15
Taa, kakîhretopo komo poko tan kîmtapowasî xa hara. Ahce wa eyukno cirpore nai kpoko so yîrwonataw anarî komo? Tawake eikuche n̂etîrwoxinke tak na kpoko so hara. Cetanwesom me eyukyataw reha nîrwonîmtîke miya xe xa okwe.2 On wara naxe takîhso cehsom komo, takîhso mak n̂ekatîmyaxe tînîhtînorî komo. Akpîra cehsom komo reha nîmtapowaxe akpîra ro mak kica. Nîmtapocetîkexe ro mak ero poko kica.
3 Miyan komo yenîn̂e me rma nasî Kporin komo yewru. Kicicitho komo yenîn̂e me nasî, kir̂wan komo yenîn̂e me marha.
4 Waipîn me kiin̂e yepu wara nasî kun̂uru kir̂wanhe kehtopo poko kîmtapowataw so. Cetanwesom me kîmtapowataw so reha ahwokano rin̂e me thakwa taxe okwe.
5 Tîîmî mtapotarî nîwîrîyakesî akpîn tpanatanmetopo poko yîmtapowataw. Tîtwermacho komo yentan̂e me reha naxe tweeno komo.
6 Mer̂pora ro mak nasî kir̂wan komo yemyawno, yîmîn komo yawno ha. Cemyawno komo rma re nahsîyaxe kicicitho komo, Noro yipu komo yemetanmekn̂e me makî tko nas okwe yînahsîthîrî komo rma.
7 Mîn hak poko kîhcamhokacho poko nîmtapowaxe takîhsom komo. Kîhcamhokan̂e mera ro makî reha nasî akpîn komo ropotarî.
8 Poxumra ro mak kicicitho komo nîmîtho n̂een̂asî Kporin komo. Tpoxwe reha n̂encesî takîhsom komo mtapotarî takro yîmtapowataw so.
9 Poxumra marha nasî kicicitho komo yehtopo Kporin komo ya. Ero warahra reha nasî kir̂wan̂he cexi xatî komo poko. Noro yipu komo xatî me reha nasî.
10 On wara naxe Kaan yehtopo yai cetowsom komo, tpanaresom me thakwa naxe cerewrem ke oko. Tîtwermacho yenta xatî pîn komo waihyaxe makî reha okwe.
11 Waixapu komo yenîn̂e Mîk Kporin komo, wehto imo chewno komo yenîn̂e marha. Soroso xa tooto ropotarî yenîn̂e me nas hara.
12 On wara naxe ero pîntho me tpanatanmetopo yentan̂e komo, tîtwerman̂e komo xatî pîn me naxe okwe. Takîhso cehsom komo mtapotarî yentaxi tohra ro mak naxe okwe.
13 Tahwore kexitaw so cewtawake marha taxe. Ahwora kexitaw so reha ahce na ciri xera taxe okwe, kemyawno komo rma ciri xera taxe.
14 On wara naxe yuhnari yîhtînon̂e komo, mîn hak poko cehcamhoka xe naxe. Ero warahra reha naxe akpîn komo, akpîn me ro mak nîmtapocetîkexe kica noro yipu komo. Tootî yonotopo wara rma nasî yîwya ero yipu poko yîmtapotarî.
15 Ahwora roro mak n̂enmayaxe okwe cesemetanmetopo chewno komo. Ahwotacho yimaw ceseresmaxmu komo yakrono wara roro naxe tahworem komo reha.
16 Tawake xa naxe emyawnomnî komo rma Kporin komo poko twerî exitaw so. Tawake exihra reha naxe cemyawnoyem xa cetanwetopo chew cexitaw so okwe.
17 On wara naxe etîxatî me cehsom komo, tawake xa naxe iyotîmra rma ceseresmetaw so. Totke na natu anarî komo paaka xîkîtho pun ke, kasom ke xa. Tawake exihra rma tko naxe etîxatî pîn me cexitaw so okwe.
18 On wara naxe yîrwon̂pon komo, cetanwesom me ciino n̂iir̂axe okwe. Ero warahra reha naxe yamoro tîrwon̂em komo, eseseyuxapunhîrî komo rma tawakeren̂e me naxe okre.
19 Tahruso nasî tuwun̂urem komo yesamarî cekyekyem ke oko. Swaa wara nasî kir̂wan komo yesamarî reha tarara yesamarî wara ro makî.
20 Tawake xa nasî yîîm takîhso exitaw tumumuru. On wara tko naxe akpîn komo anarimaw so, tînocwan komo rma nîwîrîyakexe okwe.
21 On wara marha naxe akpîn komo, tpoxwe xa n̂een̂axe akpîra cehtopo komo rma. Takîhso roro naxe yuhnari yîhtînon̂e komo reha.
22 Anarî komo yakro esentara kexitaw so cehn̂etu n̂he na okwe kemyawno komo poko. Yakeno yakro kesentache so kemyawno komo poko ehn̂ara tak taxe okre.
23 Tawake taxe takîhso eyukno ciriche kîwya so. Tpoxwe xa nasî kîmtapotarî ero wa yîmtapotacho me exitaw ero yimaw.
24 Takîhsom komo yehtopo nasî esama wara. Kahsî tîtosom wara nasî noro yipu komo yesamarî yuhnaka tohra ehtome so wehto imo ywaka.
25 Tpoyino komo yopono me cesehtînosom mîntho n̂ixkesî Kporin komo rma. Ero warahra reha nasî Noro wooxam komo poko, iin̂o waihxapu komo poko. Noro yipu komo rowon wokpan yewyoman̂e me nasî, ewyetakan me ciin̂e me ha.
26 On wara nasî Kporin komo kicicitho komo yesehtînotopo poko, poxumra ro mak n̂encesî kica. Tîn̂entarî mexe reha n̂encesî kicicitho ken̂arî pîn komo yesehtînotopo.
27 On wara naxe puranta poko cepohkaxmu komo, tîhyawno komo yemetanmekn̂e me mak naxe okwe. On wara tko naxe anarî kom hara, puranta yahsîra ro mak naxe kicicme ehxapu komo cen̂ekara cehtamci me tîmsom. Ero yipu yahsîn̂e pîn komo naxe pahkî waipîra.
28 On wara kexe kir̂wan komo, Ahce wa xa takîhso eyukno wiir̂a? kexe. Ero warahra reha naxe kicicitho komo, kicicitho yekatîmn̂e me ro mak naxe kica.
29 Mooxe nasî Kporin komo kicicitho komo yai. Ero warahra reha nasî kir̂wan komo poko. Noro yipu komo mtapotarî n̂encesî takro yîmtapowataw so.
30 Cewtawake kexitaw so kpoyino komo yahworen̂e me taxe okre. Kar̂pe nasî kyochîrî kir̂wan̂he kpoyino komo yehtoponho yencetaw kîwya so.
31 Anarimaw kîtwermacho nasî waipîra kiitopo me rma. Ero wa kacho yen̂tan̂e me kexitaw so takîhsom komo chewno me taxe okre.
32 On wara taxe kîtwermacho komo yenta xera ro mak kexitaw so, kwaipu xatî me mak taxe okwe. Kîtwermacho komo ponaro kexitaw so yuhnari yîhtînon̂e me tak cehtîkexe okre.
33 Takîhso kehtopo poko cehcamhokexe okre Kporin komo ponaro xa kexitaw so. Kir̂wan xa mîkro okre, ketu rma na kpoyino komo kpoko so. Amn̂e makî tko ero wara kexe, Opoyino komo xawyakan mak ow ha, kan̂e me kexiche so mak. Ero wa taxe.