Taa, nîmtapowakn̂e rma tî Eriu. On wara tî kekn̂e, Oyakno Xoo, oroto tak kîmtapowasî awakro. Omtapotarî cma re ka mencesî. Omtapotarî ponaro men esko etpoyino pîn ponaro.

2 Oroto tak omtarî wahrunkesî. Omtapotarî nasî on̂uru potwo tak ha.

3 Takîhso nasî oropotarî. Ero yipu yai n̂epatakesî omtapotarî. Yaaro xa mak tan kîmtapowasî camkîno pîn me.

4 Oyakîton̂enho Mîkî Kaan Yekatî. Karitî ro yapepen oriyasî waipîn me.

5 Omtapotarî yeyuhtopo yîhtînoyataw awya ow tak eyuhko. Tatke xa oyeyutopo yîhtînoko. Ero tak ekatîmko owya.

6 Awara xa marha was ow hara Kaan wero. Kawaunhîrî xa marha ow hara.

7 Ero ke erasîn me ro mak esko opona. Awetapan̂e pîn me wasî.

8 On wara tko mîîka on̂entarî me rma, kir̂wantaw wenta amtapotarî.

9 On wara mîîka, Kir̂wanî ro mak ow, kicicme oyehtoponho exihra ro mak nasî. Yusmumnî ro mak ow. Akpîra cehtoponhîrî ke tîropotawnoyem mîkro, kacho mera ro mak was ow ha.

10 Wara rma kicicitho warai me rma oyen̂a ham Kaan. Tîîxatî pîn me rma oyen̂a ham okwe.

11 Ohraknu nakîknoyasî ahsîtopo yaka okwe. Ahnoro oyesamarî n̂een̂asî roro, mîîka.

12 On wara tko wîîkes awya, akpîra mîmtapowasî ero wara. Porinî ro mak Mîk Kaan, tooto yopono ro makî.

13 Ahce kacho Kaan yakro ceseseyusom wara mai hara? Esekatîmnî ro Mîkî tîmtapotacho poko.

14 Anarmen ke rma na tîmtapotarî n̂entamexpe Kaan kîwya so. Entara rma tko tasî kîw tooto kaxi thakwa.

15 Anarimaw tooto yakro nîmtapowasî Kaan wosoto, kosope na enîhnî n̂enpe yîwya. Yuhnari tîwînîkyasî rakatawro kama po. Ero yimaw so ahce na n̂enpe kîwya so.

16 Kpanarî komo nahrunkesî tîmtapotarî yentachome. Kîtwermacho komo poko nîmtapowasî.

17 Ero wa na nîmtapowa anarî komo yakro kicicme exihra ehtome so, anarî komo yopono me esehtînopîra marha ehtome so.

18 Waipîra ehtome so n̂he marha nîmtapowasî akro so, kacipara imo ke paraxkan̂e komo yai mooxe ro mak ehtome so.

19 Anarî komo na namotore cerewrem ke eper̂a ke. Namotore ro mak ha na kama po rma. Iyochîrî komo na n̂iir̂a cerewrem me ro mak oko.

20 Ero wa exitaw so tak poxumra ro mak n̂een̂axe tînahrî komo. Tpoxwe ciixapu rma na nai poxumra ro mak yîwya so amotorî ke so okwe.

21 Nakporoyaxe wahra cehso ro mak okwe. Iyochîrî komo tak n̂esenpesî esenponînhîrî.

22 Roowo cheka tahrutopo komo pahnoke tak naxe. Twaparî komo pahnoke tak n̂ehtîkexe.

23 Anarimaw tko Kaanî mtapotarî yekatîmn̂e na nai iito, On wara xa kesî Kaan awya, kan̂e. 1.000 me na natu ekatîmn̂e komo. Cewn̂e makî tko na nai takîhso kehtopo komo yekatîmn̂e.

24 Kaan yakro marha nîmtapowa. On wara na nîîke yîwya, Moso cma re mîmcesî. Mîwahkocesî cma re tohra ehtome tahrutopo yaka. Moso yepemacho tak wenwo, nîîke na Kaan ya.

25 Noro yipu exitaw Kaan yakro tîmtapotaxmu kir̂wan̂he tak nasî okopunhîrî. N̂etakir̂wamesî tak yupun rikomo pun wara rma. Kar̂pamxan me ka xakn̂e ero wara rma tak nas hara okre.

26 Kaan yakro tak nîmtapowasî okopunhîrî rma. Kaan n̂enîrî mexe xa tak nai. Kaan yewru tak n̂een̂asî tahwore okre. Kir̂wan me xa hara noro yipu n̂iir̂asî Kaan.

27 Ero yinhîrî n̂esekatîmyasî tak okopunhîrî karihtoxapu. On wara kesî yîwya so, Kicicme wîxakn̂e kica. Akpîra wîxakn̂e kica takîhsomînhîrî rma ha re. Wara rma kicicme oyehtoponho yecenarîra rma oyepemai Kaan, kesî.

28 Ero ke noro yipu porohkesî Kaan waihtopo pona tîtosomînhîrî. Waipîra tak wai ham katpan yentome rma okre owya, kesî. Ero wa kesî Kaan namotorethonhîrî.

29 Ero wa kiin̂e xa Mîk Kaan. Asakî ro na ero wa kiir̂a, osorwaw ro ha na.

30 Ero wa kporohkexe so kwaihtopo pona tohra kehtome so, katpan yentome rma kîwya so, waipîra kiin̂e yentome ha.

31 Omtapotarî men entakî oyakno Xoo. Ahce na ponarora esko. Tîtken̂e ka esko omtapotachome n̂he.

32 Ahce wa na ka xe awexitaw kasko. Ow eyuhko. Ahyapamhokachome mak omtapota xe tan wasî.

33 Amtapotarî yîhtînopîra awexitaw ow mak entakî. Tîtken̂e mak esko awakîretopo poko ahcamhokachome owya, kekn̂e tî. Ero wa tî kekn̂e Eriu.