Taa, Saromaw mtapotarî rma tan wekatîmyas awya so kakîhretopo komo rma. Esekias maywen komo nmewretho tan Saromaw karitan yawno rma. Xuta yepamtho komo kayaritomon mîk xakn̂e Esekias pen.

2 On wara nasî Kaan, mîn hak yekatîmtîkara nasî tînîhtînorî rma. Kir̂wan̂he nasî ero wara. Ero warahra reha naxe kayaritomo komo, kir̂wan̂he cehtopo komo reha n̂enpexe noro yipu komo ekatîmnînhîrî yentatîkarî ke tmaywen komo yehtoponho.

3 Kaw xa nasî kaapu, entîkarî yopo ro mak. Tuhn̂e xa nasî roowo hara atumnaka roro enîrî yarohra marha. Ero wa xa marha nasî kayaritomo komo yesehtînotopo, yîhtînorî yarohra ro mak nasî anarî komo ya.

4 Prata nai tukuipore yusmunthîrî yowtome. Yusmunkache tak prata yenporin̂e komo tak n̂iir̂axe poroku me okre.

5 Ero wa xa marha kicicitho komo naxe cen̂epepore kayaritomo yakro cesentaxmunhîrî komo. En̂epeche so, Kir̂wan xa mîk okre, kacho me tak n̂ehtîkes okre kayaritomo tmaywen komo ya.

6 Ow xa takîhsom anarî komo yopo, kan̂e wara esenpora ehcoko kayaritomo ya. Kayaritomo yakro cesentaxmu me ecirira ehcoko awanme ro so kyam mak.

7 Ero wa ecirira awexitaw on wara na nîîke kayaritomo awya, Xiya amok ha omîtkoso n̂he, nîîke na. Ero wa ketaw awya tawake xa masî. Ahwora men mas okwe on wara ketaw reha awya, Miya n̂he etoko amoro mooxe n̂he ohyai, ketaw awya. Ero wa ketaw awya kayaritomo, camkîno me tak mesenpes okwe an̂enîthîrî ya, antomano rin̂e ya.

8 On wara marha wîîkes awya so, Ponan̂e rma apoyino komo en̂ekapora ehcoko en̂ekan̂e ro ya. Yohno en̂ekapetaw awya so ahce wa na mat amn̂e? Camkîno me na awenpe anarimaw kopi. Ero ke ahce wa tak mai ero yimaw kopi?

9 Awemetanmekn̂e me apoyino yeen̂ataw awya en̂ekakî amoro mak cewn̂e. Apoyino yehtoponho ekatîmra esko anarî komo ya.

10 Ehtoponhîrî yekatîmche anarî komo ya entan̂enhîrî na awîrîyake. Kicicitho me tîmtapotaxmu me tak ahtînoyaxe so miyan komo rma okwe.

11 Kir̂wan̂he xa nasî kîmtapotarî takîhso kîmtapowataw, orosî warai wara nasî, ooru ciixapu wara okre. Prata yaka ciixapu wara rma nasî.

12 On wara marha nasî takîhsomu mtapotarî kewetîn̂e yîtwermetaw, kpanatarîn wara nasî, ooru ciixapu wara okre. Kporokru wara marha nas ooru ciixapu wara, kir̂wanî ro wara.

13 Tahwore taxe twotme enmayataw knatîrî yeperîrî yenmetopo me exitaw. N̂eepe meero tpoxwe tîhtînoyaxe ero yimaw tmohsom. Ero wa xa marha tahwore taxe kîmtapotarî yekatîmn̂e poko. Yaaro ekatîmn̂e me exitaw kîmtapotarî yekatîmn̂e tahwore taxe en̂epen̂enhîrî komo.

14 Anarimaw so tuuna yewru ken̂e nasî kaapu, nocowonasî marha. Tuuna tko mokuhra nas okwe. Ero wara xa marha nasî tohnaw tîmtapotaxmu. On wîmyas amn̂e awya, kesî tohnaw ro mak okwe.

