Ero yinhîrî on wara tak wîhtînoyakn̂e hara, kesewakomacho tak wukukmes hara kerepotanmekya na, kachome owya. Ero ke kesewakomekn̂e ro mak. Ero meero tko kerepotanmekîra nas okwe.

2 On wara wîîkekn̂e kewretopo poko, tohnaw ro mak ero poko tas okwe. On wara wîîkekn̂e kesewakomacho poko hara, Kir̂wan̂he ma re kiir̂a? wîîkekn̂e.

3 Ero yinhîrî opun yahwore xe tak wîxakn̂e wooku ke hara. Keseman̂itopo poko marha wîxakn̂e. Takîhso oyexi xe rma tko wîxakn̂e ero yipu poko oyexitaw rma. Ahce poko xa cexpore nai kir̂wan̂he kehtome so tan ka kexitaw so waipîra? Yohno mak tas tan okwe kaapu makataw, wîîkekn̂e.

4 Ero yinhîrî ahce na tak wiir̂akn̂e miyanî rma. Omîn wiir̂akn̂e yaake. Onatîrî marha wiir̂akn̂e uupa yatî. Mer̂pora wiir̂akn̂e.

5 Onatîrî yewtî marha waiwapekn̂e. Iina so onatîrî wirpekn̂e. Weewe mko marha wiir̂akn̂e anarmerpanan. Aiwaxapu pona wiir̂akn̂e.

6 N̂ikitho marha wiir̂akn̂e onatîrî tîhtopo me, weewe tîhtopo me ha. Por̂mamyakn̂e tak onatîrî weewe mko.

7 Oyanton komo marha wahsîyakn̂e epethîrî pona. Kîrkomo wahsîyakn̂e, wooxam komo marha. Ohyaw marha n̂ewruyatken̂e anarî kom hara oyanton kom ha. Tokye marha wîxakn̂e mer̂pono pîn ke. Mer̂pora xakn̂e oyoku paaka komo, oper̂a komo, noro yipu kom ha. Pahxan pen komo yoku yopo xakn̂e oyoku, Xerusaren pononho komo yok yopo.

8 Ooru marha wenmekyakn̂e mer̂pono pîn, prata marha mer̂pono pîn. Ero yipu nahsîyaxe roro kayaritomo komo, kopenato kom ha. Waano yaan̂e komo marha wahsîyakn̂e kîrkomo, wooxam kom ha. Yiixe xa toooto komo yehtopo marha wahsîyakn̂e.

9 Ero ke cemyarkem me xa tak wîxakn̂e oyexinawnonho pen komo yopo ro mak, Xerusaren pono komo yopo. Ero wara oyehtîketaw rma takîhsom me rma wîxakn̂e.

10 Ahce na yeen̂ataw owya cenporem me ero rma wahsîyakn̂e. Oyewru yanwekîra ro mak wîxakn̂e. Twakon xe exitaw oropotarî ero marha anwekîra wîxakn̂e. Tahwore wîxakn̂e on̂irirî poko okre. Tahwore oyehtopo rma xakn̂e oyekaritotoponho yepetho.

11 Ero yipu mko ciitîkache tko ween̂akn̂e. Oyamorî ke ciixapu rma ween̂akn̂e ahnoro. Cekar̂kaxi ro kekaricekn̂e ero mko poko. Tohnawno me tko ween̂akn̂e okwe. Ocowo yahsî xe oyehtopo wara rma xakn̂e ero mko ciitoponho. Keserepotanmetopo exihra ro mak nasî tan okwe kaamo makataw.

12 Ero yinhîrî cesewkor̂maxu wara wîxakn̂e hara takîhso oyehtopo wece hara. Ero ponaro wîxakn̂e hara. Wara ro mak kehtopo ponaro marha wîxakn̂e, keseman̂itopo ponaro marha. Ahce thakwa re n̂iir̂a ohretawno, kayaritomo retawno ha? On̂iritho pîn ma re n̂iir̂a? Ciiso rma thakwa nasî ero yipu mko ahnoro.

13 Ero yinhîrî on wara tak ween̂akn̂e, kir̂wan̂he nasî takîhso kehtopo wara mak kehtopo yopo ro mak. Katpan nasî kir̂wan̂he awarpan yopo ro mak, kir̂wan̂he xa marha nasî takîhso kehtopo hara wara mak kesehtînotopo yopo hara.

