Taa, apanatanmetopo komo rma tan wekatîmyasî. On wara wîîkes hara awya so, anarimaw kayaritomo yakro na meseresmetu. Noro yipu yakro aweseresmetaw so twerî men eseresmacoko.

2 Ayopo ceseresmaxmu ro me awexitaw mariya cirko awexenaka awexe yîhkototopo wara.

3 Epohkara ro mak men esko yînahrî poko. Tpoxwe rma re nai. Cesemîknosom me makî tko nas okwe. Ero wa men nasî.

4 On wara marha wîîkes awya so, cekar̂kaxi ro ekaritora ehcoko awemyawno komo yepamnotopo poko. On wara kacoko aropotaw so, Ero yipu poko ponaro xa exihra cexpore nai, kacoko.

5 Ahce kacho cehcamnosomtho ponaro mehtîketu? Tapokem wara nasî kupurantanthîrî komo. Yaimo wara men nasî kaikokoro tîtosom wara. Ahyai ro mak cesî apurantanthîrî komo amn̂e kah yakan wara rma.

6 On wara marha wîîkes awya so, tamen̂em nahrî poi apupra men ehcoko. Tpoxwe rma na re nai. Epohkara rma tko ehcoko ero poko.

7 Kicicitho ponaro mak naxe noro yipu komo. Ero ke ero wara rma nasî ehtopo ro komo, kicicitho me. Awya so rma na ketu, Eseresmatamko, ketu. Aaxatî pîn komo me rma tko naxe kica.

8 Anaputhîrî men marîrkes hara okwe. Tawake amtapotachonhîrî marha mukuhresî. Ero wa men masî.

9 On wara marha wîîkes awya so, akpîn komo n̂entarî me yîmtapotara ehcoko. Amtapotachonhîrî komo mak nîwîrîyakexe kica, takîhso amtapotachonhîrî komo rma.

10 Rowonano wokpantho ewyetakara ro mak ehcoko pahxanînhîrî. Yîîm waixapu komo mararîn raconho ahsîra marha ehcoko, en̂etîthîrî meero ahsîra ehcoko.

11 Karitî men Mîk yîîm waixapu komo kurunpen̂e. Noro xa awen̂ekexe so yîîm waixapu komo yanme. Ero wa awen̂ekexe so.

12 On wara wîîkesî xa hara awya so, awakîretopo komo ponaro men ehcoko. Awehcamhokacho komo yentan̂e me marha ehcoko.

13 Rikomo komo panaren̂e me ehcoko, N̂expe mak tanmero, kan̂e pîn me ehcoko. Waipîra rma naxe tmaxkatapacho komo yanme.

14 Maxkatapetaw so awya so kir̂wan̂he xa matko naxe rikomo komo. Wehto imo ywakan me tîtosomînhîrî n̂examro tak mîporokesî maxkatapacho komo ke rma.

15 On wara xa wîîkes awya, okopuci, takîhso exitaw aropotarî tawake nas oropotarî hara, owyanî ro rma.

16 Takîhso tîmtapotaxmu me awexitaw tahwore ro mak wehtîkesî oropotaw okre.

17 Kicicitho komo poko pohnîmra men esko. Kporin komo ponaro xa esko. Kokmamso ro ero wa esko.

18 Ero wara awexitaw kir̂wan̂he rma mas amn̂e eromanhîrî yimaw. Ehn̂ara rma masî, Kir̂wan̂he oyexi xe was amn̂e, kachonho poko.

19 Omtapotarî men entakî okopuci, takîhso tak awehtome. Kporin komo ya kpanatanmetopo yaw roro mak cirko aropotarî etowîn me ro mak. Ero wa men wîîkes awya.

20 On wara marha wîîkes awya, wooku pokono ro komo yakrono me exihra esko. Tîyopo so wooto tonon̂e komo yakrono me marha exihra esko.

21 On wara men naxe amn̂e twenîmsom komo, tîyopo so wooto tonon̂e komo marha, emyawnomra tak n̂ehtîkexe okwe. Wînîkno ken̂e mak awexitaw so etahxaykaxaputho yaw mak tak menmayaxe amn̂e, poonotho yaw.

22 Aamo mtapotarî men entakî, awin̂enhîrî mtapotarî ha. Anocwan yîwîrîyakara marha esko nocwakomo me tak exitaw.

23 Yaarono ahsîko awakîretopo, epethîrî pona rma ahsîko. Tîmîhra tak esko anarî ya epethîrî pona xa hara. Takîhso awehtopo xa ahsîko. Awakîretopo entakî, yuhnari yîhtînon̂e me marha esko.

24 Tawake ro mak nasî kir̂wan yîîm. Nahwowasî xa tîmxîkrî poko takîhso exitaw.

25 Ero ke tawake cirko aamo awehtopo poko, anocwan marha. Tahwore xa cirko yîropotai mewruyakn̂e noro.

26 Aropotarî xa tîmko owya okopuci. Oyehtopo enko takîhso. Ero wa men esko.

27 On wara marha wîîkesî awya wooxam poko, ewtarî wara ro mak nasî wooxam, tweeno pîn, yuhnakan wara. Ahtoxapu wara marha nasî tuuna wara, amtaci wara. Ero wa xa nasî kîîrî pohkan̂e ro wooxam.

28 Waapa wara rma n̂eseyamyaxe noro yipu komo esama yakumyaka. Tînar̂marî komo momokyaxe iito kica. Mer̂pora xa tak n̂ehtîkexe cesemîknosom komo noro yipu komo yanme kica. Noro yipu komo men naxe kica.

29 Taa, anarî poko kîtwermes hara okopuci. Onoke warai komo xa cetwîrîmacho komo chew xa nat awya? Onok warai komo natu ahwora? Onoke warai komo ceseisom me nat hara? Onoke warai komo xa, Okwe okwe, kan̂e me nat hara? Onoke warai komo paraxkaxapu me natu tohnaw mak okwe? Onoke warai komo yewru nai karasasai hara?

30 On wara cehsom komo xa ero wara naxe, pahkî kawaxiyem yeen̂e komo, anarmerpan ke ceskem yeeso tîtosom komo marha, ero warai komo xa naxe ero wara.

31 Kawaxiyem wece enîhra ro mak esko cucure exitaw, twakroi xa exitaw parakwe yaw, apehceme eserpetaw marha.

32 Ero yipu yeer̂ataw awya pahkî, aweskan̂e wara tak nas okoyi wara oko. Okoyi wara ro mak keskan̂e mîn oko.

33 On wara tak mas amn̂e ero yipu yeen̂enho, anarmenî ro mak tak meen̂asî kopi. Kicicitho me marha mîmtapowasî kica.

34 Kanawa imo yaw tîwînsom wara tak masî, tuuna imo kwawno yaw tîwînsom wara. Ocowo yahsîtopo yecepu po cetakrisom wara marha masî, kanahtaka cetakrisom wara rma kopi.

35 On wara mîîkesî kica, Oyetapacow oko, oyeper̂antora rma tko n̂ehcow. Oyetapacow owen̂ekarî rma. Ahcemaw xa kpake hara kawaxiyem yeetome xa hara, mîîkesî kica. Ero wa mîîkesî pahkî kawaxiyem yeen̂enho.