Taa, kakîhretopo komo rma tan wekatîmyas awya so. On wara tîtkexe anarimaw, Ero wara oyexi xe wasî, tîtkexe. Kporin komo tko n̂iir̂asî eyukno ritopo kîmtaka so.

2 Kir̂wan me na cesen̂atu. Kicicitho ken̂arî pîn ow ha, tîtketu na re ahce na poko kexitaw so. Kporin komo xa tko yaaro nukuknomesî kekatî komo yehtopo.

3 On wara kacoko Kporin komo ya, Apa kah yawno, ahce poko wai awya? Awanme mak oyexi xe wasî, kacoko. Ero wa ketaw yîwya awesehtînotopo komo n̂ecehcesî kir̂wan̂he.

4 Miyan komo rma nakîhcekn̂e Kaan ahnoro tîwyan me ehtome. Kicicitho komo meero nakîhcekn̂e tîwîrîmaxmu me tak ehtome so amn̂e yîwîrîmacho me exitaw.

5 Ow xa kir̂wan, kacho poko cesehtînosom komo naxe kicicme ro mak Kporin komo ya. On wara men yîhtînocoko, ero wa kan̂e komo panaretopo watohra ro mak nasî Kporin komo.

6 Etpînîn yaw xa cexpore nasî. Yaaro cesehtînosom me marha cexpore nasî. Ero wa kexitaw so kicicme kpoyino komo yehtopo yahrupon̂e me taxe. Kporin komo ponaro xa kexitaw so kicicme kehtoponhîrî komo yahsîpînkan̂e me taxe.

7 Kir̂wan̂he exitaw kehtopo komo Kporin komo ya, kîîxatî pîn komo meero n̂iir̂asî tawake kpoko so.

8 On wara naxe anarî komo, wahra mak nasî emyawno komo. Kir̂wan̂he tko naxe. Noro yipu komo naxe tawake okre. Anarî komo reha naxe tupurantai xa. Kicicme tko naxe tpoyino komo poko. Tawake exihra naxe okwe noro yipu komo.

9 Kemyawno komo ciitopo tîhtînoyaxe kanmero so rma re. Kporin komo xa tko nasî kewkor̂man̂e me ahce na poko kiitome so hara.

10 Kaan yanme tîmtapotaxmu me cma re nasî kayaritomo. Ero ke takîhso mak nîmtapotape en̂ekano ritopo poko.

11 Kporin komo yanme mak nasî awsîn yukuknomacho, yaarono ha. Yin̂irithîrî mîn ahnoro ero yipu yukuknomacho mko kumixi yawno mko.

12 Kicicme ro mak ceen̂asî kayaritomo komo kicicme ciino rin̂e me exitaw so. Tkayaritomon komo ponaro tko n̂ehtîkexe maywen komo kir̂wan̂he exitaw.

13 Tawake naxe kayaritomo komo kir̂wan̂he tîmtapotaxmu komo poko. Kîîxatî me naxe ero wa tîmtapotaxmu me kexitaw so.

14 Kpoko yîrwonataw kayaritomo, Owaike men okwe, kacho tîhtînoyaxe. Takîhso kexitaw so kayaritomo tîrwoxinkexe yîrwonîmxapunhîrî.

15 Cewtawake exitaw kayaritomo kpoko so, Waipîra wai ham okre, tîtkexe. Yînwakrerî me kexitaw so tuuna tmohsom wara nasî kîwya so, okomn̂i tmohsom wara okre.

16 Tawake rma re taxe ooru yahsîche. Tawake xa tak taxe takîhso kehtopo komo yahsîche. Prata yopono ro mak mîn yuhnari yîhtînotopo, cepethîkem xa.

17 Takîhsom komo yesamarî cesî kicicme kehtopo yai ro mak. Kir̂wan̂he kehtopo komo yaw roro rma kexitaw so waipîra taxe okre.

18 Cehcoyoponkaxmu me kexitaw so ketwîrîmacho komo pahnoke tak nas okwe. Ow xa wasî takîhso anarî komo yopo okre, kacho ponaro kexitaw so meyehra tak nasî kepîrkacho kom okwe.

19 Tawake taxe, Opoyino komo xawyakan mak ow ha, kan̂e me kexitaw so, ero wara kan̂e komo yakro kexitaw so marha. Ahce wa tatu waapa me toxapu nahsîtho raconho yahsîyataw kîwya so? Tawake exihra taxe okwe noro yipu nahsîtho raconho yahsîyataw rma.

20 Kakîhretopo ponaro kexitaw so ehn̂ara n̂he tak taxe okre. Tawake xa taxe Kporin komo pona enîn̂e me marha kexitaw so.

21 Takîhso kexi xe kexitaw, Kir̂wanhe cehtopo men̂ekan̂e mîkro, kacho me taxe. Tawake kîmtapowataw so kakîhretopo poko kîmtapotarî ponaro n̂he tak naxe kentan̂e komo.

22 Tuuna pîtho wara nasî yuhnari yîhtînotopo kîwya so. Waipîn me kiin̂e pîtho wara nas okre. Akpîn komo panaretopo me nasî akpîn me n̂examro yehtopo rma okwe.

23 On wara naxe takîhsom komo, yîropotarî komo rma nasî yîmtarî komo panatanmekn̂e me. Ahce wa xa tîmtapotapore nai? kacho poko n̂ehcamhokexe.

24 Tawake kîmtapowataw so ween yamicho wara nasî kîmtapotarî komo. Kahworexe so okre. Kyochîrî yehci wara marha nas okre.

25 Kir̂wan̂he on ween̂as okre esama, kexe anarî komo ahce wa na cehtopo komo poko. Ero yenatîtopo to tko nasî n̂examro pen waihkacho okwe.

26 Kir̂wan̂he rma kiir̂axe so kroman komo ahce na poko ketapicketaw so. Kar̂pe n̂he ciitîkakî on awemyawno aweseresmachome tak amn̂e, kan̂e wara nasî kroman komo kîwya so.

27 On wara naxe kicicitho komo, yuhnaka ahton̂e wara naxe kicicme anarî komo yehtopo yentome kica. Wehto wara ro mak nasî yîmtaw so kicicme anarî komo yehtoponho.

28 On wara naxe cetanwesom komo, cetanmwesom me kehtopo komo n̂ihciyaxe kica. Ero wa xa marha naxe kpoko so tîmtapotaxmu kom hara, ehtura tîmtapotaxmu kom ha, etîxatî pîn me kiin̂e me naxe okwe etîxatînhîrî komo rma.

29 On wara naxe emetanmekno rin̂e komo, tpoyino komo pohkexe kica kicicme ehtopo komo poko. Amok ha oyakro, kesî yîwya kicicitho poko ehso tîcetaw so kica.

30 N̂esemikexe anarimaw noro yipu komo Kaan yanwekyataw tîwya so. Potucicinwaxe marha kica emetanmekno ciir̂ataw.

31 Cenpore xa nasî poritomo poci, tumutwem, kir̂wan komo poci mak ha tko.

32 Tawake naxe karitî komo, ewto imo pono komo yar̂man̂enho komo marha. Tawake xa tko naxe yamoro cetîrwonmesom komo. Tawake marha taxe kropotarî komo yaknaman̂e me kexitaw so kir̂wan ponaro kehtome so tak okre.

33 Kenaka so rma men̂ekacho tar̂mexe anarimaw so, Ero poko xa wai ham, kachome kîwya so. Kaan xa tko nasî ahce na poko kiin̂e me. Ero wa nasî Kaan.