Taa, nîmtapowakn̂e rma tî Kporin komo Xoo yakro. On wara tî kekn̂e hara yîwya, Ai Xoo, on wara marha wîîkes awya, ahcemaw xa kabra komo n̂ewruya okno pîn, îh pono ro? Kooso yewrutopo ma re mukuknome hara?

2 Nuun̂i ma re mukuknome tarke noro yipu komo yehtoponho ewrutome takî? Ero po xa men n̂ewruyasî, mîîke ha ma re amoro?

3 On wara n̂ewruyasî noro yipu komo, n̂etatmunukyasî mak. Ero wara tak n̂ewruyasî. Ewruche erewra tak nasî.

4 Por̂mamyasî tak yîmxîkrî. Kar̂pe n̂ehtîkesî meye pohnîntaw. Ero yinhîrî tîson yai cesî mokuhnî me hara.

5 Onoke xa buhu n̂en̂epekn̂e okno pîn tanme ro mak totohme? Onoke xa yimicithîrî nîmhokekn̂e totohme?

6 Axawa imo wîmyakn̂e yîwya noro yeken me. Woskara marha wîmyakn̂e yîwya eken me yîmîtî ken̂arî ha.

7 Wara hakî kacho na n̂ence noro anarimaw ewto imo pono komo mtapotarî. Ero yipu yentache n̂ewresî mak. Taan̂e mtapotarî yewetîra ro mak nasî, Kaika ha, kacho.

8 Îh pore n̂etar̂asî cuupu yeposo tînahrî. Ahce na n̂epor̂asî ahnoro tatîhtaxmu. Ero wa nasî buhu, okno pîn ha.

9 Ahce wa nai paaka hara awya, okno pîn? Noro yipu ma re amtapotarî n̂ewehca? Yînahrî yen yakîhcetaw awya ero mîtwo ma re kokmamya awya?

10 Noro yimiche roowo ma re poome pataw roro awanme? Mararî komo ma re poome amkai?

11 Noro pona ma re meen̂a kar̂pe ro mak exirî ke? Noro ma re mapicke tawsîn̂em yaatopo poko?

12 Noro pona ma re meen̂a anatîrî puruma yeperîrî yenmetopo? Anatîrî yeperîrî yapikmotopo pona ma re n̂enmekya?

13 Ahce wa nai apeseturusu hara? Powpow kesî noro tahwore cexirî ke. Wara makî tko nasî noro yaporî r̂awr̂a yaporî warahra ro mak.

14 Roowo pona mak n̂etuhmeke noro. Roowo rma nasî yuhme yocoronpen̂e me.

15 Tooto men napikya ahkachome okwe, kahra nasî. Onoke na men nahke okwe, kahra marha nasî.

16 Tîmxîkrî n̂etapes oko. Tîmxîkrî pîn wara ro mak n̂iir̂asî kopi. Tîmxîkîthîrî waihyataw, Okwe, tohnaw kewrui okwe, kahra rma nasî.

17 Takîhso cehsom me noro yakîhtora ro mak xakn̂e Kaan. Camkîno me thakwa mak noro nakîhcekn̂e.

18 Anarimaw so tko nahronasî noro cemahciyataw. Ero yimaw xa yo kawaru mkaw tîtosom poko n̂ewresî iyoponkarî ke. Ero wa nasî apeseturusu.

19 Onoke xa kawaru nakîhcekn̂e karitî me? Noro pîmîrî pokono ma re makîhcekn̂e katîhpoci kawno? Yîpîmîrî ponon wara nas okre.

20 Amoro ma re makîhce noro tahron̂em me makaka wara. Yahya kacho wara rma nasî emtarakacho yînar̂marî komo yeraspetopo.

21 Roowo pore n̂ehtarixkesî tmayanataw. Kar̂pe cehtopo poko nahwowasî. Ero wa tahwotaw cetar̂maxmu komo cheka tak cesî kar̂pe ro mak kopi.

22 Ceraspen̂e poko n̂ewresî. Onoke na pona erasîra ro mak nasî. Kacipara yai emahcira marha nasî.

23 Xakaxaka kesî emepu noro yawxawno. Raapu cecehkem marha naar̂asî tpepeyurem, raapuci marha.

24 N̂eserepokesî ro mak etar̂mano riyataw tooto komo ya, nîrwonasî marha. Ero ke kar̂pe ro mak cesî iina. Tuu kacho yentache iito rma cececeto xera ro mak nasî.

25 Tuu kache n̂emtarakesî tak. Ai ha, kan̂e wara nasî. Etar̂matopo kotorî n̂esunukya mooxe rma. Sowtatu yantoman̂e komo mtapotarî marha n̂encesî, sowtatu yantoman̂e komo yemtarakacho marha n̂encesî etar̂metaw so. Ero wa nasî kawaru.

26 Ahce wa nai wekoko hara? Amoro ma re wekoko komo makîhre kaikokoro totohme. Amoro ma re noro makîhre taporî yehyatkacho poko suu yaw roro totohme.

27 Amtapotarî yanme ma re narina yaimo kaikokoro xa? Amtapotarî yanme ma re takowerî n̂iir̂a kawno pona?

28 Toh pona n̂iir̂asî porin pona. Iito nasî kosope. Toopu nasî noro yukurunpetopo, kawno ha.

29 En̂exa cesî tootî wece. Mooxeno rma n̂een̂asî totowarî.

30 Kamxuku yeen̂e mîk yîmxîkrî. Waihkaxapu yokoputho exitaw iito marha nasî noro hara. Ero wa nasî yaimo, kekn̂e tî Kaan Xoo ya.