1-2 Taa, nîmtapowakn̂e rma tî ka Xoo. On wara tî kekn̂e hara, Pahxa wîxakn̂e ero wara rma oyexi xe ro mak wasî oroto xa hara. Ero yimaw oyenîn̂e me xakn̂e Kaan.

3 Noro ramhan marha ohtîpîrî weipekn̂e. Noro weyuru po marha ketar̂akn̂e awarpanaw rma.

4 Poritomotho mera ka oyexitaw on wara wîxakn̂e, Kaan xakn̂e oyakrono ro me. Ohyawno komo yakronoman̂e me marha xakn̂e ero yimaw okre.

5 Karitî ro ka xakn̂e oyakrono me. Omxîkrî komo marha xatken̂e ohyaw.

6 Ero yimaw oyesamarî xakn̂e paaka mownu katî ken̂e xa okre. Toh yai n̂epatakekn̂e aseci onahrî yesuru. Mer̂pora ro mak n̂epatakekn̂e eepu wara ro mak okre.

7 Anarimaw so ewto imo potaka kîwcekn̂e. Iito tak keremekn̂e ewto roron pona.

8 Iina oyexitaw kar̂pamxan komo oyen̂atken̂e. Oyesamarî yai cetken̂e owtotome. Poritomo komo marha nawomyatken̂e piiri so yîcheka so owcetaw.

9 Iito exitaw antomano rin̂e komo n̂examro meero nîtîtmamyatken̂e, yîmtapotara tak. N̂emtayahruyatken̂e tak tamorî ke so.

10 Kayaritomo me cehsom komo marha nîtîtmamyatken̂e. Yun̂uru komo n̂etahsîyakn̂e karantaka so rma.

11 Omtapotarî yencetaw opoyino komo ya, Kir̂wan mîkro, ketken̂e. Ero wa xa marha ketken̂e opoko oyen̂ataw hara.

12 Ero wa ketken̂e opoyino komo opoko cesemetanmesom komo yakronoman̂e me oyexirî ke. Owî cma re makronomesî, kan̂e komo wakronomekn̂e. Yîmîhnî komo marha wakronomekn̂e, akronoman̂e ken̂arî pîn kom ha.

13 Kir̂wan̂he oyehtopo n̂ekatîmyatken̂e kîrkomo twaihyataw so. Iin̂o waixapu komo n̂ewanometken̂e tahwore cexirî ke so okre.

14 Kir̂wan me oyehtopo wamruyakn̂e oponon wara. Ecenarî xa epemano rin̂e me oyehtopo wamruyakn̂e oponon warai me, ohtîpîrî wom warai me marha.

15 Ewuhnî komo yewru wara wîxakn̂e. Yîhrepun komo tarî wara marha wîxakn̂e.

16 Cesemetanmesom komo yîîm wara wîxakn̂e. Kîcheka mohxapu komo mtapotarî wakronomekn̂e cen̂ekaxmu me exitaw so.

17 Kicicitho komo yorî kr̂a wîhkocekn̂e. Noro yipu komo n̂eskatho komo ow mohkekn̂e yîmtai so.

18 On wara cma re ka wîîkekn̂e ero yimaw, Tanî rma kyam kwaihya ham amn̂e omîn yaw rma. Mer̂pora ro mak tak nai ero yimaw kaamo, oyewrutoponho, axawa wicakî mak okre, wîîkekn̂e.

19 Miya cee amn̂e omicin warai yukwaka roro. Operemru poko n̂etakîcesî cicakî. Iito nasî cenmakaxi ro.

20 Tahwore roro wasî kar̂pamxan komo wara rma. Yaxan me nasî okrapan miya roro. Ero wa nai okrapan oyemyawno ha, wîîkekn̂e cma re. Ero wa so ka oyehtopo wîhtînoyakn̂e.

21 Ero yimaw ka omtapotarî n̂encekn̂e kîrkomo. Ahri ka noro mtapotarî ka wencesî, ketken̂e opoko. Tîtken̂e makî ka xatken̂e omtapotarî yentachome takîhretopo komo.

22 Omtapotatîkache yîmtapotara tak xatken̂e. Omtapotarî n̂etahsîyakn̂e n̂examro poko cicakî wara.

23 Omomokyatken̂e tuuna tmohsom tîtmomokyas ero wara. N̂emcayatken̂e tuuna tmohsom yeen̂e wara, yihcirî me tmohsom yeen̂e wara.

24 N̂examro wece cewtawake oyexitaw oyanwekn̂e wara xatken̂e. Tpoxwe tî xakn̂e yîwya so cewtawake oyehtoponho.

25 On wara xa cirpore nasî, wîîkekn̂e roro yîwya so cemyawno poko esencetaw so. Kayaritomo wara wîxakn̂e, sowtatu ke tmayweyem wara. Tîwrataxmu komo yewyakîren̂e me marha wîxakn̂e. Ero wara wîxakn̂e pahxa ha ka, kekn̂e. Ero wa tî kekn̂e Xoo.