19
On wara marha wîîkes awya so, kir̂wan̂he exihra naxe akpîn komo cetanwetopo poko tîmtapowataw so kica. Wara n̂he xa tasî yupurantamnî rma takîhsom me roro kexitaw.2 On wara naxe anarî komo, kir̂wan̂he cexi xe ro mak naxe. Camkî makî tko naxe okwe kir̂wan̂he cehtopo komo poko. Kir̂wan̂he exihra rma tasî ero wara kexitaw. Kicicme marha na tatu yohno ro mak kîwcetaw so ahce na wece.
3 On wara naxe anarî komo ahce na poko cehn̂axmu me naxe akpîn me cexirî ke mak okwe. Noro yipu komo rma tko na Kporin komo nanwekyatu. Owakrera nas okwe Kporin komo, ketu kica.
4 Tupurantai kexitaw so mer̂pora tak naxe kîîxatî komo. Yupurantamra kexitaw so reha kîîxatînhîrî komo rma na kahsîpînketu so okwe.
5 Ahce wa natu amn̂e tpoyino komo poko tîmtapotaxmu komo, tohnaw ro mak tîmtapotaxmu kom ha? Noro yipu komo panaretoopo watohra ro mak nasî Kporin komo. Emahcin me marha naxe cemarontaxmu kom ha.
6 On wara kayaritomo ya kexe noro maywen komo, Owî cma re mîwakresî, kexe. Mer̂pora naxe ero wa kan̂e komo. Miyan komo rma naxe wakreno rin̂e xatî komo.
7 Yupurantamnî xera natu akno komo rma okwe. Soroso xa akno pîn komo, yiixatînhîrî komo. Mooxe cexe yîhyai. Kîmtapowasî cma re awakro so, nîîke rma re yîwya so. Mokuhra rma tko naxe yîhyaka, yupurantamnî yaka.
8 On wara natu takîhretopo yentan̂e komo, waipîn me cexi xatî me nat ham. Kaan ya twakrecho komo nahsîyaxe yuhnari yîhtînon̂e komo.
9 Panaren me mak exihra ro mak naxe tohnaw tpoyino poko tîmtapotaxmu komo. Waihyaxe okwe cemarontaxmu kom ha.
10 Cenporera ceen̂axe akpîn komo cemyawnoi xa exitaw so. Soroso xa cenporera ceen̂axe tooto yantonînho, antomano rin̂e komo kayaritomon me exitaw tak.
11 On wara taxe kir̂wan̂he kehtopo komo men̂ekan̂e me kexitaw so, yamoro cetîrwonmesom me taxe okre. Kir̂wan mîkro, kacho me marha taxe kemetanmetoponhîrî yîhcamnon̂e me kexitaw so.
12 Eraspeto xa nasî kopi kayaritomo tîrwonataw. Reaw wara rma nîmtapowasî kopi tmayan̂em wara. Kîîxatî me exitaw reha kayaritomo tawake xa taxe. Cicakî wara rma nasî kîîxe ehtopo, cuh pokono wara. Ero wara nasî kîîxe kayaritomo yehtopo.
13 Kîwîrîman̂e me nasî kumumuru komo akpîra cexitaw so? On wara marha nasî kipici keyuhtîkan̂e me roro cexitaw, tuuna yîkrotîmtopo wara rma nasî, cipicipi kan̂e wara okwe.
14 Kîmîn na tahsîyatu kîîm pen mîntho. Kemyawno marha na tahsîyatu noro pen yemyawnonho. Kporin komo makî tko takîhsom ke kipihcexe so.
15 On wara kiin̂e mîn kuwun̂uru komo, yuhnari kîwînîkren̂e komo mîn kica. Rooma poko men naxe tuwun̂urem komo.
16 Kaan ya kpanatanmetopo komo yewehcataw kîwya so waipîra taxe. Kaan yanme kehtopo komo ponarora kexitaw so tîtwaiyaxe men okwe.
17 Ahce wa keen̂atu so Kaan yupurantamnî komo wakretaw kîwya so? Kaan ya tîmsomu rma moro yupurantamnî komo wakretopo. Noro rma tak knîmîthîrî nîmyas hara amn̂e kîwya so.
18 Amumuru komo men panarecoko awentan̂e me rma ka exitaw so. Amxîkrî komo yîwîrîman̂e me exîhra ro mak ehcoko.
19 On wara naxe miya xe xa cetîrwonmesom komo, tpanaresom me naxe amn̂e kicicme cehtoponhîrî komo yepetho. Noro yipu komo yukurunpetaw awya so panahra rma exitaw, tukurunpen̂e xe xa hara nas amn̂e emapona roro kica.
20 Awakîretopo komo men entacoko, ahcamhokacho komo marha. Ero yipu entacoko takîhso awehtome so amn̂e poritomo me awexitaw so.
21 Anarmerpa tîhtînoyaxe ahce wa na kemyawno komo ciitopo. Kporin komo xa tko n̂irpesî kemyawno komo kîwya so tînîhtînoputhîrî yaw roro mak. Anarme ecirin me ro mak nasî.
22 Kir̂wan mîkro okre, kacho me taxe kpoyino komo ya akronomano rin̂e me kexitaw so. Yupurantamnî me na tatu anarimaw. Wara rma cerepore n̂he taxe cemarontaxmu yopo.
23 Kporin komo ponaro xa kexitaw so waipîn me n̂he tak taxe okre. Cerepore cenmayaxe pahkî, kesemetanmetopo komo keporîra so n̂he nas okre. Ero wara taxe Kporin komo ponaro xa kexitaw so.
24 On wara naxe tuwun̂urem komo, tuuru komo rma re nukpexe iinan me kyam makî ha tko. Tîmtaka so cirihra rma naxe hara tuwun̂uru ke so mak kica.
25 Ero pîntho me tpanatanmetopo yentan̂e komo yîhyocoko. Tîhyotopo komo yenîche camkîno komo ya panawaxe tak okre. Yuhnari yîhtînon̂e komo yîtwermacoko. Amtapotarî komo yanme miyan poko rma tak n̂ehcamhokexe okre.
26 On wara naxe anarî komo tîîm nîwîrîmexe okwe. Tînocwan komo marha n̂en̂epexe yîmîn yai okwe. Noro yipu komo pona nîhyapamyaxe, yîîm komo, yînocwan kom ha. Tîwîrîyakaxmu me naxe okwe tîmxîkrî komo poyero.
27 Awakîretopo komo yentara tak awexitaw so okopuci komo, awehcamhokachonhîrî komo yai tak men metowyaxe okwe.
28 On wara naxe kicicitho komo, tpoyino komo yehtoponho yekatîmn̂e kom ha, Yaaro men ekatîmko noro yehtoponho, ketaw yîwya so n̂etaporexe mak kica. Kicicme cehtopo komo yermomn̂e wara ro mak naxe kica kicicitho komo.
29 Ero pîntho me mmak tpanatanmetopo yentan̂e komo panarecho me nasî yîwîrîmacho komo. Akpîn komo panarecho me nasî amoyi ke etapacho komo. Ero wa men nasî.