Taa, awakîretopo komo wekatîmyasî rma tan awya so. On wara naxe wooxam komo, takîhsom komo, tîmîn komo ciin̂e me naxe okre. Ero warahra reha naxe akpîn komo, wooxam komo, tîmînthîrî komo yixkan̂e me mak naxe okwe noro yipu komo.

2 On wara naxe takîhso ciino rin̂e komo, Kporin komo ponaro xa naxe okre. Anarî komo reha naxe kesamarî komo yai cetowsom me kica. Noro yipu komo naxe Kporin komo yîwîrîyakan̂e me kica.

3 On wara naxe akpîn komo anarimaw so, cehcoyoponkaxmu me nîmtapowaxe kica. Watma wara rma nasî yîmtapotarî kica cetapacho wara rma. Ero warahra reha naxe takîhsom komo, yîmtapotachonhîrî komo rma nasî yukurun komo me.

4 Kooku exihra exitaw paaka, yarîhra nasî yînahrî yen okwe. Mer̂pora reha nasî knatîrî yeperîrî kooku exitaw paaka. Kar̂pe exirî ke paaka knahrî komo yepamnon̂e me nas okre.

5 On wara naxe yaaro mak ekatîmn̂e komo, tpoyino komo poko cemarontara naxe. Ero warahra reha naxe tohnawno yekatîmn̂e komo, cemaronwaxe rma tpoyino komo poko kica.

6 On wara naxe ero pîntho me kpanatanmetopo yentan̂e komo, takîhso cehtopo komo rma re n̂epor̂axe, enîhra rma tko naxe okwe. Ero warahra reha naxe yuhnari yîhtînon̂e komo. Apehceme n̂ehcamhokexe noro yipu komo.

7 Anarimaw akpîn yakro na mai. Yîmtapotarî yentache on wara na mîîke, Akpîn me moso nîmtapowasî kica, mîîke ha na. Ero wa ketaw awya yîhyai etok hara.

8 On wara naxe tweeno komo, takîhso cehtopo men̂ekan̂e me naxe. On wara reha naxe akpîn komo, akpîra mak naxe cehtopo komo poko cesemîknosom me cexirî ke so rma.

9 On wara marha naxe akpîn komo, kicicme cehtoponhîrî komo poko n̂etaporexe kica. Ero warahra reha naxe kir̂wan komo, kir̂wan̂he cexi xe mak naxe noro yipu komo reha.

10 Ahwora ro mak kexitaw kîw makî reha tîhtînoyasî ero wara kehtopo. Tahwore kehtopo marha yîhtînopîra naxe anarî ro komo. Kîw mak xa tîhtînoyasî tahwore xa kehtopo.

11 On wara nasî kicicitho komo mîn, n̂exixkesî mak tak amn̂e. Tawake reha naxe kir̂wan komo roona yaw kyam mak cexitaw so rma.

12 Kir̂wan̂he on ween̂as okre esama warai, kexe anarî komo ahce wa na cehtopo komo poko. Ero yenatîtopo to tko nasî n̂examro pen waihkacho mak okwe.

13 On wara na tatu anarimaw, cewret ha re ahwora kexitaw so rma. Kewretîkache so tak ahwora rma na tatu okwe anarimaw.

14 On wara naxe Kaan pona enîhkan̂e komo, kicicme cehtoponhîrî komo rma nasî ero wara ehtoponhîrî yepetho me. Cerepore tko naxe kir̂wan komo amn̂e kir̂wan̂he cehtoponhîrî komo yepetho me hara okre.

15 On wara naxe wara mak cesehtînosom komo, ahce na yentache yaarono wara n̂encexe ahnoro okwe. Tweeno komo reha men̂ekexe cetapitopo komo.

16 On wara naxe takîhsom komo, twerî naxe. Ero ke kicicme cehtoponhîrî komo yai n̂etowyaxe okre. Ero warahra reha naxe akpîn komo. Ow xa yo takîhsom, kexe noro yipu komo kica. Twerîhra ro mak naxe kica.

17 On wara naxe anarî komo, apehceme nîrwonaxe kica. Ero ke akpîra naxe ahce na poko. On wara naxe emetanmekno ciri xatî komo, tpoyino komo nîîxatîmnokarî me tak naxe okwe.

