On wara naxe anarimaw cewyarono me xa cexi xatî komo, cesewakoma xe mak naxe kica. Nîrwonaxe mak takîhren̂e komo poko okwe.

2 Tahwore exihra naxe akpîn komo yuhnari yîhtînomexpotopo yencetaw. On wara wîhtînoyas owî reha, ka xe mak naxe kica.

3 Kicicitho komo mokyataw kîhyaka so, yîwîrîyakano ritopo marha mokyas okwe. Camkîno me keen̂ataw so kpoyino komo ya kîwîrîyakexe so marha okwe.

4 Tuuna yepu wara nasî kîmtapotarî komo, weyun wara. Tuuna yaporî wara nasî kîmtapotarî komo takîhso kîmtapowataw so.

5 On wara naxe anarî komo, en̂ekano rin̂e komo, kyopono me cekaiporesom komo yen̂ekara natu, kîxawyakan komo xa n̂en̂ekexe xa tak okwe. Kir̂wan̂he exihra ro mak nasî ero wa ehtopo komo. On wara marha naxe anarî kom hara, en̂ekano rin̂e komo, Kicicme mai ham okwe, kexe kir̂wan komo poko rma kica. Kir̂wan̂he exihra marha nasî ero wa en̂ekano ritopo kica.

6 On wara naxe akpîn komo, ceseseyusom komo yentache n̂examro meero tak n̂eseseyukyaxe akro so rma kica. Ero ke ero wa ceseseyusom komo naxe tîhyokpore so.

7 N̂etwîrîmexe akpîn komo tîmtapotarî komo ke rma kica. Yîropotarî komo yîwîrîman̂e me nasî yîmtapotarî komo rma kica.

8 On wara nasî ekatîmnî yekatîmn̂e ro mtapotarî, yînahrî wara nasî yîwya tpoxwem wara. Kwethîrî yaka roro tîtosom me tko nas okwe.

9 On wara naxe tuwun̂ure cemyawno ciin̂e komo, kemyawno yakuhr̂apon̂e yakno me rma naxe kica.

10 Mîîmo wara nasî Kporin komo yosotî, kawno wara, emacakan wara. Ero yaka cexe kir̂wan komo kar̂pe tukurui tak cehtome so okre.

11 On wara reha kexe tupurantayem komo, Mer̂pora nas opurantan. Oyewton wara rma nas okre ar̂manî ro wara, oyesemetanmetopo oyeporîra ro mak nasî, kexe. Twacan komo wara n̂een̂axe tupurantan komo, kawno wara.

12 On wara men taxe kpoyino komo yopono me kesehtînoyataw so, ketwîrîmacho komo tak nasî pahnoke okwe. Anarî komo xawyakan me xa cesehtînopore nasî, Kir̂wan mîkro okre, kacho me tak kehtome so hara.

13 On wara naxe anarî komo, tooto komo yehtopo poko nîmtapowaxe ehtoponhîrî komo yentatîkara rma cexitaw so okwe. Ero wa ketaw akpîn me n̂esenpexe tpoyino komo ya, tîwîrîyakaxmu me meero naxe okwe.

14 Tahwore kexitaw so kamotoyataw so rma kar̂pera kehtopo komo yînîmn̂e me n̂he taxe okre. Ahwokatîkaxapu me kexitaw so reha ahce wa na kehtopo komo yînmîra ro mak taxe okwe.

15 On wara naxe twerî cehtopo men̂ekan̂e komo, mîn hak poko n̂ehcamhokexe okre. Cehcamhokacho yenta xe naxe takîhsom komo.

16 On wara naxe anarî komo, cepethîkem nîmyaxe kayaritomo komo ya tîmtapotarî komo yentachome tak yîwya so. Ero yipu tîmrî ke yohno n̂he tak tîmn̂enhîrî komo mtapotarî n̂encexe.

17 On wara naxe en̂ekano rin̂e cesen̂ekaxmu komo mtapotarî yencetaw, yihcirî me ka anarî n̂encesî. Yaarono wara ka n̂encesî yîmtapotarî, kir̂wan wara. Ero yinhîrî noro mîtwono mtapotarî tak n̂ences hara. Ero yimaw tak yaarono mera tak na n̂ence yihcirî me ekatîmn̂enhîrî.

18 On wara nasî men̂ekacho yar̂macho, cetanwesom komo yîtîtmamnon̂e me nasî. Ero yanme etanwekîn me tak naxe yukurumîkno komo rma.

19 On wara naxe kakno komo ahce wa na kehtoponhîrî komo yerewcetaw, cehn̂axi ro mak n̂etîrwoxinkexe hara okwe. Ahce wa na natu sowtatu komo ewto imo pono komo yar̂macho poko, twacayem pono komo yar̂macho poko rma? Ehn̂ara rma na natu anarimaw noro yipu komo yar̂macho poko. Cehn̂etu rma tko na kakno komo yîrwoxinkacho poko reha. Kakno yakro keseiche ceipu tak na nai yîropotarî kayaritomo mîn metatan wara, ecetî ke ahruxapu wara.

20 Kîmtarî yeperîrî wara rma nasî kîmtapotarî. Knahrî wara rma nasî, kerepotanmekn̂e wara okre.

21 Kîmtapotarî yanme waihyaxe anarî komo. Ero yanme marha waipîra rma naxe anarî kom hara. Ero wa nasî kîmtapotarî kopi. Kîmtapotarî xatî komo nahyaxe amn̂e ero yeperîrî warai.

22 Kir̂wan̂he nasî kipici yahsîtopo. Kwakren̂e me tak nasî Kporin komo ahsîche.

23 On wara naxe yupurantamnî komo, tweeno me nîmtapowaxe kakro so. Ero warahra reha nîmtapowaxe tupurantayem komo. Yukurumîkno me n̂he nîmtapowaxe noro yipu komo kakro so.

24 On wara cexpore nasî yaake ehtome kîîxatî komo, tawake xa cesenpopore nasî yîwya so. Nasî rma tko kîîxatî ro xa. Kakno komo yopono me ro mak nas okre, kîpînînkan̂e pîn me ro mak nasî. Ero wa nasî noro yipu kîîxatî xa.