On wara marha wîîkesî, awakîretopo komo rma tan wekatîmyas awya so, pohnîmra ro mak ehcoko kicicitho komo poko. N̂examro yakrono me oyexi xe wasî, kahra ro mak ehcoko.

2 Etapano ritopo ponarono komo mîkyam okwe, emetanmekno ritopo poko tîmtapotaxmu komo marha okwe.

3 Taa, ahce wa kexitaw so mîîmo cicir̂atu? Takîhso kexitaw so mak mîîmo cicir̂axe. Yuhnari yîhtînon̂e me kexitaw so marha emacakan me nas okre.

4 Mîn hak poko ehcamhokaxapu me kexitaw so mer̂pora n̂he nasî kemyawno komo kîmîn yamtakponî mko yaw. Kir̂wanî mko tak nas iito cepethîkem ha.

5 Taa, ahce wa natu takîhsom komo? Karitî komo xa mîkyam. Kar̂pe cehsom marha mîkyam, mîn hak poko ehcamhokaxapu komo.

6 Sowtatu komo yarî xe awexitaw so aaxatî pîn komo yakro etar̂maxi takîhsom komo mtapotarî yaw roro mak tîtopore nasî. Mer̂pora exitaw takîhsom komo, awakro so cesentaxmu komo, awaparî me cehsom komo yopono me maxe ha.

7 Ahce wa natu akpîn komo takîhsom komo mtapotarî yencetaw? Epore so mak ces okwe yîmtapotarî komo. Ewto potaw so yîmtapotara naxe akpîn komo.

8 On wara naxe anarî komo, emetanmekno rirî poko n̂esehtînoyaxe. Ero ke on wara kacho me naxe noro yipu komo, Kicicitho poko cesehtînosom, kacho me naxe kica.

9 Ero poko kyam wasî, ketaw kîwya so ero pîntho poko, kicicme kehtopo komo me rma nasî kica. Ero pîntho wara tpanatanmetopo yentan̂e marha nasî poxumra ro mak tooto komo ya.

10 On wara na mîîketu anarimaw awesemetanmekyataw so, Oyopo xa thakwa nasî oyesemetanmetopo okwe, mîîketu na. Ero wa ketaw awya so kar̂pen me mak maxe okwe.

11 Taa, on wara na matu anarimaw, twaihkaxmu komo na meen̂a, waihkaxi aar̂ataw so rma na meen̂a. Noro yipu yeen̂ataw awya so porohkacoko. Epîrkaporono wara mak na cee twaihkacho yaka. Noro yipu komo wahkotocoko twaihkacho komo yaka tohra tak ehtome so.

12 On wara na mîîketu, Waihkacho yaka taasom mîk, kacho yentara ro mak amna xakn̂e okwe. Ero ke porohkara thakwa amna xakn̂e, mîîketu na. Awehtopo komo yenîhra ma nai awya so aropotarî komo yukuknoman̂e? Awehtopo yenîn̂e pîn me ma nai awya so Noro waipîra aweceton̂e kom ha? Yuhnari xa awehtopo komo wa n̂een̂as ha Kporin komo rma. Noro men awepemexe so amn̂e ahce wa na awehtoponhîrî komo yecenarî xa.

13 On wara marha wîîkes awya okopuci, ween emeko, kir̂wan̂he exirî ke. Ween yamicho marha emeko, tîkpore nas okre.

14 Ero wara xa marha nasî takîhso kehtopo kom hara, tpoxwe nasî aropotaw. Ero wa awehtopo ponaro awexitaw kir̂wan̂he mas amn̂e. Ehn̂ara tak masî. Ero wara oyexi xe xa was amn̂e, kacho poko ehn̂ara masî.

15 On wara wîîkes awya so kicicitho komo ya hara, kir̂wan komo mîn wapantora ehcoko. Noro yipu mîn yawno arîhra marha ehcoko.

16 On wara na natu takîhsom komo, emapona n̂esemetanmekyatu, 7 ro ha na. Tahwokache roro so tko nahwowaxe hara okre. Ero warahra reha naxe kicicitho komo, tahwokache so ahwotan me mak naxe hara okwe.

