1-2 Nîmtapowakn̂e rma tî Eriu. On wara tî kekn̂e hara, Omtapotarî rma ka entacoko amyamro takîhsom komo. Omtapotarî rma ka entacoko amyamro mîn hak poko ehcamhokaxapu komo.

3 Knahrî nukukmesî kîkaran. Ero wara xa marha tooto mtapotarî nukukmesî kpanarî.

4 Ero ke kîwyamu rma kir̂wan̂he kehtopo poko cehcamhokacerî. Iito re xa tîhtînocerî kir̂wan̂he kehtopo komo.

5 On wara nîîke Xoo, Kir̂wan ow. Oyehtoponho yopo ro mak oyemetanmekyas okwe Kaan.

6 Cemarontaxmu me ma re wai kir̂wan me oyehtopo poko? Kicicme exihnî ow. Wara rma oyeper̂ancesî Kaan ecpînî ro ke mak okwe, kesî. Ero wa kesî Xoo.

7 Anarî exihra ro mak nasî Xoo warai, yîwîrîyakano rin̂e. Tuuna yeetopo wara nasî yîwya yîwîrîyakano ritopo.

8 Akpîn komo yakro cetarisom ham mîkî, kicicitho komo yakro ha.

9 On wara kan̂e me nasî, Kir̂wan̂he kirihra rma nasî Kaan tîîxe cehsom komo rma, kan̂e me.

10 Ero ke omtapotarî ka entacoko amyamro yuhnari yîhtînon̂e komo. Kicicitho pînî ro mak Mîk Kaan. Akpîra exihnî ro mak Mîkî Karitî ro.

11 Kepemexe so rma tko Noro kehtoponhîrî komo yecenarî. Ahce na n̂ekmexpe kîîpo, kehtoponhîrî yecenarîno mak ha.

12 Tohnaw esepanpînî ro mak Mîkî Kaan, yaarono mera kehtoponhîrî yepeman̂e pîn Mîk Karitî ro.

13 Onoke xa katî Kaan n̂iir̂akn̂e roowo pono komo kayaritomon me? Onoke xa roowo pono komo yenîn̂e me Noro n̂iir̂akn̂e?

14-15 On wara ciri xe cexitaw, Cekatî nowyasî Kaan tooto ropotawnonho, tapepenthîrî marha nowyasî. Ero yimaw ahnoro tooto komo tak waihyaxe iito re rma. Roowo me tak n̂etakîcexe hara okwe tootonhîrî.

16-17 Taa, yuhnari yîhtînon̂e me awexitaw omtapotarî tak entakî. Kîkayaritomon me ma re cicir̂a kecenarî kepeman̂e pîn kica? Yaaro xa kepeman̂e ro mîwîrîyake ha ma okwe? Karitî marha Mîk Noro mîwîrîyake?

18 Kayaritomo komo ya ma re tîtketu, Cehn̂axmu ro mak amoro kica, tîtketu? Antomano rin̂e komo ya ma re, Kicicitho amoro, tîtketu?

19 Kayaritomo me cehsom komo yen̂ekacho watohra ro mak nasî Kaan. Cemyawnoyem komo n̂een̂asî emyawnomnî komo wara rma. Ececenarî re mak noro yipu komo n̂een̂asî. Etîme re rma naxe yînakîtothîrî me re.

20 Ponan̂e so rma waihyaxe okwe etîme re. Rakatawro rma na waihyatu. N̂eserepokexe tak tooto komo, n̂ehcamnoyaxe marha. Karitînhîrî pen komo naar̂asî Kaan roowo poi tooto yamorî ken̂ehra rma anarimaw.

21 Tooto yehtopo yenîn̂e Mîkî Kaan. Ketapitopo komo rma n̂een̂asî ahnoro.

22 Exihra ro mak nasî awarpan, kwaihtopo yawarpan xa exihra nasî kicicitho pokono komo yeseyamtopo Kaan n̂enîrî mera ehtome so.

23 Miya xe xa tak en̂ekatîkano cirihra rma na nasî Kaan. Amoko xa hara ohyaka, ken̂eketîkesî ka, kahra rma nasî.

24 Karitî komo nar̂mesî ro mak Noro en̂ekara rma. Yîhretawno tak n̂iir̂asî anarî hara kayaritomo me.

25 N̂examro yehtopo rma n̂een̂asî roro. Kosope rma nar̂mesî. Nakuhr̂apesî ro mak oko n̂examro pen.

26 Kicicme ehtoponhîrî komo yanme rma waihkesî tooto komo wero ro rma.

27 Ero wa nasî Kaan kicicitho komo poko tîmtapotarî yai etowrî ke so, cehtopo ponarora ro mak exirî ke so marha okwe.

28 Cesemetanmesom komo yîspen̂e komo mîkyam, yîwratarî komo n̂encekn̂e Kaan. Cesemetanmesom komo ratarî yentan̂e ro Mîkî.

29 Anarimaw so tko tîtken̂arî wara tak nasî Kaan. Ero wara exitaw onoke ma re Noro nîwîrîyake tîtken̂e exirî ke? Cewru yahruyataw onoke ma re n̂een̂a Noro? Ero wa nai cewn̂an wece anarimaw so, mer̂pono pîn komo wece anarimaw so hara.

30 Ero warai me nasî kir̂wan wara mak cesenposom komo porohkachome, kayaritomo mera kr̂a tak ehtome so. Ero wa porohkesî yikicicireno cirihra ehtome.

31 On wara tko na ketu tooto Kaan ya anarimaw, opanarei Kaan. Kicicme wai ham okwe. Ero warahra tak was amn̂e.

32 Camkî mak was Apa, kicicme oyehtoponho poko. Owî n̂he panatanmeko ero poko. Ero yîhtînopuche tak owya ero yipu pokohra ro mak tak wasî, ketu na.

33 On wara tko wîîkes ow, awanme makî katî awepeme Kaan? Ero warahra ow epemakî, ketaw awya awewehca ha ma re awya? On wara xa kapore nasî Kaan ya, Apa, amoro xa yîhtînoko oyepemacho, kapore nasî.

34-35 Apoko rma tko nîmtapowaxe oyakro, oyakno, yuhnari yîhtînon̂e komo rma nîmtapowaxe. On wara kexe takîhsom komo rma apoko, Akpîn me mak nîmtapowasî Xoo okwe. Yuhnari yîhtînon̂e pîn wara nîmtapowas okwe, kexe.

36 Ero ke on wara reha wîîkes ow apoko, Xoo yukukmatîka xe wasî Kaan ya. Ero wa yukukma xe wasî kicicitho komo wara yîmtapotarî ke kica.

37 Kicicme cehtoponhîrî tak nîhremesî Kaan yanwetopo ke hara kica. Knowknow kesî kn̂entarî me Kaan yanwecho me rma kica. Mer̂pora ro mak nîmtapowasî Kaan yanwecho poko, kekn̂e tî. Ero wa tî kekn̂e Eriu.