18 On wara marha naxe wara mak cesehtînosom komo, akpîra mak n̂ehtîkexe okwe. Tweeno komo reha n̂ehcamhokexe mîn hak poko. Ero wa ehtopo komo nasî arokorî komo warai me okre.

19 On wara naxe kicicitho komo amn̂e, kir̂wan komo mamakan me nutupenwaxe. Kir̂wan komo mîn potaka rma nutupenwaxe. Ero wa naxe kicicitho komo amn̂e.

20 Yupurantamnî komo xatî pîn me naxe yîmîtwono komo rma okwe. Mer̂pora naxe tupurantayem komo xatî komo reha.

21 Kicicme men taxe Kaan ya kîmîtwono komo yîwîrîyakan̂e me kexitaw so. Tawake reha taxe emyawnomnî komo pînîn yawno me kexitaw so.

22 Tacixapu wara mak naxe emetanmekno ritopo ponarono kom okwe. Akronomano ritopo ponarono komo pînîn yaw nasî Kporin komo, yaarono marha n̂entamexpesî yîwya so akîhretopo komo.

23 Ketapicketaw so kemyawno komo tak tahsîyaxe amn̂e kepethîrî komo. Tapota poko mak kexitaw so reha emyawnomra tak cehtîkexe okwe.

24 Takîhsom komo yarokorî wara nasî n̂examro yemyawno rma. Akpîn komo reha naxe cehn̂axmu me okwe. Akpîra cehtopo komo yanme rma ero wa naxe.

25 On wara naxe yaaro ekatîmn̂e komo, twaihkaxmunhîrî komo nukurunpesî tîmtapotarî komo ke rma. Ero warahra naxe tohnaw yekatîmn̂e komo, cemaro mak n̂ekatîmyaxe kica noro yipu komo.

26 On wara taxe twerî kexitaw so Kporin komo poko, waaca ke tukuruyem wara taxe. Noro yipu xîkrî komo naxe twacaye so okre.

27 Tuuna pîtho wara marha nasî Kporin komo ponaro xa kehtopo. Waipîn me kiin̂e me nasî ero wara kehtopo komo. Kwaihkacho yai cemahcisom me taxe Kporin komo ponaro xa kexitaw so.

28 Kayaritomo xa mîkro, kacho me nasî kayaritomo mer̂pora exitaw maywen komo. Asak mak exitaw maywen komo kayaritomo mera tak na n̂ehtîke okwe.

29 On wara naxe yamoro cetîrwonmesom komo, yuhnari yîhtînon̂e me xa naxe. On wara reha naxe apehceme tîrwon̂em kom hara, Kir̂wan̂he nasî panahra kehtopo, kan̂e wara naxe kica.

30 Cerepore kexitaw so kar̂pe n̂he nasî kupun komo. Kewresawra kyopono komo yeen̂ataw kar̂pera nasî kupun komo. Kyochîrî matacho wara rma nas oko ero wa kehtopo komo.

31 Emyawnomnî komo yemetanmekn̂e me kexitaw so noro yipu komo yakîhton̂enho yîwîrîyakan̂e me rma taxe okwe. Kir̂wan Mîk Kaan ham, kan̂e me kexitaw so emyawnomnî komo takronomexe.

32 On wara naxe kicicitho komo, kicicitho poko ehtopo komo rma nasî ar̂man̂e komo me. Ero warahra reha naxe kir̂wan komo, twaihyataw so rma tukurui so naxe okre.

33 On wara naxe yuhnari yîhtînon̂e komo, takîhso esehtînotopo n̂eremesî yîropotaw so tîtken̂e mak. Ero warahra naxe akpîn komo, noro yipu komo yehtopo reha n̂esehtînomexpesî.

34 Kir̂wan̂he exitaw kayaritomo, noro maywen komo marha, anarî rowon pono komo yopono me tak n̂ehtîkexe okre. Tîwîrîyakaxmu me makî tko n̂ehtîkexe tooto komo okwe kicicme exitaw so kica.

35 Tawake nasî kayaritomo tmaywen poko takîhso exitaw. Nîrwonasî reha tmaywen poko tîhyapamnotopo me exitaw. Ero wa nasî kayaritomo.