17 Ahwotara ro makî tko ehcoko aaxatî pîn komo yesemetanmekyataw so. Tawake exihra ehcoko noro yipu komo exitaw ehrokaxapu wara.

18 Awya kr̂a ha tî, kan̂e me awexitaw so tko noro yipu komo poko Kporin komo n̂enîrî mexera men maxe okwe. Ero wa awexirî komo yanme rma na n̂etîrwoxinke hara esemetanmexapunhîrî poko.

19 On wara marha kahra ehcoko kicicitho komo poko, N̂examro cma naxe cemyawnoi xa okre, kahra ehcoko. Kicicitho komo poko pohnîmra ro mak ehcoko.

20 Tahwore xa was amn̂e, kacho ken̂ehra ro makî tko naxe noro yipu amn̂e okwe. Kporin komo rma n̂examro weyutho n̂eihkesî.

21 On wara xa esko okopuci, twerî esko Kporin komo poko. Akayaritomon poko marha twerî esko. Anarmerpa cesehtînosom komo yakrono me tko exihra esko.

22 Noro yipu komo n̂etwîrîmexe ponan̂e rma okwe. Kporin komo rma n̂emetanmekya. Kayaritomo komo marha na n̂emetanmekya. Ahce warai ke na noro yipu komo nîwîrîmetu n̂examro asakno roro rma.

23 On wara marha wîîkes awya awakîretopo, anarimaw on wara naxe en̂ekano rin̂e komo, kicicitho komo yen̂ekara rma naxe okwe. Anarî komo reha n̂en̂ekexe cerewre okwe. Etîme re en̂ekano cirihra tko naxe kica. Kir̂wan̂he exihra ro mak naxe etîme rehra en̂ekano rin̂e komo.

24 On wara kexe anarî kom hara, en̂ekano rin̂e komo, kicicitho komo ya rma kexe, Kir̂wan amoro okre, kexe kica. On wara kexe poyino komo rma ero wa kan̂e ya, Awîrîma xe wasî Kporin komo ya, kexe. Yiixera ro mak naxe amn̂e mîk hak rowon pono komo.

25 Kir̂wan̂he rma tko naxe anarî kom hara en̂ekano rin̂e komo. Kicicme ro mak masî kica, kexe kicicitho komo ya rma. Ero wa kan̂e komo tak naxe tahwore amn̂e. Kaanî rma noro yipu komo nakronomes okre.

26 Kewcokan̂e wara rma nasî kpoyino takîhso xa keyukyataw.

27 On wara cexpore nasî awesekenmetaw so, katpanawno poko ka ehcoko, amararîn komo marha ka ciicoko. Ero yinhîrî tak amîn ciicoko hara.

28 Tohnaw ekatîmra ehcoko apoyino yehtoponho, kicicme ehtoponhîrî wara ekatîmra ehcoko. Cemarontara men ehcoko amtarî ke.

29 On wara marha kahra ehcoko, Opoko cemarontai kica. Ero ke kesepanîyasî hara, kahra ehcoko. Owîrîman̂enho mîkî. Ero ke noro makîrha tak wîwîrîmes hara, kahra marha ehcoko.

30 Taa, on wara wîxakn̂e kokon̂oro, tuwun̂urem mararîn yemyatî poko kîwcekn̂e, yuhnari yîhtînon̂e pîn mîk noro mararîn yemyatî poko kîwcekn̂e.

31 Peen ken̂e ro mak xakn̂e okwe. Cekyekyem ken̂e xakn̂e okwe. Mararî wacantho xakn̂e cixkaxi okwe toopu ciixaputho.

32 Ero yipu yenîche takîhso kesehtînoyakn̂e. Oyakîretopo me ween̂akn̂e.

33 On wara kexe tuwun̂urem komo, Yohno makî ka kîwînîkyasî. Ketakriyasî ka yohno mak oyepokaretome n̂he, kexe kica.

34 Ero wa kan̂e me awexitaw okopuci, awepor̂asî men emyawnomra awehtopo. Cen̂epan̂em wara rma mokyasî. Tuwuhrekem wara mokyasî awesemetanmetopo okwe. Ero wa men mas amn̂e.