1-2 Taa, nîmtapowakn̂e rma tî ka Eriu. On wara tî kekn̂e hara, Taa, expokan me ka esko oyakno. Kîmtapowasî rma ka awakro. Nasî rma kir̂wan me Kaan yehtopo on̂ekatîmrî. Entakî xe ka.

3 Meyeno komo mtapotachonho wencesî ohcamhokacho. Kir̂wan̂he ro mak oyakîton̂enho yehtopo wekatîmyas awya.

4 Tohnawno pîn me ro mak omtapotarî entakî. Ehcamhokatîkaxapu nasî tan ahyaw.

5 Karitî Mîk Kaan. Tooto komo tko yîwîrîyakara nasî. Karitî Mîk. Ahce na yîhtînopuche tîn̂irirî ero xa rma n̂iir̂asî.

6 Kicicitho komo yecehtora nasî waipîn me. Emetanmexapu komo yepanîn̂e reha Mîk ha.

7 Kir̂wan komo yenîn̂e me nasî miya roro enponkan me. Noro yipu komo n̂iir̂asî kayaritomo me eroromero. Kyopono me xa n̂enpesî.

8 Anarimaw so cimiso naxe anarî komo kuripara ke. Cesemetanmecho chew ro mak naxe anarimaw so ruupu ke yimixapu wara.

9 Ero wa exitaw so kicicme ehtoponhîrî komo n̂ekatîmyasî Kaan yîwya so. Kicicme mehce kica oyanwekn̂e me, kesî yîwya so.

10 Kir̂wan̂he ehtopo komo poko marha n̂examro panatanmekyasî. Kicicme awehtoponhîrî komo poxunkacoko, kesî yîwya so.

11 Kaan na n̂ewehcatu anarî komo. Noro yanton me tak natu. Ero wara cexitaw so tahwokacho komo yai ro mak tak n̂enmayaxe mooxe. Ero wara naxe miya roro twaihtopo komo pona roro. Cerepore roro naxe waipîn me cehtopo komo yecenarî.

12 Noro yewetîra exitaw so waihyaxe tak okwe kacipara imo ke. Camkîno me rma waihyaxe okwe.

13 On wara naxe kir̂wan wara cesenposom komo, Kaanî rwon yenmekn̂e wara naxe yîmtotopo yaka. Anarimaw so noro yipu komo napomipesî Kaan waapa ya. Ero yimaw rma tko on wara kahra naxe yîwya, Owî akronomak okwe, kahra naxe.

14 Kar̂pamxan me rma waihyaxe okwe. Kicicitho pokono komo chew mak waihyaxe okwe.

15 Cesemetanmesom komo reha nowyasî Kaan esemetanmekîra tak ehtome so. Cemetanmesom me rma exitaw so n̂examro yakro tak nîmtapowasî.

16 Amoro meero awow xe nasî Kaan awahwokacho yai. Kir̂wantaka tak awiri xe nas okre. Kir̂wanî ro ke tak anahma xe nas okre mer̂pono pîn ke.

17 Oroto tko metwîrîmesî kicicitho komo wara rma okwe. Kaan xa n̂esepanîyas apoko, yaaro n̂esepanîyasî.

18 On wara marha wîîkes awya, puranta ke apohkan̂e exitaw kicicitho poko noro yipu men ewetîra ro mak esko. Mer̂pono pîn puranta tîmî xe na nai awya. Wara rma ewetîra ro mak esko.

19 Mer̂pora exitaw awemyawno akurunpe ma re ero yipu esemetanmekîra ro mak tak awehtome? Anarimaw ahce na poko mekarice. Ero ke ma re tukurui mai esemetanmekîn me?

20 Yohno kokmam xe wasî, kahra esko. Kosope tko n̂etwaikexe tooto pen okwe.

21 Kicicitho poko rma na wai, kahra men esko. Kicicitho xatî wara rma kencesî awetwîrîmacho yopo.

22 Kyopono me xa nasî Kaan kar̂pe cexirî ke. Onok ma re nai anarî kpanatanmekn̂e Noro warai?

23 Onok ma re Noro panatanmekyakn̂e kir̂wan̂he ehtopo poko? Onoke ma re kekn̂e yîwya, Kicicme mîxakn̂e kica, kekn̂e?

24 Ero ke Kaan n̂iritho ponaro men esko ero poko ahwotachome. Ero poko so n̂ewanometken̂e pahxan pen komo.

25 Kaan n̂iritho n̂een̂axe tooto komo miyan komo rma ahnoro. Mooxe rma yin̂irithîrî n̂een̂axe.

26 Kyopono ro xa Mîk Kaan. Kyopono ro me Noro yehtopo nasî entatîkarî yopo ro mak kîwya so. Mer̂pora marha nasî cimn̂ipu Noro yehtoponho, yukuknomatîkarî yopo ro mak.

27 Tuuna nanîmyasî Noro pin̂ipici me so. Ero tak por̂mamyasî tmohsom me tak ehtome.

28 Ero yipu tak nasî tuuna yewru chew. Ero yai tak mokyasî mer̂pora ro mak tooto tîhtopo me.

29 Ahce wa na Noro n̂iritho n̂esenmamyasî tuuna yewru mko. Camkî mak tasî ero yipu poko. Ahce wa na knerere nîîke tarai Noro mîn yawno.

30 Enko xe, pepe kan̂e miya ro mak Noro n̂en̂epesî takpaxi ro mak. Ero ke rma weyunu mko nahruyasî tuuna imo kwawno mko.

31 Ero yipu ke rma mîk hak rowon pono komo panatanmekyasî. Yînahri komo marha nîmyasî mer̂pono pîn.

32 Tamorî womuhcesî pepe kan̂e ke. Pohcira marha nar̂mesî ahce na wotopo me.

33 Knerere kacho yencetaw, Tuuna mokyasî, tîtkexe. Paaka komo marha nasî tuuna ponaro, tmohsom ponaro.