Taa, on wara wîîkes hara awya so, Anarme ro mak ceen̂asî n̂eepe kaamo yimaw mokyataw kopi. Ero wa xa marha tuuna ceen̂as hara knatîrî yeperîrî yenmetopo yimaw mokyataw okwe. Ero wa xa marha anarme ro mak cencexe, Takîhsom mîkro okre, kacho akpîn poko kica.

2 Miya so n̂etar̂asî torowo pahkî etahsîra. Ero wa xa marha n̂etar̂asî cor̂or̂wa. Ero wa xa marha nasî erem. Kicicme ehtopo kom yanmera ro mak eremkano riyataw erewra ro mak nasî erem.

3 Ososwa nasî kawaru yîhyotopo me. Ewnarî mici nasî buhu yaatopo me. Amoyici reha nasî akpîn komo maxkatapacho me.

4 Akpîn me apoyino komo yeen̂ataw awya so noro yipu eikura ehcoko akpîra xa marha. Akpîn me eyukyataw noro wara xa marha tak na mehtîketu amyamro hara kica.

5 Anarimaw akpîn wara rma tko eyuhcoko akpînî mtapotarî. Ero wa eyuhcoko, Takîhso ow ham okre, kahra ro mak ehtome noro awentache so.

6 On wara taxe akpîn yen̂epetaw kîmtapotarî yekatîmn̂e me, kîhtarî yîhkoton̂e wara rma taxe oko, kmasmacho yeen̂e wara marha taxe okwe.

7 Anarimaw na kakîhretopo poko nîmtapowatu akpîn komo rma kopi. Ero wa yîmtapowataw so yîhrepun wara naxe okwe. Ecehton̂e pîn me mak nasî noro yipu yîhrepu okwe. Ero wara rma naxe akpîn komo, kakîhretopo poko yîmtapowataw kica.

8 Ahce wa tai tohkarara yimiyataw ar̂macho yen yaka, tawyockem yaka? Ero wa xa marha tasî, Takîhsom amoro okre, ketaw akpîn ya.

9 On wara nai wenîmxapu anarimaw, cekyekyem na nahsîya, amorî natpes oko. Ero wa xa marha cencexe akpînî mtapotarî kakîhretopo yekatîmyataw kica.

10 Kyopono ro mak Mîkî Kaan. Mîn hak yakîhton̂e Mîk ahnoro. Noro rma n̂epemesî akpîn komo, tanwekn̂e komo marha.

11 On wara nasî xapari, twenarîthîrî rma nahyas hara kica. Ero wa xa marha nasî akpîn. Akpîra ehxapunhîrî kir̂wan̂he tak nai hara. Ero yinhîrî tak akpîra nasî xa hara kica.

12 On wara nasî, Takîhsom ow ha, kan̂e, n̂etwîrîmetîkesî ro mak akpîn yopo okwe.

13 On wara kexe tuwun̂urem komo, Mînto nasî kopi reaw esama yaw. Ewto roron po rma wa nasî kopi, kexe kica.

14 On wara nasî mîîmo metatan, n̂etaknamesî etahsîtopo poko. Ero wa xa marha n̂etaknamexe tuwun̂urem komo tîkaman komo po.

15 On wara marha naxe tuwun̂urem komo, tuuru nukpexe ha re tamorî ke so. Pokexe takî tko tîmtaka so ciitopo poko hara.

16 Takîhsom xa ow ha, kexe tuwun̂urem komo. 7 komo yopono me n̂esen̂axe, takîhso keyukn̂e komo yopo.

17 Ahce wa tai xapari yahsîche panarî poko oko? Ero wa xa marha naxe cetanwesom komo yari tîtosom. Tînîhtînorî pîn poko rma n̂etanwekyasî kopi.

18-19 Ahce wa ceen̂atu kpoyino tîmtawaimamsom me cehsom kopi, wehto ke poturem nar̂me kwece so, waiwî marha nar̂me kwece so kwaihkachome so oko? Ero wa xa marha cenpore nasî tîmîtwono komo yemîknon̂e kica. Emîknopuche on wara nîîke, Ketaporew mak, nîîke ha na kica. Ero wara kan̂e komo kicicme naxe.

20 Kamerî yecahtîkache n̂eseikesî thakwa wehto. Ero wa xa marha tohnaw kekatîmn̂e exihra exitaw, cetanwesomînhîrî komo tak nîtîtmamyaxe.

21 Ahce wa nai yixirorî ciriche wehto roron pona? Ahce wa nai weewe ciriche wehto pona? Ero wa xa marha nasî kîmtaka kanwekn̂e ro. Ceseisom komo wakpamnon̂e me mak nasî kica.

22 On wara nasî kpoko tîmtapotaxmu mtapotarî, wooto wara rma nasî wahra so yîknoxapu wara. Kropotaka tîtosom me nasî. Ero wa xa marha nasî kpoko so tîmtapotaxmu mtapotarî, kropotaka so ces oko.

23 On wara na nai tahrem anarimaw, er̂mo kahxapu, tîspomaxi nai prata ke, tusmuyem ke rma ha tko kica. Ero wa xa marha naxe anarî komo, kir̂wan̂he ro mak nîmtapowaxe kakro so. Cemaro tko n̂iir̂asî tîropotaka so kica.

24 On wara naxe kîîxatî pîn komo, kir̂wan̂he rma re nîmtapowaxe tohnaw ro makî tko kica. Cemaro mak n̂epamnoyaxe tîropotaw so kica.

25 Tawakem wara rma na re nîmtapowatu noro yipu komo awakro so. Ero wa yîmtapowataw so ewetîra ehcoko. Anarmerpa nasî kicicme ro mak ehtopo komo yîropotaw so, 7 ha.

26 Kîîxatî pîn me n̂examro yehtopo nasî ceyamso kîîxatî wara yîmtapotarî komo ke. Kicicme ehtopo komo rma tko n̂esenpesî amn̂e poyino komo ya, ahnoro esenmexapu komo ya.

27 On wara naxe okwe ewtarî yahton̂enho komo, tînahtothîrî yaka rma n̂epîrkexe okwe. Ero wa xa marha naxe toopu yîhmaman̂enho komo, yaw xa marha mokyas hara yînîhmamathîrî komo iipo so hara oko.

28 On wara naxe cemarontaxmu komo, yîwîrîmano n̂iir̂axe tîcemaron komo ke rma okwe. Tînwîrîmathîrî komo xatî pîn me ro mak naxe okwe. Kîwîrîmexe so marha okwe kpoyino komo mtapotarî tohnaw mak yîmtapowataw so, Kir̂wan amoro okre, ketaw kpoko so. Ero wara kîwîrîmexe so okwe.