14 On wara nasî takîhsom, ewru nasî yîhtîpîrî yaw. Awarpanaw makî tko n̂etar̂asî akpîra cehsom. Wara rma etîme re rma thakwa naxe tahwokacho komo chew anarimaw so asakno roro rma okwe.

15 Ero ke on wara wîîkekn̂e oropotaw, akpîra cehsom thakwa nasî tahwokacho chew okwe. Ero yipu chew xa marha was ow hara okwe. Ero ke ahce kacho takîhso oyehtopo ponaro wai okwe, wîîkekn̂e. Tohnaw marha wai ham okwe takîhso kesehtînotopo ponaro, wîîkekn̂e.

16 Yohno rma takîhsom pen yehtoponho poko n̂eponarononkexe poyino kom okwe. Akpîra cehsom yehtoponho poko n̂eponarononkexe ero wara xa marha takîhsom yehtoponho poko naxe hara okwe. Asakno yehtoponho poko rma n̂eponarononkexe okwe. Akpîra cehsom komo waihyaxe. Ero wa xa marha takîhsom komo waihyaxe hara okwe. Ero wa thakwa taxe etîme re okwe.

17 Ero ke poxumra ro mak tak ween̂akn̂e waipîra oyehtopo. Oyahwokacho me mak ween̂akn̂e ahce na ciitopo kîwya so. Ero wa ween̂akn̂e ahnoro tooto komo n̂iritho, kaamo makatawno komo n̂iritho. Tohnawno me mak nas okwe. Ocowo yahsî xe kehtopo wara mak nas okwe.

18 Poxumra ro mak tak ween̂akn̂e on̂iritho ahnoro. Kaamo makatawno poko kekaricekn̂e. Ohretawno nahsîrî me mak nasî on̂iritho okwe, wîîkekn̂e.

19 Ahce wara na nai ohretawno? Takîhso nai ha na, akpîn me mak katî nai? Noro rma tko nahsîya on̂iritho ahnoro. Kekaricekn̂e ro mak ero mko poko. Takîhso marha wiir̂akn̂e. Ahce wara cehsom xa nahsîya amn̂e? wîîkekn̂e. Ero ke ero marha nasî tohnawno me kica.

20 Ero ke kahwokekn̂e tak oyekaritotoponho poko, kaamo makatawno mko wiir̂akn̂e ero mko poko kahwokekn̂e.

21 Anarimaw ahce na ciitopo poko tatu, takîhso na cicir̂atu. Yaana me xa na cicir̂at okre. Eronhîrî rma tko tînomyasî thakwa ciin̂enhîrî pîn nahsîrî me hara okwe. Ero ke tohnawno me nasî ero yipu ciitoponho. Kahwokacho me ro mak nas okwe.

22 Ahce thakwa re tahsîyatu kar̂pe ro mak kekaritotoponhîrî yepetho me. Ceserepoketu ahce na ciir̂ataw kaamo makatawno ciir̂ataw ha. Ciitîkache ahce thakwa re tahsîyatu epethîrî ha?

23 Kaamo poko roro na cetapicketu tahcitaxi ro mak oko. Tahwoke marha na ahce na ciir̂ataw. Kosope meero na ceserepoketu ciisom poko. Tohnawno marha mîn, mîn hak ciitopo okwe.

24-25 On wara kexitaw so mak cerepore taxe, ceseresmexe, wooku ceer̂axe, kn̂irithîrî poko taxe. Ero wa kexitaw so mak cerepore taxe. Ero yopono kerepotanmecho exihra ro mak nasî. Kaanî rma tko nîmyasî kîwya so ero poko keserepotanmecho. Onoke ma re n̂eseresme oyopo, onoke ma re n̂eserepotanmekya oyopo? Pîra ro mak okwe.

26 On wara kiir̂axe so Kaan kir̂wan me keen̂ataw so, kakîhrexe so, ahce na poko kîhcamhokexe so, kahworexe so marha, ero wara kiir̂axe so. On wara tko kicicme cehsom komo reha n̂iir̂asî, emyawno yenmekrî pokono me n̂iir̂asî, yîmtorî pokono me marha. Ero yipu yîmtoche Kaan yanme marha nîmyaxe tîn̂enîrî mexan komo ya. Tohnaw marha tasî ero yipu poko okwe. Ocowo yahsî xe kehtopo warai kyam mak mîn okwe. Ero wa mak nas owya.