Taa, nîmtapowakn̂e rma tî Xoo. On wara tî kekn̂e hara, On wara marha wîîkes awya so oyakno komo, Pahxa on wara wîîkekn̂e oyewru ya rma, Emasî entîkara esko, wîîkekn̂e. Ero ke ahce kacho noro yipu rma wentîke hara?

2 Meye nasî Kaan kah yaw. Ahce wa xa kehtopo nîhtînoya Noro? Ahce wa xa kiitopo nîhtînoya Karitî ro.

3 On warai xa nîhtînoyasî kicicitho komo ciitopo, yîwîrîmacho xa nîhtînoyaî noro yipu komo ciitopo. Ero xa nîmyasî kicicme ehxapu komo ya.

4 Oyehtopo rma wa n̂een̂asî Kaan. Oyetapitopo meero nukuknomesî ahnoro.

5 Cemarontaxmu me ma re wai? Yohno ma re kîwcekn̂e emîknono riso?

6 Oyehtopo yawsîn nukuknomape Kaan awsîn yukuknomacho ke yaarono ke. Ero wa oyehtopo yukuknometaw kicicme exihnî me ro mak oyen̂asî.

7 Kaan yesamarî yai etowxapu me exihra wasî. Censom poko epohkara marha wasî. Oyamorî yusmuren̂e mera marha wasî kicicitho ke?

8 Ero yipu poko rma oyexitaw ketaw re kica onatîrî yeperîrî nahcowpe mak anarî komo. Onatîtho rma kr̂a mohkacowpe.

9 Wooxam poko epohkara ro mak wasî. Omîtwono mîn potarî pahnoke eseyamra marha wasî.

10 Ero wa oyexitaw ketaw ha re anarî natîrî yeperîrî naposokape rma opici. Noro yenaka marha kr̂a n̂etakricowpe kîrkomo.

11 Ero wara oyepoketaw ketaw ha re anarî wooxam poko kicicme ro mak wexirî kica. Yaaro rma oyetwîrîmacho chew tak was ha re.

12 Wehto warai xa mîn kipici pîn poko kepohkacho. Kakn̂in̂e xa mîn twaihkaxi ro. Onatîtho penî kr̂a n̂emohkatîkarî ha re ero wara oyexitaw ketaw ha re.

13 Oyanton komo mtapotarî yentan̂e pîn me ma re wîxakn̂e awya so kîrkomo mtapotarî, wooxam komo mtapotarî marha. Amna memetanmekyasî kica, kacho yentan̂e pîn me ma re wîxakn̂e n̂examro mtapotarî?

14 Entan̂e pîn me oyexitaw ketaw ha re ahce wa thakwa wai okwe amn̂e ero poko oyen̂eketaw Kaan ya. Ero wa oyehtoponho yanme owîrîmacho yekpetaw ketaw ha re ahce wa thakwa re weyukya okwe?

15 Onocwan ropotaw oyakîcekn̂e Kaan. Ero wa xa marha n̂examro nakîhcekn̂e hara Noro rma. Noro re Mîkî amna yakîhton̂enho amna nocwan ropotaka.

16 Kamenakn̂e ha ma re awya so oyemyawno poyero? Yiixe cesemetanmesom komo yehtopo komo tîmîhra ma re wîxakn̂e? Iin̂o waixapu komo ma re wîspekn̂e awya so cesewkaxi ro.

17 Oyuru ma re wîmcekn̂e oyuru ro me mak? Ekamra ma re wîxakn̂e yîmîhnî komo yuru me?

18 On wara xa matko wîxakn̂e yîmîhnî komo poko, noro yipu komo por̂mamnon̂e me wîxakn̂e yîîm komo wara rma. Oyewrutoponho n̂ixa ro rma iin̂o waixapu komo wakronomekn̂e.

19-20 Komsîn̂em komo marha ween̂akn̂e amn̂e xa so, pononpon komo okwe. Waiporono komo mîkyam ween̂akn̂e yahcono yosom pîn kom ha. Noro yipu komo yenîche owya, ponon komo wîmyakn̂e yîwya so. Oyok poci kahxapu wîmyakn̂e ponon komo me. Ero ke, Ero wa ham okre oyakno, ketken̂e owya tpononmetaw so.

21 On warai komo marha ween̂akn̂e rma re, yîmîhnî yen̂ekarî ween̂akn̂e okwe anarî komo ya, rikomo pen yen̂ekarî. Miya kr̂a arko moso noro yanton me, ka xe tî xatken̂e noro yipu poko. Ero wa en̂ekarî yencetaw owya, kapockanwakn̂e ma re awya so, Taa, arko rma kr̂a, kachome yîwya so? Ero wa kahra ro mak wîxakn̂e.

