Taa, awakîretopo komo wekatîmyas hara awya so. On wara wîîkes hara awya so, on wara nasî kayaritomo komo ropotarî, Kporin komo naknamarî me mak nasî. Tuuna yepu naknamesî Kporin komo miya, xiya tîhtosom me. Ero wa xa marha kayaritomo komo ropotarî naknames hara tanme ro makî.

2 Takîhsom ow opoyino komo poko, oyemyawno poko marha, tîtkexe cma ha re kîwyam mak. Kporin komo xa matko nukuknomesî kropotarî komo yuhnawno xa.

3 Ahce na tîmyataw Kporin komo ya tpoxwe rma re n̂een̂asî. Ero yopo xa tak tpoxwe nasî yîwya takîhso ciino rin̂e me kehtopo, etîme re ciino rin̂e me kehtopo marha.

4 On wara naxe anarî komo, kyopono wara keen̂axe so kica. Kyopono me marha n̂esehtînoyaxe tîropotaw so. Kicicme tko nasî ero wa ehtopo komo. Kicicme marha nasî kicicitho komo n̂iritho.

5 Kir̂wan̂he n̂esehtînoyaxe cemyaporem komo cemyawno komo poko. Ero ke n̂epamyasî tak noro yipu komo yemyawno. Yohno kyam mak cesehtînosom komo reha n̂esemyawnonkexe mak okwe.

6 On wara naxe anarî komo, tupurantan komo n̂epamnoyaxe tîcemarontarî ke so mak kica. Kaweresî wara rma tko nasî noro yipu komo purantan yohno cehcamnosom me hara okwe. Twaihtopo komo xatî me mak naxe ero wara tupurantan yepamnon̂e komo.

7 Waapa me naxe anarî komo kicicitho kom ha. Ero wa ehtopo komo rma nasî n̂examro yar̂man̂e me. Takîhso ciino ciri xera ro mak naxe. Ero ke waihtopo xa n̂epor̂asî noro yipu komo.

8 On wara naxe kicicme ehxapu komo, anarme ro mak nasî ehtopo komo kica. Kicicme exihnî komo reha naxe takîhso ciino rin̂e me roro.

9 Tawake tasî tîmîye kexitaw kipici yakro. Kein̂e me tko exitaw kipici ahwora ro mak tas okwe. Wara n̂he re tasî amtakpo ciki ciir̂ataw mîîmo kanahtaka mak. Tawake n̂he tasî iito mak kexitaw cewyaro.

10 On wara naxe kicicitho komo tîropotaw so, yîwîrîmano ciri xe mak naxe kica. Kir̂wan mîkro, kahra ro mak naxe tpoyino komo poko okwe.

11 Anarimaw so ero pîntho me tpanatanmetopo yentan̂e komo panaresî Kporin komo. N̂examro panarecho yencetaw tak camkîno komo tak nakîhyaxe. Takîhsom komo marha n̂encexe takîhrecho. Ero yencetaw n̂ehcamhoketîkexe tak okre.

12 Kir̂wanî ro xa Mîkî Kaan. Ero ke kicicitho komo mîn n̂een̂asî. Noro yipu komo nîwîrîmesî kicicme exirî komo yanme.

13 On wara kexe yupurantamnî komo anarimaw so, Amna n̂esemetanmekyasî ro mak okwe, kexe. Ero wa kacho yentan̂e pîn wara kexitaw so, kîwyam makîrha tak tîtkexe amn̂e ero wara xa marha. Entan me thakwa tîtkexe okwe.

14 Anarimaw na nîrwona kpoyino kpoko so. Noro yipu rma tko na n̂etîrwoxinke kpoko so cepethîkem tîmîche yîwya en̂epa me. Ero wa tîmpore nasî kpoko so yîrwonîmxapunhîrî yetîrwoxinkachome.

15 Tahwore naxe takîhsom komo yaaro ciino riyataw tîwya so. N̂eraswaxe tko kicicme ehxapu komo reha ero wara ciino ritopo yencetaw.

