiri, n̂eraswaxe karitî komo rma kopi. Noro yehmametaw mooxe n̂he n̂ecececexe.

26 Noro paraxka xe awexitaw so kacipara imo ke cei tara kesî mak paraxkara rma. Ero wa xa marha kesî raapu, waiwî, raapuci, ero yipu. Yupun yaka ewomra ro mak nasî.

27 Cukmape nasî pehu yîwya, puruma yeputho wara mak nasî yîwya. Bronse marha nasî weewe wara yîwya, atîhxapu wara mak.

28 Emahcira nasî waiwî ke wetaw. Toopu yar̂mache noro wece raixi pîpîtho wara mak nasî yîwya.

29 Puruma yeputho wara mak n̂een̂asî watma. Rerekrere ketaw noro wece rah ke, tar̂maxmu ke, n̂ewresî mak noro.

30 Noro momri pîpîtho nasî wakanan̂itho wara tpotke so oko. Noro cetaw apacakrî wakîkresî wenathîrî yaw.

31 Yukwaw cetaw weyunthîrî yaw n̂emakpoponkesî ro mak tahrem yawno wara, cenukresom wara. Tuuna imo pen nukumcesî katî wara, een yawno wara.

32 Yukwari cetaw wenathîrî nasî tpepeyure. Tîhpoxem wara nasî weyun noro yesamatho yawno, tumutwem ke tîhpoxem wara nasî kopi.

33 Anarî exihra ro mak nasî noro warai roowo pono. Erasînî ro mak mîkî.

34 Anarî komo yopono me cehsom komo n̂een̂asî ahnoro. Noro yipu komo kayaritomon me nasî. Ero wa nasî repiatan onakîtotho, kekn̂e tî. Ero wa tî kekn̂e Kporin komo Xoo ya.