Awakîretopo rma tan wekatîmyas awya so. On wara naxe anarî komo, wahra mak na nai iyuru komo, cerereno mak ha na. Eserepokan me tko naxe okre. Kir̂wan̂he nasî ero wara. Anarî komo reha naxe yînahpen̂e ro mak. N̂etanwekyaxe mak ha tko kica ceseresmaxmu komo rma. Ero ke tahwore exihra rma naxe okwe.

2 On wara na nai tooto yanton anarimaw, takîhso roro na nai okre. Osom mumuru reha na nai akpîra kica, tîîm yîhyapamnon̂e me na nai kica. Ero wa exirî ke yîîm yanton xa nasî tosom mumuru yantoman̂e me. Yîîm waipuche antonînhîrî tak nahsîyasî tosom pen yemyawnonho raconho yumumuthîrî komo yakro rma.

3 Kuripara yaw nukuyaxe prata, tahrem warai yaw. Ooru marha nukuyaxe wehto pona yusmunthîrî yowtome. Ero wa xa marha kropotarî komo nukukmesî Kporin komo.

4 Tohnaw ekatîmn̂e komo ponaro naxe kicicme ciino rin̂e komo. Kîîxatî pînî mtapotarî ponaro marha nasî cemarontaxmu hara.

5 Yupurantamnî komo poko n̂etaporexe kica anarî komo. Noro yipu komo yakîhton̂enho poko etaporetopo rma mîn kopi ero wa kacho. On wara naxe anarî kom hara, nahwowaxe kica tpoyino komo yetwîrîmacho poko. Noro yipu komo panaretopo watohra ro mak nasî Kporin komo.

6 Poritomo komo yarokorî wara rma naxe parî komo okre. Kir̂wan̂he tîîm komo yehtopo poko nahwowaxe yîmxîkrî kom hara.

7 Kica, tîtkesî akpîn komo poko takîhsom wara yîmtapowataw so. Soroso xa, Kica, tîtkesî antomano rin̂e poko cemaronwataw kica.

8 On wara naxe anarî komo kicicme ehxapu komo, toopuci enporixapu nîmyaxe en̂ekano rin̂e ya esen̂ekapora cehtamci. Ero yinhîrî ahce na poko exitaw ero yipu tîmn̂enho, ehn̂ara rma nasî.

9 On wara naxe anarî komo, kicicme tpoyino komo yehtoponho yahrun̂e wara naxe, mîk hak ya ekatîmra naxe. Ero wa naxe tîîxe so n̂he ehtome so tpoyino komo. Ero warahra reha naxe anarî kom hara, kicicme tpoyino komo yehtoponho n̂ekatîmyaxe reha kica. Ero yanme etîxatî pîn me tak naxe etîxatînhîrî komo rma okwe.

10 On wara nasî takîhsom, tîtwermacho yentache twerî tak nasî. Akpînî reha na tîhyokya 100 ro, cmaicmai kacho ke oco. Wara rma twerîhra rma nasî kica.

11 On wara naxe kicicitho pokono komo, anwekno ciri xe mak naxe kica. Ero wa exirî ke so noro yipu komo yemetanmekn̂e n̂en̂epesî Kaan yîhyaka so. Yîpînîn yawno pînî ro mak n̂en̂epes ha.

12 Ahce wa tatu uhsu yon yakro kesepor̂ataw, yîmxîkaxapu yakro ha? Keskesî ro mak oko. Soroso xa tko kîwîrîmetîkexe so akpîn yakro kesepor̂ataw so. Akpîra cehtopo poko exitaw rma kesepor̂ataw so kîwîrîmetîkexe so okwe.

13 On wara naxe anarî komo, twakren̂enhîrî n̂epanîyaxe emetanmetopo ke hara kica. Noro yipu komo tak naxe cesemetanmesom me miya roro yîtîhkan me ro mak. Yîhyawno komo meero ero wa naxe okwe.

