Taa, on wara marha kehtopo komo ween̂asî, ahce na poko kexi xe kexitaw nasî rma ero poko kehtopo ro kaamo. Ahce na ciir̂ataw tooto komo ya, kaapu makatawno komo ya, ero ciitopo ro tak nasî.

2 Kewrutopo me exitaw xa cewruyasî, kwaihtopo me exitaw tîtwaiyas hara. Knatîrî ciitopo me exitaw tak cicir̂asî, knatîthîrî yeputho mohkacho yimaw tak tîtmokes hara.

3 Waihkano ritopo ro nasî, ehcemano ritopo ro nas hara. Ahce na ciixaputho yixkacho tak nasî, ahce na ciitopo marha nas hara.

4 Kîwratacho me tak nasî anarimaw hara, kewretopo me tak nasî anarimaw hara. Okwe okwe, kacho me tak nasî anarimaw, kmanîmtopo me tak nasî anarimaw hara.

5 Toopu yaatopo me tak nasî anarimaw ar̂machome, toopu yenmetopo me tak nasî anarimaw hara. Yîpîmîmino ritopo me tak nasî anarimaw, yîpîmîmino ritopo mera tak nasî anarimaw hara.

6 Ahce na yahsîtopo me tak nasî anarimaw, ahce na yahsîpînkacho me tak nasî anarimaw hara. Ahce na yîmtotopo me nasî anarimaw, ahce na yar̂macho me kr̂a tak nasî anarimaw hara.

7 Ahce na yahyaxkacho me tak nasî anarimaw, ahce na yeemitopo me tak nasî anarimaw hara. Tîtken̂e mak kehtopo me tak nasî anarimaw, kîmtapotacho me tak nasî anarimaw hara.

8 Etîxe kehtopo me tak nasî anarimaw, etîxera kehtopo me tak nasî anarimaw hara. Ketar̂macho me tak nasî anarimaw, etar̂mara kehtopo me tak nasî anarimaw hara. Ero wa so nasî ahce na poko kehtopo ro komo.

9 Anarimaw so cetapickexe ahce na poko. Ahce xa re tahsîyatu ero ciitoponho yepetho, kerepotanmecho kom ha?

10 Tooto ween̂asî cemyawno ciitopo poko. Kaanî yanme rma ero pokono me thakwa naxe.

11 Poko kehtopo ro nukuknomekn̂e Kaan ahce na poko kehtopo ahnoro. Kir̂wan̂he nasî ahce na ciitopo yîwya, ciitopo me exitaw. On wara nasî Kaan cihcitopo ken̂ehra ro mak nasî. Ero wara cehtopo poko ceserepokaxmu me kiir̂atken̂e so Kaan. Miya roro tak Kaan yehtopo poko ceserepokaxmu me kiir̂atken̂e so, ehcamnopîn me ro mak ehtopo poko ha. On wara kacho poko tko tasî camkî okwe, Ahce na n̂iir̂a Kaan mehxa ro mîn hak yihcitopo n̂ixa ro miya roro yîtîhkacho pona roro, kacho poko camkî tasî.

12 On wara tko wîhtînoyasî, tahwore cexpore nasî, akronomano rin̂e me marha. Ero wara xa cexpore nasî kwaihtopo pona roro. Ero wa kehtopo yopono exihra ro mak nasî kir̂wan̂he kehtopo ha.

13 On wara cexitaw so ahnoro tooto komo cerepore rma naxe, n̂eseresmetu, wooku n̂eer̂atu, tîn̂irithîrî komo poko nahwowatu, ero wara exitaw so kir̂wan̂he nasî. Ero wa cexpore nasî. Ero poko kehtopo nasî Kaan nîmîtho kîwya so.

14 On wara wîîkesî Kaan n̂iritho poko, eroromerono me n̂iir̂asî ahnoro. Yin̂irithîrî yîhremara thakwa tasî kîw, yîraconhîrî marha towîhra thakwa tasî, wîîkesî. On wara marha wîîkesî, ero wa so ciino n̂iir̂asî Kaan tponaro xa kehtome so. Ero wara wîîkesî Kaan n̂iritho poko.

15 Ahce wa tooto komo yehtopo ceen̂atu oroto, ero wara rma xatken̂e pahxan pen kom hara. Ahce wa tooto komo yehtopo ceen̂atu amn̂e, ero wara rma xatken̂e pahxan pen komo. Pahxa kehtoponhîrî komo nukuknomesî Kaan, Ero wa mîxatken̂e ham, kachome kîwya so.

16 On warai komo ween̂akn̂e kaamo makatawno komo, en̂ekano rin̂e komo ween̂akn̂e, yaaro en̂ekano rin̂e komo cma ha re. Kicicme so rma xatken̂e kica. Kayaritomo komo marha ween̂akn̂e kir̂wan̂he kantoman̂e komo cma ha re, kicicme rma tko ween̂akn̂e okwe.

17 Ero ke on wara wîîkekn̂e oropotaw, kir̂wan komo yehtoponho n̂etahcasî Kaan amn̂e, kicicitho komo marha n̂en̂ekesî. Ahce na ciitopo ahnoro nasî tukuknomaxi, Ero yimaw xa nasî ero ciitopo me, kacho ha.

18 On wara marha wîîkekn̂e oropotaw, On wara nai ham Kaan tooto komo poko, ehtopo komo nukukmesî enpotome kîwya so. Xapari warai mak kîwyam kica, kachome tak kîwya so nukukmesî.

19 Xaparî wara rma taxe tooto. Ahce wa na xapari, ero wa xa marha taxe kîwyam hara. Etîme re tîtwaiyaxe xapari wara xa marha. Etîme re cesehsaxe xapari wara xa marha. Xapari yopono me exihra rma taxe tooto komo. Tohnaw mak taxe ahnoro etîme re.

20 Iina re tîtosom me marha taxe xapari komo yakro. Roowo pupunthonhîrî mak kîwyam ahnoro tooto komo, xapari marha. Roowo me tak cetakîhcexe hara amn̂e tooto komo, xapari marha.

21 Onoke thakwa re n̂een̂a tooto yekatî torî waipuche, kahsî torî ha. Onoke thakwa re n̂een̂a xapari yekatî torî roowo cheka hara? Yîhtînopîra thakwa taxe ero wa so torî kom ha.

22 Ero ke on wara wîîkes hara, on wara thakwa nasî cerepore tooto komo yehtopo, kemyawno poko ceserepotanmekpore nasî. Anarme kehtopo exihra ro mak nasî wara n̂he kehtopo kom ha. Onoke thakwa re n̂enpe kîwya so pahxarono komo yehtopo, kwenatîwono komo yehtopo ha? Enpon̂e exihra thakwa nas okwe, wîîkekn̂e. Ero wa wîîkekn̂e.