15 On wara na matu anarimaw, tahwore na mîmtapowatu kayaritomo yakro, emapona roro marha na mîmtapowatu, N̂ex ha, kahra rma na matu. Ero wa amtapowataw so pahkî awewecatu so tak na. Yamoro tîmtapotaxmu me exitaw an̂uru komo iyochîrî yaxikwon̂e wara mas okre.

16 Weenu na meen̂e? Taa, awecenarî mak emeko. Ayopo xa emeche ero rma na marîrke hara kica.

17 Amn̂e xa so mak etoko apoyino yaka. Emapona roro awcetaw poke ha na okwe noro awenîrî ro ya. Ero yanme aaxatî pîn me tak na nai okwe.

18 On wara taxe okwe kpoyino komo yehtoponho yekatîmyataw tohnawno, watma ke etapan̂e wara taxe oko, kacipara imo ke aman̂e wara marha, waiwî ke twon̂e wara marha taxe, tpotkem ke ha. Ero wara taxe oko tohnaw ekatîmyataw kpoyino komo yehtoponho.

19 On wara taxe anarimaw, cesemetanmekyatu na okwe. Ero yimaw kpoyino pona na ceen̂atu kakronomachome. Kemîknoya makî tko na noro okwe kakronomara rma. Ero wa exitaw kpoyino, kyorî wara rma nasî, mataxapu wara. N̂erewas oko. Kîhtarî wara marha nasî etaxikwoxapu wara. Ero wa nasî kpoyino kemîknon̂e me exitaw.

20 Ahce wa na tai kponon mohkache twotme exitaw, yîmkarino mohkache ha? Ahce wa nai kawawano yarketaw salitîre pore? Ero wa xa marha tasî waano yaar̂ataw ahwokaxapu n̂entarî me.

21 Taa, on wara cexpore nasî aaxatî pîn pooko, yîromanataw thakwa yînahmacoko. Twokru xe exitaw so marha wokpacoko. Ero wa wakrecoko aaxatî pîn komo.

22 Ero wa wakretaw awya so wehto roron ciin̂e wara maxe yîhtîpîrî pona. Noro yipu wakretoponho yepetho tak nîmyas amn̂e Kporin komo awya so.

23 On wara wîîkes awya so, ocowo mokyataw nohce n̂ixa tuuna marha mokyasî. Ero wa xa marha nasî kpoyino komo, yîmtaka eyuhtîketaw kîwya so cewîrwoxe tak nasî.

24 Tahwore tasî tîmîye kexitaw kipici yakro. Kein̂e me exitaw tko kipici ahwora ro mak tas okwe. Wara n̂he re tasî amtakpo ciki ciir̂ataw mîîmo kanahtaka mak. Tahwore n̂he tasî iito mak kexitaw cewyaro.

25 Kekar̂katîkache tpoxwe tak ceer̂asî tuuna twotmem. Ero wa xa marha kn̂entarî mexe xa nasî kyanan komo yekaci meyeno komo yekaci. Kir̂wan̂he exitaw so tpoxwe cencesî ekaci komo.

26 On wara na natu anarimaw tuuna ka tîtosom komo, tuuna pîtho mak napikyatu kica. Anarimaw kusmun ke tîwîrîmaxi na nai kica ahtoxapu marha tuuna. Ero wa xa marha nasî kir̂wanînhîrî, kicicitho yanme cemacaketaw tak okwe.

27 Kir̂wan̂he exihra nasî mer̂pora ween yemerî. On wara marha taxe, Kyopono xa ow ha, kan̂e me kexitaw. Kyopono me exihra rma taxe okwe.

28 Ahwora ceen̂asî ewtotho cemacakaxi exitaw mîîmotho mko, wacamra exitaw marha ewtotho. Ero wa xa marha tasî kîw hara kekatî yantoman̂e mera kexitaw so kica. Ero wa tasî.