16 On wara naxe anarî komo, yuhnari yîhtînon̂enhîrî tak n̂etowyaxe hara okwe. Ero wara exiche so waixapu komo chewno me tak naxe okwe.

17 On wara naxe anarî komo, ceseman̂ipu xe mak naxe kica. Ero wa cexitaw so emyawnomra thakwa n̂ehtîkexe okwe. Wooku xatî me naxe anarî kom hara, katî xatî me marha. Ero wara cexirî ke so tupurantai ehtîkara thakwa naxe okwe.

18 Anarimaw so kicicitho komo nîmyasî Kaan kir̂wan komo yepetho me. Ero wa xa marha cesemîknosom komo nîmyasî kir̂wan komo yepetho me.

19 Ahwora rma na tatu pohnîntawno me kexitaw so. Ahwora xa takî taxe ceseseyusom me exitaw kipici komo okwe, tîrwon̂em me exitaw marha.

20 Takîhso cehsom komo mîn yaw nasî emyawno komo, cepethîkem. Katî marha nasî yîmîn yaw so. Ero warahra reha naxe akpîn komo, cemyawnonhîrî komo mak nukuhrexe noro yipu kom okwe.

21 On wara naxe anarî komo, kir̂wan̂he cexi xe so naxe, etpînîn yawno me cexi xe so marha naxe. Ero wa cexi xatî komo tak nahsîyaxe waipîra cehtopo komo, kir̂wan me cehtopo komo marha. Takîhsom me cekaiporesom me marha naxe okre. Ero wara cehtopo komo nahsîyaxe.

22 On wara naxe takîhso cehsom komo karitî komo yewton waparî me cetaw so, wacanthîrî komo macakexe yahcononhîrî rma. Macakanî ro mak on waaca, kachonho rma macakexe.

23 On wara naxe twerî mak tîmtapotaxmu komo, etwîrîmara n̂he naxe okre.

24 On wara naxe anarî komo, kanwekn̂e me naxe kyopono me cesehtînorî ke so. On wara nasî noro yipu yosotî, Ero pîntho me tpanatanmetopo yentan̂e, kacho me. Tpoyino komo yopono me cesenpo xe naxe. Cetanwesom me marha nîmtapowaxe. Ero wa naxe kica noro yipu komo.

25 On wara naxe tuwun̂urem komo, mîn hak xe ehtopo komo rma nasî waihkan̂e komo me okwe. Etapickara thakwa nasî amorî komo.

26 Kaamo poko mak mîn hak xe cehtopo komo ponaro mak naxe noro yipu kom okwe. Ero warahra naxe kir̂wan komo reha. Wakreno n̂iir̂axe noro yipu komo amemra ro mak.

27 On wara nasî Kporin komo kicicitho komo nîmîtho poko, kicicme ro mak n̂een̂asî. Anarimaw Kaan ya tîmsom nîmyaxe kicicme cehtopo komo yahrutopo me rma kica. Ero wa tîmyataw kicicme xa tak n̂een̂asî yînmîthîrî Kporin komo.

28 Waihyasî tak men okwe tpoyino ponanîmton̂enho, tohnaw ponan̂imton̂enho ha. Noro yipu mtapotarî yentan̂e komo tko nîmtapowaxe miya roro okwe.

29 Etîxatî pîn me rma n̂esenpexe kicicitho komo. Kir̂wan komo reha men̂ekexe cehtopo komo.

30 On wara na ketu anarî komo, Yaaro xa kesehtînoyasî Kporin komo yehn̂anmetopo poko, yuhnari marha kesehtînoyasî ero poko, tooto komo yakro marha kesencesî ero poko, nîîke ha na. Pîra ro mak, Noro yehn̂anmetopo exihra ro mak nasî.

31 Kawaru n̂enpamnoyaxe sowtatu komo waapa me totopo poko. Kporin komo yanme mak xa yo nasî waapa yopono me kehtopo. Ero wa nasî.