Ero yinhîrî takî tî nîtîtmamyatken̂e Xoo yakrono komo, 3 kom ha. Xoo mtapotachonho yeikura takî tî xatken̂e kir̂wan me cesesensom me exirî ke.

2 Iito tko tî xakn̂e anarî hara, Eriu tî mîk xakn̂e noro yosotî, Barakew mumuru ha. Busu yepamtho tî mîk xakn̂e, Raw pen yepamtho tî. On wara takî tî xakn̂e noro, Xoo poko takî tî nîrwonakn̂e, Kir̂wan ow ha, karî ke yîwya, Kir̂wan xa Kaan, kahtorî ke marha. Ero wa Xoo mtapotarî poko nîrwonakn̂e.

3 Xoo yakrono komo poko marha nîrwonakn̂e, 3 komo poko, camkî exirî ke so Xoo mtapotachonho yeyuhtopo poko. Wara rma, Kicicme masî kica, ketken̂e tî Xoo ya. Ero wa exirî ke so tî nîrwonakn̂e Eriu poko so.

4 N̂examro rma ka nîmtapotacowpe, kekn̂e rma tko tî ka Eriu poritomo me n̂he exirî ke so n̂examro.

5 Taa, Xoo yeyuhtopo yîhtînopîra nat ham okwe akrono komo, 3 kom ha, kekn̂e takî tî Eriu. Ero ke takî tî nîrwonakn̂e Eriu.

6 Ero ke on wara takî tî kekn̂e noro, Barakew mumuru, Busu yepamtho, Ai oyakno, on wara cma re wîîkes ow hara, kar̂pamxan me n̂he was ow. Poritomo komo reha amyamro. Ero ke twerî ka weexi. Onîhtînorî poko omtapota xera ka weexi.

7 On wara wîîka, poritomo komo cokorî ka nîmtapotacowpe. Mer̂pora cimn̂ipu exitaw kewrutoponhîrî ero yimaw tak takîhso kehtopo poko panatanmekno cicir̂asî, wîîka.

8 Wara rma cekatke tasî tooto kaxi. Karitî ro yapepen nasî kropotaw so. Ero xa kiir̂asî yuhnari yîhtînon̂e me.

9 Anarimaw akpîra cehsom me na natu poritomo komo rma okwe. Kir̂wan̂he kehtopo yîhtînon̂e pîn me rma na natu anarimaw.

10 Ero ke on wara wîîkes awya so, Omtapotarî ka entacoko. Onîhtînorî tak wekatîmyas ow hara awya so.

11 Yîmtapotara ka weexi amtapowataw so. Awesehtînotopo komo ka wenta. Amtapotarî komo wenta ero men̂eketaw awya so.

12 Amtapotarî komo ponaro xa weexi. Camkî Xoo yehtopo yenpora rma tko mehcow. Noro mtapotarî yeikura mehcow okwe.

13 On wara tko kahra ehcoko, Takîhso rma tîmtapota Xoo yakro. Kaan mak xa yo yîmtayar̂man̂e me nasî, kahra.

14 Omtayar̂macho mera reha nîmtapowakn̂e Xoo. Ero ke noro mtapotachonho yeikura wasî amtapotachonhîrî komo wara.

15 On wara wîîka, nahwokacow tak Xoo yakrono komo. Tîmtapotarî komo yîhtînopîra tak naxe okwe. N̂enatî tak yîmtapotarî komo.

16 Ahce wa katî wai? wîîka. Nîtîtmamcow tak. Iito mak tak n̂ecececexe eyuhtopo ken̂ehra. Tîtken̂e rma katî wai ow?

17 Pîra, ow makîrha kîmtapowasî. Onîhtînorî tak wekatîmyasî.

18 Copoi xa nasî oropotarî omtapotarî ke. Expon me ro mak oriyasî oyekatî omtapotacho poko.

19 Wok warai nasî oropotaw, een yawno warai. Etawkaporono wara tko nas oropotarî, wok yen wara, yaxan wara.

20 Ero ke kîmtapowasî thakwa oyexpotachome. Omtarî thakwa wahrunkesî aweyutome so.

21 Etîme re mak keyukyaxe so, ehcakumyaka so aweiku xera ro mak wasî. Kir̂wanî ro amoro, ka xera ro mak was awya so tohnaw mak.

22 Kir̂wanî ro amoro okre, kan̂e ro me oyexitaw, tohnaw kan̂e ro me mak oyexitaw, owaikesî tak okwe oyakîton̂enho. Ero wa oriyas okwe, kekn̂e tî. Ero wa kekn̂e tî Eriu.