14 Ahce wa nai tuuna wahkotoxapu, wahkototoponhîrî yemacakache? Nîhcesî ro mak tak tuuna kar̂pe. Ero wa xa marha nasî ketanwetopo, wahra mak na nai yihcitopo. Ero yinhîrî miya xe ro mak tak ceseitîkexe okwe. Ero ke n̂expe mak awetanwetopo komo, yohno rma atîtmamcoko miya xe xa tak katîkara awexitaw so ha ka.

15 On wara naxe anarî komo, en̂ekano rin̂e komo, Kicicme exihra mat ham, kexe kicicme ehxapu komo ya rma kica. Kicicme ro mak mat ham kica, kexe kir̂wan komo ya hara kica. Kicicme ro mak naxe asakno roro rma Kporin komo ya.

16 Ahce kacho takîhsom komo yepema xe natu akpîn komo takîhretopo komo yepetho ha? Poxumra mexe n̂encexe takîhretopo komo. Ero ke ahce kacho ero yepetho nîmyat hara?

17 On wara naxe kîîxatî komo xa, kîîxe rma naxe ahce wa so na kexitaw. Ahce wa cehtome kakno komo n̂ewruyakn̂e? Kahwokacho chew kexitaw so kahworen̂e me cehtome xa n̂ewruyakn̂e ham.

18 On wara na nîîke yuhnari yîhtînon̂e pîn tpoyino ya, An̂epethîkathîrî wepemesî amn̂e apurantan exihra exitaw, nîîke na. N̂etamoyasîya na yaaro xa tîmtapotarî yentamexpotome. Yuhnari yîhtînon̂e pînî ro makî tko mîk ero wa kan̂e.

19 On wara naxe kicicme cexi xatî komo, cesei xatî me marha naxe kica. Ow xa takîhsom anarî komo yopo, kan̂e komo naxe cetwîrîmacho komo yan̂ikn̂e wara okwe.

20 On wara naxe Kaan yanwekî xatî komo, cehn̂axmu me naxe okwe. On wara naxe cetanwetopo poko tîmtapotaxmu kom hara, cesemetanmetopo komo chew tak men n̂ehtîkexe okwe.

21 Ahwora nasî yîîm, cetaporesom me exitaw yumumuru takîhsom komo poko. Tahwore exihra ro mak nasî panatan yîîm okwe.

22 Kar̂pe kiin̂e rma mîn tahwore kehtopo, kehci warai me rma nas okre. Ahwokatîkaxapu me kexitaw so reha kyochîrî komo n̂ewturpamyasî mak okwe.

23 On wara naxe anarî komo, cen̂ekaxmu komo, puranta nîmyaxe cen̂ekan̂e ya yaarono mera cen̂ekachome. En̂epa me rma nîmyaxe yîwya yaarono mera en̂ekano ritohme kica.

24 On wara naxe yuhnari yîhtînon̂e komo, takîhso cehtopo komo ponaro mak naxe. Ero warahra naxe akpîn komo, mooxeno yenîn̂e me makî reha naxe, roowo mapitawno komo yenîn̂e me makî kica.

25 Tîîm yahwokamexpon̂e me nasî yumumuru akpîn me cexitaw. Okwe, okwe, kamexpon̂e me marha nasî tînocwan ya.

26 Kicicme ro mak nasî en̂ekano rin̂e takîhsom komo yemetanmekn̂e me exitaw. Antomano rin̂e komo yîhyokura ro mak cexpore nasî takîhso exirî komo poyero.

27 On wara naxe mîn hak poko ehcamhokaxapu komo, wahra mak tîmtapotaxmu me naxe. On wara marha naxe yuhnari yîhtînon̂e komo, apehceme yîrwomnî me naxe, apehceme eserepokan me marha.

28 On wara tîtkexe akpîn poko yîmtapotara exitaw, Takîhsom mîkro ham, tîtkexe. Yuhnari yîhtînon̂e mîkro okre, tîtkexe noro yipu poko tîî ketaw mak. Ero wa tîtkexe.