On wara marha wîîkes awya so, on wara naxe kicicitho komo, n̂emahciyaxe waapa exihra ro mak exitaw. Erasîn me reha naxe kir̂wan komo reaw wara rma.

2 On wara naxe kayaritomo komo, yaake ro n̂ehretawnomexe kicicme exitaw maywen komo. Yuhnari yîhtînon̂e me exitaw tko kayaritomo, mîn hak poko cehcamhokaxi exitaw marha, tmaywen komo yakîhren̂e me nasî pahkî.

3 On wara naxe anarî komo, yupurantamnî kom ha, twarai komo xa marha n̂emetanmekyaxe kica, yupurantamnî komo xa marha. Noro yipu komo naxe tuuna tmohsom wara, ocowo imo yakro tmohsom wara. Kmararîn yîwîrîman̂e me mak nas okwe. Naatî macakesî, naar̂asî marha. Ero wa xa marha nasî yupurantamnî yemetanmekn̂e komo yupurantamnî komo rma.

4 On wara naxe kpanatanmetopo komo yai cetowsom komo, kicicitho komo poko nahwowaxe kica. Kpanatanmetopo komo yewetîn̂e komo reha naxe kicicitho komo yîtwerman̂e me.

5 Camkî naxe kicicitho komo takîhso en̂ekano ritopo poko. Kporin komo yepon̂e komo reha naxe yuhnari yîhtînon̂e me ahnoro.

6 Tawake n̂he naxe yupurantamnî komo, takîhso cexitaw. Tawake exihra n̂he naxe cetanwesom komo tupurantayem komo rma.

7 On wara naxe kumumuru komo kpanatanmetopo yewetîn̂e me cexitaw so, takîhso cehtopo komo ponaro marha naxe okre. Anarî komo mumuru naxe tîyopo so ceseresmaxmu komo yakrono me. Noro yipu komo naxe tîîm komo yîhyapamnon̂e me.

8 On wara naxe anarî komo, tupurantan komo n̂epamnoyaxe yupurantamnî komo yai towrî ke okwe. Ero wa ahsîxapu tak nasî anarî komo purantan me hara amn̂e, yupurantamnî pînîn yawno komo purantan me ha.

9 Anarî komo naxe kpanatanmetopo yenta xatî pîn me. Noro yipu komo rma na nîmtapowatu Kaan yakro. Poxumra ro makî tko nasî yîmtapotarî komo Kaan ya.

10 On wara naxe anarî komo, kir̂wan komo, n̂etowyaxe tak kicicme cehtopo komo pona hara kica. Kicicitho komo yanme rma n̂etowyaxe okwe. Noro yipu komo towpon̂e komo tak men n̂epîrkexe amn̂e ewtarî yaka, tînahtothîrî komo yaka rma. Ero warahra naxe kir̂wan komo, Kicicitho komo mîkyam kica, kacho pîn kom ha, kir̂wanî mko tak nahsîyaxe okre.

11 On wara kexe cemyawnoyem komo, Takîhsom xa ow okre, kexe kica. Anarimaw tko yupurantamnî na nai noro yipu mîtwo yuhnari yîhtînon̂e hara. Noro tak na cemyawnoyem yehtopo n̂entîke yuhnaw ehtopo xa.

12 Anarimaw so kir̂wan komo nahwowaxe okre. Ero yimaw nahwowaxe ahnoro iitono komo. Anarimaw hara kicicitho tak nai kayaritomo me hara kica. Ero wa exitaw noro yipu maywen komo tak n̂eseyamyaxe mak okwe.

13 Kicicme kehtoponhîrî yeyamyataw kîwya so cehn̂axmu me mak taxe okwe. Ero wa kehtoponhîrî komo yekatîmyataw reha kîwya so, ahsîpînketaw marha kîpînîn yaw so cehtopo n̂enpesî Kaan kîwya so.

