Nîmtapowakn̂e rma tî ka Xoo. On wara tî kekn̂e hara, Ero warahra tak naxe opoyino komo oroto opoko okwe. Opoko n̂etaporexe tak okwe. Oyecenarîno komo rma n̂etaporexe opoko. N̂examro yîîm meero naxe kicicitho me ro mak. Oyoku yakrono mera ro mak ween̂asî noro yipu yîîm komo, kahn̂eru yenîn̂e me naxe xapari noro yipu yîîm komo yakrono mera.

2 Kar̂pe rma re xakn̂e n̂examro yamorî. Oyakronoman̂e pîn me tko xatken̂e ahwora cetapickaxmu me.

3 Takporoso xatken̂e cesemetanmekrî ke so, rooma poko cexirî ke so marha. Roowo pore waimamyatken̂e mak okwe turpem pore. Miya so n̂etar̂atken̂e pohnîntari so okwe, kosope so n̂etar̂atken̂e.

4 Tînahrî komo pohcatken̂e krarasî chewno yeperîrî. Weewe micin marha nahcetken̂e tînahrî komo me.

5 N̂examro n̂en̂epetken̂e enmayipu komo rma okwe. N̂examro n̂eiyatken̂e kîrîyem komo cen̂epan̂em ceiyasî ero wara.

6 Tuuna yarinho yaw mak n̂enmayatken̂e. Toopu chew mak n̂enmayatken̂e, ewtarî yaw so anarimaw.

7 Peen chew mak n̂ewnoyatken̂e kar̂pe buhu wara. Cekyekyem makataka mak n̂esenmekyatken̂e.

8 Akpîn mumuru komo mîkyam xatken̂e kica, kicicitho komo mumuru kom ha. Miya ro kr̂a makî noro yipu pen n̂en̂epetken̂e poyino komo ceken komo poi. Ero wa xatken̂e noro yipu komo.

9 Oroto tko noro yipu komo rma n̂etaporexe opoko. Waano me n̂etaporexe opoko. Cetwîrîyakacho me so rma oyetacaxe.

10 Ooxatî pîn me ro mak tak naxe okwe. Omamrikyaxe mak okwe. Yîkrîpîn me ro mak n̂etakwaxe oyewru pore rma kica.

11 Okrapan yaacitho tak nîmhokai Kaan okwe. Oyemetanmekyasî tak okwe. Ero ke n̂examro mumuru komo naxe opoko camra ro mak.

12 Kaari n̂ixa tak mokyaxe wara hakî kan̂e komo. Ohtayamxitopo n̂iir̂axe oyesamarî yaka. Cesamarî komo nakir̂wamexe tmohtome so oyar̂maxi.

13 Owahkototopo n̂iir̂axe oyesamarî yaka. Oyahwokacho n̂ekmexpexe okwe. Oyakronoman̂e exihra ro mak nasî noro yipu komo yîtwerman̂e.

14 Waaca yewtarî yaro mokyatawno wara mokyaxe. Ewtotho pore so mokyaxe mer̂pono pîn komo.

15 Oyopo ro mak tak nasî oyeraspetopo. Ehnanî ro me oyehtoponho tak n̂ehcamnoi okwe ocowo narîtho wara. Kaapu smun ciki n̂ehcamnoyasî wahrainhîrî ciki, ero wa xa marha n̂ehcamnoyasî ehn̂an me oyehtoponho.

16 Oroto tak kekar̂ketîkesî oyesemetanmecho ke. Enmar̂atîxera ahwora oyehtopo oyahsîyasî.

17 Kosope tak oyocho n̂erewas oko paraxkaxapu wara. Kîkamereyasî roro eserewkan me ro mak oko.

18 Karitî xa on oyeper̂an. Erotho ke rma oponon nusmuresî kica. Oyexewnukyasî mak oponon oko.

19 Apacakrî kwakan wara oyar̂mesî Kaan. Roowo pupun me tak oriye kica, wemronho me marha kica.

20 Apa Kaan, awakro kîmtapowasî cerewre ro mak. Oyeikura ro makî tko mas okwe. Piiri kawomyasî. Wara rma ow meen̂asî mak okwe.

21 Owaparî wara tak metaknamai hara okwe. Owahkoton̂e wara ro mak masî awamorî ke, karitî ke.

22 Ow manîmyasî ocowo narîrî me mak okwe. Ocowo imo nar̂marî wara ow miir̂as oko. Ow mîwîrîmesî ro mak.

23 On wara marha wîîkesî, Amn̂e tak ow maar̂as owaitopo yaka, waipînînhîrî komo yeken me ciixapu yaka, wîîkesî.

24 Ahwokatîkaxapu yîwîrîman̂e mera cma re nasî Kaan. Owî cma re makronomesî, ketaw yîwya ahwokatîkaxapu pen noro yipu yîwîrîmara nai.

25 Owî reha kîwracekn̂e ahwokaxapu komo pînîn yaw. Kahwokai xa oyenmayipu komo yesemetanmekrî ke.

26 Wara rma tahwore oyehtopo ponaro oyexitaw oyahwokacho xa matko oyepore okwe. Oweyuru ponaro oyexitaw awarpan xa matko oyepore kica.

27 Cetar̂maxmu wara ro mak nasî oropotarî okwe. Erepotara wasî. Kokmamso roro kerewas oko.

28 Yicwirexapu me mak ketar̂asî. Kaamo pînî rma tko ocwiresî. Esenmexapu komo chew oyexitaw piiri kawomyasî. Owî cma re makronomexe, wîîkesî yîwya so.

29 Kamara warai yakno me mak tak wasî, apesuturu yakrono me marha.

30 Cicwiye tak nas ohcîpîtho. Ketpikesî marha. Ocoro marha nasî oyocho oco.

31 Tîwrataxmu warai me tak nasî oratîn ahpa. Okwe okwe, kacho mak naar̂asî oratîn cecesom. Ero wara was okwe, kekn̂e. Ero wa tî kekn̂e Xoo.