22 Ero wa kan̂e me oyexitaw ketaw ha re n̂emohkape kr̂a oyapotho omotai. N̂emohkape kr̂a ewru to xa.

23 Ero wa exihra ro mak wîxakn̂e twerî oyexirî ke Kaan poko. Owaike men kopi, wîîkekn̂e Noro poko. Kayaritomo imo Mîk kopi, wîîkekn̂e marha. Ero wa Noro yenîrî ke owya kicicme so exihra wîxakn̂e.

24 Ooru pona ma re ween̂akn̂e awya so esemetanmekîn me oyehtome. On wara ma re wîîken̂e ooru ya, esmanî ro ya, Pona owya entopo xa amoro esmetanmekîn me ro mak oyehtome, wîîkekn̂e ma re awya so?

25 Mer̂pora ro mak xakn̂e ha re oyemyawno ahce na pona ahsîxapu. Ero poko ma re kahwowakn̂e awya so?

26-27 Kaamo rma re ween̂akn̂e kîkatparen̂e imo ro mak. Nuun̂i marha re ween̂akn̂e kosope kweipon̂e kom ha. Ero yipu poko epohkatîkara tko wîxakn̂e. Oyamorî yewcokara wîxakn̂e ero mko wece yiixatî me. Pîra ro mak.

28 Ero wa oyexitaw ketaw ha re kaamo wece, nuun̂i wece marha kicicme was ha re okwe, tîwîrîmaxmu me yaaro. Kaan yanwekn̂e me tak was okwe, kah yawno yanwekn̂e me.

29 Anarimaw so tak n̂esemetanmekyakn̂e rma okwe ooxatî pîn. Awya kr̂a ha, kahra tko wîxakn̂e noro yipu poko. Ahwotara ro mak wîxakn̂e noro yipu yesemetanmetopo poko.

30 Omtarî rma wîtwermekn̂e kicicme omtapotacho poko. Kaan yai aponkura ro mak esko aaxatî pîn komo yîwîrîmacho, wîîkekn̂e omtarî ya rma.

31 On wara kahra ro mak xatken̂e oyanton komo, ohyawno kom ha, Kir̂wan̂he knahmara ro mak nas okwe Xoo, kahra.

32 Pawana mokuche ohyaka kokon̂i en̂epera ro mak wîxakn̂e esama yaw mak yîwînso. Ahnoro pawana komo wermonoyakn̂e omîn yaka.

33 Kicicme cehtoponhîrî n̂eyamyakn̂e Ataw pen okwe. Ero wa oyehtoponho yeyamra ro mak wîxakn̂e owî reha oropotaka.

34 Esenmexapu komo pona erasîra wîxakn̂e. Katpanaka epatakara wasî kopi. Owîrîyakexe men okwe, kahra wîxakn̂e. Tîtîtmamso mak exihra wîxakn̂e oyehtoponho yekatîmn̂e pîn me. Ero wara exihra wîxakn̂e owî reha. Ero warai ow.

35 Taa, on wara xa wîîkesî, oyesekatîmtopo yentan̂e xe ro mak was okwe. Karitî ro mtapotarî yenta xe tak wasî oyehyapamhokacho yeyuhtopo. On wara xa nasî kicicme awehtoponhîrî, kacho mewre xe wasî yîwya karita yaka.

36 Ero wara oyehtoponho mewretaw yîwya yînmewrethîrî watporî ha re oponon motaka tooto n̂enîrî me. Ero takî re wamrurî marha oyarokorî me.

37 Oyehtoponho wekatîmtîkarî yîwya. Kayaritomo mumuru wara rma kîwtorî yîhyaka. Ero wara kîwtorî Kaan yaka.

38 Ahce wa nai omararînî mko, owoskaranî mko marha? Kicicme masî kica, kan̂e wara ma re nat owya? Tîwrataxmu me ma re nai omararîn pomoxapu?

39 Omararîn pono yeperîrî ma re wahtîkai ero poko etapickaxapunhîrî komo yepemara rma ka oyexitaw? Omararîn ciin̂enho komo ma re wahwokai awya so?

40 Ero wara oyexitaw ketaw ha re omararîn po tak natîhtape pomn̂uko mak puruma yemtakan me. Peen mak tak natîhtape iito, sepata yemtakan me hara. N̂eexi tak, ero wicakî mak nasî omtapotarî. Xoo ow ha, kekn̂e tî. Ero wa tî kekn̂e Xoo.