On wara marha wîîkes awya so, tawake na mat ha re mer̂pora ro mak exitaw awemyawno komo, prata, ooru kom ha. Tawake xa matko maxe, Kir̂wan mîkro, kacho me awexitaw so, yaake exitaw so marha aaxatî komo.

2 Etîme re rma naxe cemyawnoyem komo, cesemetanmesom kom ha. Kporin komo nakîhtotho me re naxe. Ero wa naxe.

3 On wara naxe takîhsom komo, mooxe rma cetwîrîmacho komo n̂een̂axe. Ero ke takîhso tak naxe etwîrîmara cehtome so. Cetwîrîmacho komo yenîhra reha naxe okwe camkîno komo. Cexe rma cetwîrîmacho komo cheka rma okwe.

4 Anarî komo xawyakan me cesehtînopore nasî, Kporin komo ponaro marha cexpore nasî. Ero wa kexitaw so kemyawno komo n̂epamyasî, Kir̂wan mîkro okre, kacho me marha taxe, waipîra marha taxe pahkî. Ero wa taxe.

5 Cekyekyem ken̂e xa nasî cetanwesom komo yesamarî, kemcinotopo ken̂e marha nasî. On wara tko naxe tweeno komo, mooxe mak naxe ero yipu yai.

6 Rikomo komo panatanmecoko roro kir̂wan̂he ehtopo komo poko. Ero ke ero wa tpanatanmetoponhîrî komo yai etowra naxe amn̂e tporitomontache so.

7 On wara naxe cemyawnoyem komo, cesemetanmesom komo yantoman̂e wara naxe. Anarimaw cemyawnoyem purantan ka nahsîyaxe poyino komo tîramansom me mak. Ero wa ahsîn̂e komo tko naxe tîmn̂e komo yanton me.

8 On wara naxe anarî komo, kicicme cehtopo komo n̂iir̂axe naatî wara. Ero yipu yeperîrî tak nahsîyaxe amn̂e cetwîrîmacho komo. Emetanmekno ka n̂iir̂axe tîrwon me so oko. Noro yipu komo tko n̂ehn̂exe amn̂e.

9 On wara naxe wakreno rin̂e komo, twakresom me tak naxe n̂examro hara okre. Ero wa naxe yînapumnî komo nahman̂e me cexirî ke so okre.

10 Ahyai so en̂epecoko ero pîntho me tpanatanmetopo yentan̂e komo. Noro yipu komo yen̂epeche aweseseyutopo komo tak nîtîtmamyasî, awetanwecho komo marha, awetwîrîyakacho komo marha. Ero wa kacho tak nîtîtmamyasî noro yipu komo yen̂epeche awya so.

11 On wara naxe anarî komo, kicicitho ken̂ehra ro mak exi xe naxe tîropotarî komo. Tawake tîmtapotaxmu me marha naxe. Ero warai komo naxe kayaritomo yakrono me.

12 Ehcamhokaxapu komo n̂een̂asî Kporin komo ehcamnopîra ehtome yînîhtînorî komo. On wara reha nasî tpona enîn̂e pîn komo poko, yîmtapotarî komo n̂iir̂asî camkîno mtapotarî me rma.

13 On wara kexe tuwun̂urem komo, Reaw na nai mînto katpanaw. Owaike men kopi esama yaw owcetaw, kexe kica.

14 On wara nasî wooxamu mtarî, tweeno pînî mtarî, ewtarî wara nasî yuhnakan wara. Poko Kporin komo rwonîmtopo komo mak n̂epîrkexe ero yipu yaka.

15 Akpîra nasî rikomo komo ropotarî takîhso exihnî me ro mak. Maxkatapacho komo tko n̂en̂epesî akpîra ehtoponhîrî komo mooxe ro mak.

16 On wara naxe anarî komo, cesemetanmesom komo n̂emetanmekyaxe okwe tupurantan komo yepamnotome hara. Anarî komo tupurantan komo nîmyaxe tupurantayem komo ya rma. Ero warai komo n̂epurantanketîkexe amn̂e okwe asakno roro rma. Ero wara naxe okwe.

17 Taa, on wara wîîkesî xa hara awya so okopuci komo, omtapotarî men entacoko, takîhsomu mtapotarî. Awehcamhokacho komo poko tan kîmtapowasî. Ero ke ponaro men ehcoko.

18 Omtapotarî ciriche aropotaka so awerepotanmecho komo me nas okre. Amtaka so marha cicoko omtapotarî an̂ekatîmrî komo me hara.

19 Oroto kpanatanmecow so Kporin komo pona enîn̂e me awehtome so, amyamro xa kpanatanmecow so ero poko.

20 Kir̂wan xa tan mewrew an̂enîrî komo awakîretopo komo, awehcamhokacho komo marha.

21 Ero yipu mewrew yaaro xa tak entachome awya so, ponaro xa awehtome so marha. Ero yipu ponaro awexitaw so takîhso tak meyukyaxe, Owî cma re makîhresî, kan̂e komo awya so.

22 On wara kahra ehcoko, Mîkro yupurantamnî. Noro yemyawnonho kr̂a waatîkesî, kahra ehcoko. Tohnaw en̂ekapora ro mak ehcoko cesemetanmesom komo en̂ekano rin̂e komo ya.

23 Kporin komo rma tko nasî cesemetanmesom yemetanmekn̂enho komo yen̂ekan̂e me hara kopi. Noro rma nasî emyawnonkano rin̂enho komo yemyawnonkan̂e me hara.

24 On wara naxe anarî komo, tîrwon̂em me roro naxe okwe. Noro yipu komo yakrono ro me exihra ehcoko. Miya xe ro mak nîrwonaxe anarî komo. Noro yipu komo yakro tohra ehcoko.

25 Noro yipu komo yakro awcetaw so ehtopo komo poko tak na menpamtîketu okwe. Awemcinotopo me tak nasî noro yipu komo yehtopo.

26 On wara kahra ehcoko apoyino komo purantan yahsîche awemyaka so, Apurantan yîramanpîra oyexitaw amn̂e oyemyawnonho takî mahsîyasî apurantanthîrî yemtaka hara, kahra ehcoko. On wara marha kahra ehcoko apoyino komo ya, Awepethîkan̂enhîrî purantan exihra exitaw ow tak kepemesî noro yemtaka hara, kahra marha ehcoko.

27 Apurantan exihra exitaw yîwya tîmsom akamanî rma na nahsîya cepethîrî me okwe. Ahce kacho ero yipu mahsîpe yîwya?

28 On wara wîîkes hara awya so, tîrowon wokpan na n̂iir̂atken̂e aamo pen komo pahxa. Iito rma exitaw iito rma n̂expe, anana ewyetakara ehcoko.

29 Anarimaw on warai na meen̂atu, takîhso cemyawno ciin̂e ro na meen̂atu. Noro yipu nasî kayaritomo komo yakro cesentaxmu me. Esekaiporen komo yakro cesentaxmu me exihra nasî. Ero wa nasî.