14 Tawake xa taxe twerî kexitaw so Kporin komo poko. Kropotarî komo ceipamnon̂e me kexitaw so reha cesemetanmekyaxe tak okwe.

15 Ahwora ro mak naxe yupurantamnî komo kicicme exitaw kayaritomon komo. Reaw wara rma nasî noro yipu kayaritomo, tmayan̂em wara. Uhsu wara marha nasî, keska xatî wara kopi.

16 On wara naxe kayaritomo komo, yuhnari yîhtînon̂e pîn komo, tmaywen komo nantometîkexe ro mak okwe iyopo so ro mak. Anarî komo reha cemyawno komo yepamnotopo ponarono me mak cexi xera ro mak naxe. Ero wa cexirî ke so pahkî naxe kayaritomo me okre.

17 On wara na nai waihkano rin̂enho, tawsîn̂em yaan̂e wara nasî miya roro ewtarî imo yaka. Noro yipu yakronomara ro mak cexpore nasî.

18 On wara naxe, Kicicitho mîkro, kacho pîn komo, Kaan nukurunperî me naxe. Cetanwesom komo reha n̂epîrkexe ponan̂e rma.

19 Tînahke roro taxe kmararîn komo poko roro kexitaw so. Ero pîntho pokono komo reha naxe yînapumnî me roro okwe, emyawnomnî me roro marha.

20 Kporin komo nakronomarî me xa naxe Noro pona enîn̂e komo. Anarî komo reha yohno ro mak cemyawno yepamno xe naxe. Noro yipu komo panaretopo watohra ro mak nasî Kporin komo.

21 Cemyawnoyem komo ponaro mak naxe anarî komo, emyawnomnî komo ponarora. Kicicme taxe ero wara kexitaw so. Kpanatanmetopo yewetîn̂e pîn me men naxe anarî komo tuuru yahsîtome mak okwe.

22 On wara naxe cemyawno poko tamen̂em komo, yohno cemyawno yepamno xe mak naxe. Mesemetanmekyasî tak men amn̂e okwe, kacho ponarora ro mak naxe okwe.

23 Kicicme exitaw kpoyino komo tîtwermapore nasî. Ero yinhîrî, pahkî n̂he exiche, kîîxatî me rma tak nasî yîtwermaxapunhîrî. Kir̂wanî ro amoro okre, kexe mak anarî komo reha kîwya so. Tohnaw mak na ero wa ket okwe. Ero wa kan̂enho xatî pîn me n̂he taxe amn̂e.

24 On wara naxe anarî komo, tîîm yemyawnonho nowyaxe okwe, tînocwan yemyawnonho anarimaw. Kaan yanwekn̂e pîn me rma wasî, kexe rma okwe noro yipu komo. Noro yipu komo naxe kemyawnonhîrî komo yakuhr̂apon̂e komo yakrono me rma.

25 Kyopono me cesehtînosom komo naxe ceseseyusom me kiin̂e me kica. Kporin komo pona enîn̂e me kexitaw so ehn̂ara n̂he taxe kemyawno komo ciitopo poko.

26 Takîhsom ow okre oyanme ro mak, kan̂e me kexitaw so akpîn me rma wa taxe kica. Takîhso kehtopo men̂ekan̂e me kexitaw so reha tukurui so cenmayaxe okre.

27 On wara taxe cesemetanmesom komo wakren̂e me kexitaw so, esemetanmekîn me taxe okre. Cesewyahrusom wara tko naxe anarî komo reha, cesemetanmesom komo yenîn̂e pîn me kica. On wara men kexe poyino komo noro yipu ya, Awîrîma xe kr̂a wasî Kporin komo ya, kexe.

28 Kayaritomo me n̂ehtîkexe anarimaw kicicitho komo rma kica. Ero wa exitaw so n̂eseyamyaxe mak tak maywen komo. Kicicitho komo waipuche reha n̂epamyaxe tak hara kir̂wan kom okre. Ero wa naxe.