1-2 Taa, nîmtapowakn̂e rma tî ka Kporin komo Xoo yakro. On wara tî kekn̂e hara yîwya, Karitî ro yakro ceseseyusom wara masî. Owî ma re mîpanatanmekya? Akpîra mai okwe, kan̂e wara masî Kaan ya kopi. Oroto tak omtapotarî eyuhko hara, kekn̂e tî yîwya.

3-4 On wara tko tî n̂eyukyakn̂e Xoo, Kicicitho ro mak ow ha. Ahce wa thakwa re keyukya? Kemtayahruyasî ro mak tak ha.

5 Cewn̂e ro makî ka kîmtapota. Oroto tak aweyutopo yîhtînopîra ro mak wasî. Asakî ro xa kîmtapota. Yîmtapotara ro mak tak wasî, kekn̂e tî Xoo Kaan ya.

6-7 Ero ke tî nîmtapowakn̂e xa hara Kporin komo Xoo yakro. Cetapomrisom chew rma nîmtapowakn̂e, ocowo chew. On wara tî kekn̂e yîwya, Ececetoko ka kar̂pe. Etîtîkaxapu me xa esko. Amtapotarî yenta xe wasî. Ero ke Ow men eyuhko.

8 Tohnaw panareno rin̂e Mîk Kaan okwe, mîîke katî opoko? Owî katî mîwîrîyake kir̂wan̂he awehtopo yenpotome ha?

9 Kaan yaporî warai ma re mîn awaporî? Tarai wara ma re mîmtapowa Kaan wara ha?

10 Ero wa awexitaw kir̂wanî ro me tak esenpoko. Cenporem xa tak amruko aponon. Takîhsom me xa tak esenpoko kayaritomo wara.

11 Mîk hak poko tak arwonîmko. Amayanîmko tak poko so. Anarî komo yopono me cesehtînosom komo enko, noro pîntho me so tak enpoko.

12 Ahnoro enko anarî komo yopono me cesehtînsom komo, cehn̂axmu me so tak enpoko. Kicicitho komo tak ar̂makî ro mak ekenhîrî komo pona rma.

13 Noro yipu komo yokoputho ahruko roowo cheka iina re. Ewru komo marha tak ahruko ewtarî yaw rma.

14 Ero wa esko amoro. Ero wara ciino riyataw awya on wara wîîkes apoko, Taa, awamorî ke rma kaari n̂ixan ke metkurunpe ham, wîîkes apoko. Ero wa wîîkes apoko.

15 Taa, beemoce enko hara. Awakro ro rma onakîtotho mîk ha. Cuupu yahn̂e mîk bui wara.

16 Karitî ro mak mîn noro petî. Karitî marha mîn noro momri.

17 Noro matkîrî pikipiki kesî setru yepu n̂esewsîyasî ero wara. Iito re nasî petî yatî, ekaritotopo.

18 Tpotokoyem mîn noro yocho. Bronse ciixapu wara nasî. Pehu warai mak mîn noro repu, aporî marha.

19 Kaan nakîhtotho komo yopono xa mîk, anarî komo yopono. Akîhton̂enhîrî makî tko nasî waihkan̂e me kacipara imo ke.

20 Îîpî mko nasî noro nahrî yeken me. Iito marha n̂eseman̂iyasî anarî komo, okno pîn komo.

21 Weewe yepu yapomyaka n̂etîrapesî, taakem yapomyaka. Tuuwa cheka n̂eseyamyasî krarasî cheka.

22 Noro nawarparesî weewe yepu. Sawkeru yepu chew marha nasî, aporî yecihtawno chew.

23 Tuuna yepu yukmetîketaw erasîra rma nasî. Ero poko eserepokan me nasî. Xotaw kwaka enorira rma nasî yukmache xa, tîmtarî yecenarî yukmache rma.

24 Noro ma re mahsîya noro wero ro rma? Ewnarî yaro yimici miir̂a aatome tak? Pîra ro mak, kekn̂e tî. Ero wa tî kekn̂e Kporin komo Xoo ya.