1-2 Ero yinhîrî takî tî Kporin komo nîmtapowakn̂e hara Xoo yakro. Ocowo chew rma nîmtapowakn̂e cetapomrisom chew. On wara tî kekn̂e yîwya, Ai, onoke xa moso camkî tîmtapotaxmu? Owya awakîretopo komo yawarparen̂e me mîmtapowas okwe.

3 Ececetoko tak ha etîtîkaxapu me xa. Amtapotarî wencesî. Ow men eyuhko.

4 Ahto mîxakn̂e roowo yapon ciir̂ataw owya. Ekatîmko ika owya yuhnari yîhtînon̂e me awexitaw.

5 Onoke xa roowo nukuknomekn̂e, Ero wicakî xa nai, kekn̂e? Mîhtînoya rma tko na. Onoke xa ero nukuknomekn̂e xapopo warai ke?

6 Ahce yaka xa roowo yapon n̂ecehcekn̂e? Onoke ero yapon pona xa hara n̂iir̂akn̂e toopu, aapo yeknutawno?

7 Ero ciir̂ataw kwakwarî komo n̂ewanometken̂e. N̂emtaraketken̂e Kaan xîkrî komo marha tahwore xa.

8 Onoke tuuna imo nahruyakn̂e metata warai ke? Ero wa nahruyakn̂e kar̂pe epataketaw, rikomo n̂ewruyasî tîson ropotaino wara.

9 Ero yimaw marha tuuna yewru wamrupekn̂e roowo ya ero ponon wara. Roowo womcekn̂e ow awarpan ke kîtîtîno ke.

10 Ero yimaw tuuna imo porohkatopo wiir̂akn̂e. Ero metatan warai wiir̂akn̂e, wecepucekn̂e marha etahrunkan me.

11 On wara wîîkekn̂e tuuna imo ya, Oona mak mîmokyasî, on watohra ro mak masî. Oona tak awewcokocokon nîtîtmamyasî. Cehcoyoponkaxmu wara nai awewcokocokon. Nîtîtmamyasî rma tko tan ha, wîîkekn̂e. Onoke xa ero wa n̂iir̂akn̂e?

12 Enmarî ma re mantomekn̂e mehxa ro? Oroto tak enmak ha, mîîkekn̂e ha ma re amoro? Saa kacho ma re miir̂akn̂e iina xa cenmaxmu me?

13 Roowo yahsîn̂e wara nasî enmarî, mapirî poko ahsîn̂e wara. Roowo yenîhman̂e wara nasî kicicitho komo yen̂epen̂e me roowo poi.

14 Yamoro tak roowo pono mko n̂esenpetîkesî enmayataw. Er̂mo tîtmewresî teme kacho ke ero wa roowo pono mko n̂esenpetîkesî mewrexapu wara. Poono wara rma n̂esenpesî roowo pono mko.

15 Kicicitho komo katparen̂e pîn me rma nasî. Noro yipu komo yapockanwataw n̂etapoxwexe kr̂a tak.

16 Tuuna pîtho yenso ma re mîîcekn̂e tuuna imo kwawno? Tarenakem yari ma re mîîcekn̂e, weyun yawno yari ha?

17 Awaitopo komo metatan ma re meen̂akn̂e amoro? Awaitopo komo yawarpan metatan ma re meen̂akn̂e?

18 Takwekem xa mîn roowo. Ero yakwerî ma re mentîkai camkîra? Ekatîmko ika owya camkîra awexitaw.

19 Ahto nai katpan yeken yesamarî awya? Ahto nai awarpan yeken hara awya?

20 Ero yipu komo ma re maar̂a ekenî ro pona? Eken yakan ma re meen̂a esama kom ha?

21 Ero yipu ma re meen̂a amoro ewruxapu me rma awexirî ke pahxa ero ciir̂ataw? Mer̂pora ma re nai cimn̂ipu awewrutoponhîrî ero yipu yenîn̂enho me awehtome?.

22 N̂eepe yîmtotopo yaka ma re mewomye, mer̂pono pîn yîmtotopo ha? Saraipa yîmtotopo ma re meen̂a mer̂pono pîn yîmtotopo marha?

23 Ero mko wîmcesî ero poko tak oyehtome amn̂e yîwîrîmano ritopo yimaw. Etar̂mano ritopo yimaw xa tak ero yipu wen̂emhatakesî.

24 Ahto xa nai katpan yakpacho yesamarî? Ahto xa nai ocowo yakpacho roowo ratari, resce n̂ixan yakpacho ha?

25 Onoke xa tuuna mohtopo nahcekn̂e tarenakem yukmacho mohtopo ha? Onoke xa tarai yesamarî nînankekn̂e?

26 Pohnî ro pona mokyasî tuuna anarimaw, axawa imo pona, pohnîtho pona ro mak ha. Onoke xa Mîk ero wara n̂iir̂a?

27 Ero tak nîhyasî iiponomnîtho. Ero yipu nîhyasî cuupu yatîkrechome tak cukmano. Onoke xa ero wara n̂iir̂a awya?

28 Tîmke nai tuuna tmohsom awya? Onoke xa cicakî yîîm me nai?

29 Onoke ropotai n̂ewruya xeru. Onoke ropotai n̂ewruya xeru kah yai tmohsom?

30 Ero yipu mokyataw ceipamyasî tak tuuna toopu wara ro mak. Ceipu tak nasî tuuna rarî ero yimaw. Onoke ero wara n̂iir̂a?

31 Xir̂koimo ma re mimiya amoro? Yaipî yohyatho mici ma re mîmhoke?

32 Xir̂ko mko ma re men̂emhatake onoke na warai me cesenposom? En̂emhatakacho me exitaw men̂emhakate amoro? Uhsu warai men̂emhatake yîmxîkrî warai yakro?

33 Kah yawno komo panatanmetopo ma re mîhtînoya? N̂examro ma re miir̂a roowo pono komo yantoman̂e me?

34 Kar̂pe xa ma re mîmtapowa tuuna yewru n̂entarî me rma? Ero wa amtapowataw tuuna yukmacho ma re man̂ikya akmanîretopo?

35 Pepe kacho yen̂epen̂e ma re amoro? Awya ma re n̂esekatîmya ero yipu komo? Tanî nas amna, nîîke ha ma re awya?

36 Onoke xa tooto tîpîrî n̂iir̂akn̂e takîhsom me? Onoke xa tooto ropotarî n̂iir̂akn̂e yuhnari yîhtînon̂e me?

37-38 Onoke xa takîhso cehsom me nai kaapu smun yukuknomacho poko iyakenon yukuknomachome? Onoke kah yawnonho nukmamya tuuna, een yawnonho ha? Ero wa tukmampore nasî ceipamtîketaw roowo, etamnonoyataw marha.

39 Amoro ma re mesetake reaw yon yotî wece? Amoro ma re reaw xîkrî motme?

40 Ero wa so ma re noro yipu komo motme amoro ewtarî yaw etamruyataw, peen chew wapancetaw marha?

41 Onok xa maxweren̂e warai nînahme. Anarimaw noro yipu xîkrî xee xee nîîke Kaan n̂entarî me rma. Miya so n̂etar̂asî yînapumra cexirî ke. Ero yimaw onoke xa nînahme ha? kekn̂e tî. Ero wa tî kekn̂e Kporin komo Xoo ya.