1-2 Taa, nîmtapowakn̂e rma tî ka Eriu. On wara tî kekn̂e hara, Takîhso ma re mîmtapowa oyakno? On wara mîîkesî, Kir̂wan owî Kaan yopono, mîîkesî kica.

3 On wara marha mîîkesî, Kicicme exihnî ow. Wara rma ero wara oyehtoponho yepetho ahsîra rma wai ham. Kicicme cehsom wara rma oriyasî Kaan okwe, mîîkesî kica.

4 Amtapotarî tko weyukyas oyakno, awakrono komo yeiku xe marha was awakro rma.

5 Kaapu ika enko. Kaapu smun marha enko. Kaw xa nas ero ayopo ro mak.

6 Ero ke kicicme awexitaw Kaan ma re memetanmekya ero wa awehtoponhîrî ke? Noro yanwekyataw emapona roro Noro memetanmekya ha ma re ero wara awexirî ke?

7 Kir̂wan̂he awexitaw reha Noro yepetho me ma re nai ero wa awehtoponhîrî hara. Ahce ha re nahsîya Noro anmîthîrî?

8 Ero warahra nasî awehtopo. Awexiyem komo makî reha mîwîrîmesî rma kicicme awehtoponhîrî ke. Tooto mak makîhresî kir̂wan me awehtoponhîrî ke hara.

9 On wara naxe anarî komo anarimaw so, Okwe okwe, kexe kicicme exirî ke tantoman̂e komo. Miya ro mak tînantomarî komo n̂emetanmekyaxe anarî komo okwe. Karitî me naxe anarî komo antomano rin̂e komo. Ero ke on wara kexe yînantomarî komo, Wara n̂hema amna apickak okwe, kexe.

10 On wara tko kahra naxe emetanmexapu komo, Ahto nai Kaan hara oyakîton̂enho? Noro xa kpanatanmekyasî waano poko kosope rma. Ahto nai Noro hara? kahra naxe okwe.

11 Kîhcamhokexe so rma Noro camkîra kehtome so okno yopo. Tarin̂em yopo cma re kakîhrexe so. Ahto nai Noro yipu, kahra tko naxe emetanmexapu kom okwe.

12 Eyukno cirihra rma na nai Kaan anarimaw. Ow akronomatamko, kexe rma re. Eikura rma tko nai Kaan okwe. Ero wa kicicitho komo yeikura nai cehcoyoponkaxmu me exirî ke kica.

13 Tohnaw mak nîmtapowaxe Kaan yakro. Ero ke yîmtapotarî komo yentara nasî. Yîmtapotarî komo ponarora ro mak nasî Karitî ro.

14 On wara mîîkesî, Noro yenîhra ro mak wasî, mîîkesî. Awehtoponhîrî rma tko wa n̂een̂asî awepemachome. Ero ke Noro ya awakronomacho mak momohko ha ke.

15 On wara mîîkesî, Tîrwon̂e epanîno cirihra rma nai Kaan okwe. Akpîra kehtopo komo ponarora ro mak nai ham okwe, mîîkes okwe.

16 Ero ke on wara nasî Xoo, tohnaw ro mak nîmtapowasî. Mer̂pora nîmtapotasî camkî mak ha tko okwe, kekn̂e tî. Ero wa tî kekn̂e Eriu.