27
On wara kahra ehcoko, Ero poko xa wasî amn̂e pahxaxa okre, kahra ehcoko. Ahce poko na matu pahxaxa, yîhtînopîra thakwa maxe okwe.2 Kir̂wan mîk okre, kacowpe anarî komo mak apoko so. Anîhtînorî pîn komo mak kacowpe ero wara. Ow xa kir̂wan, kahra esko amoro rma kica.
3 Nawsînasî toopu, axawa marha. Nawsînasî xa tak akpîn yîrwonataw oko.
4 Kicicme rma re nasî kîrwon, etpînîn yawra kiin̂e mîn kopi. Kaan̂e wara marha nasî kahxi wara, porin wara. Kîwîrîmacho ro me xa tko nasî kipici yewyomacho reha.
5 On wara naxe anarî komo, tpoyino xatî me rma re naxe. Yiixe cehtopo yenpora ro makî tko naxe okwe. Wara n̂he nasî kîtwerman̂e komo kîwya ro so rma.
6 On wara na natu kîîxatî komo rma anarimaw, kîtwermetu so cerewre rma. Ero wara kacho ponaro rma tko cexpore nasî, cerewrem ponaro rma. On wara na natu kîîxatî pîn kom hara, kewcoketu so rma na, cesemîknosom me makî tko kica.
7 Tmaxmike kexitaw so weenu xera rma taxe okyo. Rooma poko reha kexitaw so tîkporem wara rma tahyaxe ahnoro mak, cîmîkno meero.
8 Anarimaw on wara nasî torowo, takowerî yai n̂etar̂asî mooxe. Ero wa xa marha nai tooto hara. Cekenhîrî poi n̂etar̂a anarimaw mooxe okwe.
9 Kahworen̂e me nasî kotoporem, katî. Ero wa xa marha kahworexe so kîîxatî komo mtapotarî kakîhretopo yekatîmyataw kîwya so, tahwore ekatîmyataw okre.
10 Apoyino komo yîpînînkara ehcoko yiixe awehtoponhîrî. Yiixe aamo pen yehtoponho marha yîpînînkara ehcoko. On wara marha ehcoko, awakno mîn yaka tohra ehcoko awahwokacho aweporîche so. Kakronoman̂e me n̂he natu kîmîtwono komo meyeno pîn. Kakronoman̂e mera n̂he natu okwe kakno komo rma mooxe exitaw so okwe.
11 Takîhso men esko okopuci, oyahworen̂e me awehtome okre. Ero wa awexitaw owîrîyakan̂e mtaka weyukyasî. Omumuru yehtopo enko okre, wîîkesî yîwya.
12 On wara naxe tweeno komo, mooxe rma n̂een̂axe cetwîrîmacho komo. Ero ke twerî tak naxe etwîrîmara rma cehtome so. Wara mak cesehtînosom komo reha cexe ero yipu yaka rma cetwîrîmachome thakwa okwe.
13 On wara na mai anarimaw, apurantan na mîmya apoyino ya, emyaka so mak. Amn̂e kepemesî hara, nîîke ha na awya so. Anarî xa hara na nîîke awya so, Moso yîhtînopîra wasî. Wara rma yupurantamra exitaw amn̂e ow xa kepemesî, nîîke. Ero wa kan̂e pononî tko ahsîcoko. Ahyaka so ciicoko. Ero wa xa ehcoko wooxam yepemacho poko ketaw awya, tweeno pîn yepemacho poko ha.
14 On wara na nîîke apoyino tîmîtwono ya, Ai cîw, kir̂wan̂he mai? Awakre xe wasî Kaan ya, nîîke na. Enmaporo rma tko na ero wa nîîke, kar̂pe xa. Ero wa ketaw, Awîrîma xe wasî Kaan ya, kacho wara rma na n̂ence yîmîtwono.
15 Anarimaw tuuna na mokya pahkî. Ero yimaw kîmîn na nîkrokwa, cipicipi nîîke kokmamso ro. Ero wa xa marha nasî kipici mtapotarî ceseseyusom me exitaw. Cipicipi kan̂e wara rma nasî.
16 Noro yipu yîtîtmamnopu xe kexitaw, ocowo yîtîtîren̂e wara rma tasî. Katî yahsîn̂e wara marha tasî, kamorî ke ahsîn̂e wara, kaari ke ahsîn̂e wara. Ero wa tasî noro yipu yîtîtmamnopu xe kexitaw, kipic ha.
17 Pehu ciixapu me nasî maria. Pehu ciixapu me marha nasî kîrîkîrî maria yohtotopo. Pehu rma nasî pehu yohtotopo me. Ero wara xa marha nasî kakrono komo, kewru komo yohton̂e wara naxe okre.
18 On wara nai piiku yepu ke tînatkem, atketaw roro osom ya, eperîrî nahyasî noro amn̂e. Ero wa xa marha taxe kîwyam hara kantoman̂e komo ponarono me roro kexitaw so, Kanton mexan mîkro, kacho me xa tak taxe amn̂e.
19 On wara tasî tuuna rataka een̂ataw, kewru yekatî rma ceen̂asî. Ero wa xa marha kehtopo ceen̂asî kropotaw.
20 Copoyi exihra ro mak nasî kwaihtopo komo, ewtarî imo kom ha. Ero wa xa marha nasî kewru komo. Erepotan me ro mak nas okwe kewru komo.
21 Prata yosom yaw nasî yukuitopo, prata yen ha. Ooru yosom yaw marha nasî yukuitopo, wehto yen. Ero wa xa marha nasî kir̂wan me kehtopo yenpon̂e. Kir̂wanî ro mîkro okre, ketaw kpoko so anarî komo, ero wa kacho nasî kir̂wan̂he kehtopo yenpon̂e me xa.
22 Ahce wa nai akpîn noro yar̂metaw aaku yaka? Ero yaw na taposoketu oko puruma yatho yakro rma. Aposokache iito rma tko nasî akpîn me ehtopo etowra rma.
23 Awoh komo men encoko roro takîhso. Ero wa oper̂a encoko, paaka marha.
24 Eroromerono pîn mîn kupurantan. Koh komo marha eroromero exihra nasî. Miya rorono me kayaritomo me exihra marha naxe kayaritomo yepamtho kom hara.
25 Cuupu yîhkotoche paaka nahrî me yaxan me tak natîkwas hara. Îh pono meero nîhkocexe cuupu yenmetome. Ero wara awoh komo nahrî ponaro ehcoko.
26 Ero ponaro awexitaw so oper̂a poci tak nai ahyaw aponon komo me. Boce poko marha mîwarawanwaxe amararîn komo yepetho yahsîtome.
27 Kabra mownu marha tak nasî awokru komo me, ahyawno komo wokru me marha. Apici maywen komo wokru marha nasî, emasî komo wokru. Ero wa maxe twokye so awoh komo yenîn̂e me roro awexitaw so.