Taa, apanatanmetopo komo rma wekatîmyas awya so. On wara wîîkes hara, kpoko so cetaporesom warai mîn kawaxiyem. Miya xe ro mak kîrwonmekn̂e mîn kica, kewkukman̂e marha. Akpîra men taxe okwe ero yipu ya kewkukmapetaw so kica.

2 On wara nasî kayaritomo tîrwonîmîche, tmayan̂em wara nasî kopi reaw wara. Noro yipu yîrwonmekyataw kîwya so cetwaikaposom me rma taxe kanme ro so rma.

3 Takîhsom mîkro, kacho me taxe kîtîtmamyataw so eseseyuxapunhîrî. Akpin komo rma n̂ihciyaxe keseseyutopo apehceme rma.

4 On wara naxe tuwun̂urem komo, tmararîn komo pomohra naxe twotme exitaw. Ero ke tînatîrî komo yeperîrî yenmekyataw poyino komo ya, Onahrî cma re, kexe thakwa yîwya so. Yînapumnî me mak naxe okwe. Ero wara naxe tuwun̂urem komo okwe.

5 Tuuna wara nasî kakîhren̂e komo mtapotarî, yuhnawno wara. Yîropotaw so makî ka nasî. Yuhnari yîhtînon̂e komo tko naxe anîmn̂e me hara.

6 Mer̂pora ro mak naxe, Kir̂wanî ro ow ha, kan̂e kom ha. Enîhra n̂he taxe okwe yaaro mak cehtopo yekatîmn̂e komo reha.

7 Kir̂wan̂he roro naxe takîhsom komo. Noro yipu pen komo waipuche Kaanî nakronomarî me rma naxe yîmxîkîthîrî kom hara.

8 On wara naxe kayaritomo komo en̂ekano riyataw tîwya so, kicicme tmaywen komo yehtopo yen̂epen̂e me naxe cewru komo ke.

9 Onoke thakwa re nîîke on wara, Oropotarî tak wakir̂wamai owî rma? Towtîkaxi tak nasî kicicme oyehtoponho, nîîke onoke thakwa re?

10 On wara naxe anarî komo, twarawantaxmu komo, anarmen nasî yîhyaw so tîmsom yawsîn yukuknomacho, porin me ehtopo yukuknomacho marha. Ero warai exitaw yîhyaw so kicicme ro mak nasî Kporin komo ya.

11 Rikomo komo yehtopo meero n̂esenpesî ahce wa na ciino ritopo ke yîwya. Kicicitho ken̂ehra exitaw so, takîhso exitaw so marha ero wara ehtopo komo n̂esenpesî.

12 Onoke nakîhcekn̂e kpanarî komo, entacho kîwya so? Onoke nakîhcekn̂e kewru kom hara, entopo kîwya so? Kporin komo xa Mîk ero yipu yakîhton̂enho, asakno roro rma.

13 Awînîknon komo poxunkacoko n̂he. Tpoxwe xa exitaw awya so emyawnomra tak men mehtîkexe okwe. Apakacoko n̂he turke tak awehtome so okre.

14 On wara ka kexe anarî komo twarawan komo ya yiixe cehtopo poko, Ero pîntho me n̂he ween̂as ero, kexe. Ahsîche tak on wara kesî anarî komo ya hara, Wex ham okre. Kir̂wan wahsî epethîmra n̂he okre, kesî kica.

15 Ooru nai anarî komo yaw. Hubi mko nai anarî komo yaw hara. Cepethîke xa tko nasî ehcamhokaxapu komo mtapotarî tohkarara wara rma, cepethîkem wara.

16 On wara na matu anarimaw, apurantan na mîmyatu apoyino ya emyaka so mak. Amn̂e kepemes hara, nîîke awya so. On wara tko nîîke anarî hara awya so anîhtînorî pîn, Yupurantamra exitaw moso amn̂e ow xa kepemesî noro yemtaka, nîîke awya so. Ero wa kan̂e ponontho ka ahsîcoko awepeman̂e me xa ehtome hara amn̂e. Noro ponontho xa ahsîcoko wooxam yepema xe exitaw, kîîrî pohkan̂e ro yepema xe exitaw ha.

