Ero yinhîrî tak emetanmexapu komo ween̂akn̂e hara, ahnoro ween̂akn̂e kaamo makatawno kom ha. Emetanmexapu komo yewyokrî ween̂akn̂e. Ahworen̂e komo exihra ro mak xakn̂e okwe. Kar̂pe xatken̂e emetanmekn̂e komo okwe. Emetanmexapu komo yahworen̂e komo exihra ro mak xakn̂e okwe.

2 Ero ke on wara wîîkekn̂e, Tawake n̂he naxe waixapu komo, pahxa n̂he waixapu kom ha. Ahwora n̂he naxe okwe waipîn kom ha ka.

3 Wara n̂he xa matko naxe ewrunu ro komo. Kicicme kaamo makatawno komo yehtopo yenîhra naxe noro yipu komo okre, wîîkekn̂e.

4 Ero yinhîrî on wara tooto komo yehtopo ween̂akn̂e, ahnoro tooto komo pohnaxe tpoyino komo poko. Tpohnîmtopo yanme mak n̂etapickexe, ero yanme naxe ahce na poko. Ero ke ero yanme ahce na ciitopo meero nasî tohnaw okwe. Ocowo yahsî xatî wara mak taxe ero wa kexitaw so.

5 On wara naxe akpîn komo, ahce na pokohra ro mak naxe. Ero wa cexirî ke so yupun komo n̂eton̂esî takporoso cehso ro okwe.

6 Asak mak nasî noro yipu komo yemyawno. Yarpa exihra rma tko naxe. Cerepore n̂he rma naxe okre. Anarî komo reha natu cemyarke xa. Ahce na poko tko n̂ekaricexe ro mak okwe. Ocowo yahsî xatî wara mak naxe okwe.

7 Ero yinhîrî anarî komo yehtopo tak ween̂akn̂e hara kaamo makatawno komo yehtopo. Tohnawno pokono komo marha mîkyam xatken̂e okwe.

8 Anarî ween̂akn̂e hara, cewn̂e xakn̂e okwe akronomra. Yumumuru exihra xakn̂e okwe, akno exihra marha xakn̂e okwe. Noro pen n̂etapickekn̂e yîtîhkan me ro mak okwe. Wara rma eserepotanmekîra xakn̂e cemyawno poko. Ero ke on wara tak kekn̂e tîhnaw, Onoke yanme xa tan ketapicke? Ahce kacho oyahwotacho yai onî mko poko roro wai okwe? kekn̂e tîhnaw. Noro ween̂akn̂e tohnawno poko, cerepotanmetopo pîn poko okwe.

9 Kir̂wan̂he tasî iito re kexitaw asak hakno. Kir̂wan̂he exihra n̂he tasî cewn̂e kexitaw okwe. Asak hakno me kexitaw iito re kir̂wan tak tahsîyaxe ketapickachonhîrî komo yepetho.

10 Anarînhîrî yepîrketaw akrono tak nanîmyasî hara. Okwe tîkexe xa thakwa cewn̂e kexitaw. Ero wa kepîrketaw exihra ro mak nasî kanîmn̂e hara okwe.

11 On wara marha nasî ketakriyataw, asakî ketakriyataw iina re ocoro n̂he tas okre. Ahce wa thakwa re tai ocoro cewn̂e ketakriyataw?

12 Cewn̂e kexitaw kar̂mesî thakwa kwaparî. Asakî kexitaw reha kwaparî yopo n̂he tak tas okre. Ero wa xa marha nasî ahce na mici, asakî yatî n̂he exitaw yimici yohno etawotora nas okre.

13 Kir̂wan̂he nasî kar̂pamxan emyawnomnî rma takîhso cexitaw. Kir̂wan̂he exihra rma nasî poritomo akpîra cexitaw. Kayaritomo me cehsomu rma kir̂wan̂he exihra nai. On wara xa cexpore nasî, kacho yenta xatî pîn me cexitaw okwe kir̂wan̂he exihra nai.

14 Kahrutopo yawnonho rma n̂epatake kayaritomo me tak cehtome hara okre. Anarimaw emyawnomnî ro mak mîk. Kayaritomo me rma tak na nai noro yipu rma.

15 Mer̂pora ro mak ween̂akn̂e noro yipu yakrono komo. Kayaritomo me tak na n̂iir̂atu tîkayaritomonînhîrî komo retawno me. Ero wa tak kar̂pamxan n̂een̂atu kaamo makatawno komo.

16 Mer̂pora ro mak tak na natu noro yipu maywen komo, kar̂pamxan maywen kom ha. N̂examro yepamtho komo reha tko na natu anarme hara okwe. Kir̂wan̂he xakn̂e noro okre, kahra natu. Kar̂pamxan me ciixapunhîrî pen xera naxe waipuche. Ero ke ero wa tooto yehtopo meero nai ham tohnawno me mak okwe. Ocowo yahsî xatî wara mak nai ham.