Taa, nîmtapowakn̂e rma tî ka Eriu. On wara tî kekn̂e hara, Tarai wencesî. Entache rma owya ocoro tohtohtoh kesî. Tahron̂em wa nasî kopi.

2 Entacoko xe ka. Cewtun̂em me xa nîmtapowasî Kaan, nupurwasî mak kopi. Yîmtapotarî mîn ha.

3 Knerere kacho n̂entamexpesî Kaan ahnoro roowo poko hakno komo n̂entarî me. Pepe kacho marha n̂enpesî mîyan komo ya rma, roowo yenatîtopo tono komo n̂enîrî me meero.

4 Pepe kache tarai tak kesî kar̂pe ro mak. Car̂ar̂a kesî ro mak Kaan kar̂pe, yamoro mak kahra ro mak nasî.

5 Keserepokacho me xa nîyorwasî Kaanî mtapotarî. Keserepokacho me nasî yin̂irithîrî. Camkî mak tasî ero yipu poko.

6 On wara kesî n̂eepe ya, Roowo pona etoko, kesî. Tuuna marha n̂en̂epesî roowo pona. Wahra so mak n̂en̂epesî anarimaw. Xii kacho xa tak n̂en̂epesî anarimaw hara, kar̂pe xa cehtopo yenpotopo ha.

7 Kîtîtmamnoyasî iike, etapickaxapunhîrî komo. Ero wa kîtîtmamnoyasî tîn̂irithîrî ponaro tak kehtome so.

8 Comota pono komo cexe ewtarî yaka. Iito tak naxe epatakara ka.

9 Anarimaw tîmînî ro yai mokyas ocowo. Twotme nasî ocowo karitî.

10 Xeata n̂iir̂asî Kaan yapepen. Ceipamyasî tak tuuna takwekem komo rma.

11 Tuuna yewru n̂iir̂asî tuuna ken̂e xa. Miya so marha nakpayasî pepe kacho kaapu smun chere.

12 Noro mtapotarî yanme n̂etapomrikyasî tuuna yewru, kaapu smun kom ha. Kaapu yakwerî poko hak cesî. Kaanî mtapotarî yanme mak cesî ahce wa na ciino riso.

13 Anarimaw tuuna yewru nakîhcesî kpanarecho me. Tîrowon tîhtome n̂ekmexpesî anarimaw, kwakrecho ha. Ero wa n̂iir̂asî Kaan.

14 On wara wîîkes awya oyakno Xoo, atîtmamko ha ka, Kaan n̂iritho poko eserepokak ha ka.

15 Ahce wa na tuuna yewru nakîhce Kaan. Mîhtînoya ha re amoro? Ahce wa na pepe kacho n̂iir̂a hara. Ero ma re mîhtînoya amoro?

16 Ahce wa tuuna yewru nanîmya epîrkan me? Ero wa ciitopo ma re mîhtînoya amoro? Keserepokacho ciin̂e Mîk Kaan. Ehcamhokatîkaxapu xa Mîk ha.

17 Ahce kacho mîperamkwa aponon yaw anan̂i xan yekmexpetaw hara ocowo? Suu n̂ixan n̂ekmexpe anarimaw yamorono, roowo pono komo yerepotacho ha, ahce kacho mîperamkwa ero yimaw?

18 Noro ma re makronomai kaapu yakweretaw yîwya? Ceipuru mîn kaapu kanapa warai, bronse ciixapu warai.

19 Ahce wa kyam tîtketu Kaan ya Noro yakro kîmtapowataw so? Ekatîmko ka amna ya. Awarpanawno thakwa kîw. Ero ke kehyapamhokacho poko camkî tas okwe.

20 Apa, tîmtapota xe tî nai moso awakro, nîîke na Noro maywen yîwya kpoko so? Ero wa ketaw kîwyam pen kermomyasî mak kopi.

21 Kaamo wece xa enîhra tasî. Kewkaranpesî ro mak kah yaw kîkatparetaw. Ero wa kewkaranpesî kaamo yekatpankache ocowo ke.

22 Mehxa mokyasî Noro rma nohce n̂ixa. Yukurumîkno me xa mokyasî ooru ke tponoye. Kayaritomo me xa n̂esenpesî kopi.

23 Karitî ro yaka tohnî ro kîw. Karitî ro mak Mîk Kaan. Kecenarî kepeman̂e makî tko Mîk takîhsom xa. Tohnaw emetanmekno cirihra ro mak nasî.

24 Ero ke Noro poko twerî naxe tooto komo. Takîhso cesehtînosom ow ha, kan̂e komo poko eserepokara ro mak nasî. Ero wa nasî Kaan, kekn̂e tî. Ero wa tî kekn̂e Eriu.