17 Cesemîknosom me mak tînahrî komo nahsîyaxe anarî komo. Ero yipu yahsîche tpoxwe ka nahyaxe. Ero yinhîrî tohkarara wara rma tak nas hara oko yîmtaw so.

18 Ahce na poko awexi xe awexitaw so takîhsom komo yakro cokorî ka esentacoko takîhso ciitome awya so. Waapa me awto xe awexitaw so, takîhsom komo mtapotarî men ka entacoko ero poko.

19 On wara naxe anarî komo, kicicme tpoyino komo yehtoponho yekatîmrî pokono me mak n̂etar̂axe kica. Ekatîmnî n̂ekatîmyaxe kica noro yipu komo. Naxe anarî komo kîîxatî komo wara tîmtapotaxmu komo, tohnaw makî tko kexe ero wara kica. Noro yipu komo yakrono me exihra ehcoko.

20 On wara kexe anarî komo tîîm komo ya, tînocwan komo ya marha, Awîrîma xe ro mak wasî Kaan ya, kexe okwe. Ero wa kan̂e komo ramhan tak men n̂eseikesî ro mak amn̂e. Awarpanaw so xa tak naxe kopi ero wa kan̂e komo.

21 On wara naxe anarî komo, yohno ro mak tupurantan komo nahsîyaxe tîîm pen komo yemyawnonho. Ero yipu tko nasî cetkuresom me amn̂e pahkî exiche.

22 On wara kahra ehcoko, Oyemetanmekn̂enho poko kr̂a kesepanîyas hara, kahra. Kporin komo pona xa encoko awepantopo komo. Noro xa akurunpesî.

23 On wara naxe anarî komo, anarmen nasî yîhyaw so awsîn yukuknomacho kica. Kicicme ro mak nasî ero yipu Kporin komo ya. Kir̂wan̂he exihra ro mak nasî awsîn yukuknomacho iimen pîn me exitaw.

24 Kporin komo mak kaar̂axe so ahna so na kîwcetaw so, Noro marha kiir̂axe so ahce na pokono me marha. Ero ke ahce wa thakwa re kanmero so tîtketu, Iina xa kîwcesî, ero poko marha wasî, tîtketu? Yîhtînopîra thakwa taxe.

25 On wara naxe anarî komo, yohno ro mak nîmtapowaxe Kporin komo ya tîmsom poko. On wîmyasî Kaan ya, kexe yohno ro mak. Ero yinhîrî on wara kexe hara, Okwe, ero xe rma wai ham okwe, kexe. Xiika yawno wara rma naxe yohno tîmtapotaxmu komo ero yipu poko.

26 On wara naxe tînatkem komo, puruma yeperîrî pore naar̂axe tarara ero yîpîpîtîkachome Eronhîrî tak nar̂mexe kahsî yîpîpîthîrî yaatome tak ocowo ya. Ero wa xa marha naxe kayaritomo komo, takîhsom kom ha, tmaywen komo nîcherenonkexe kicicitho komo ke tîchewnoyemînhîrî.

27 Kekatî komo nasî Kporin komo ramhan wara. Ero ke rma kehtopo komo weipetîkesî Noro, yuhnawno rma kehtopo.

28 On wara cexpore nasî kayaritomo komo pahkî n̂he cehtome so kayaritomo me, esemetanmexapu komo pînîn yaw cexpore nasî. Yaaro tîmtapotaxmu me marha cexpore nasî, wakreno rin̂e me marha. Ero wa exitaw so pahkî n̂he tak naxe kayaritomo me rma.

29 Cenpore ceen̂axe kar̂pamxan komo kar̂pe exitaw so. Cenpore xa marha ceen̂axe poritomo kom hara tumutwe exitaw yîhpoci komo.

30 Cerewre xa yîhyokno riche panawatu tak na yîhyoxapu komo, kicicitho pokohra n̂he tak natu. Kekatî yakir̂wamacho me rma wa nasî kîmkayotopo, yuhnawno yakir̂wamacho me xa. Ero wa nasî.