On wara marha wîîkes awya so, Kaan mîn yaka awcetaw so twerî men etocoko. Yîmtapotarî yentaxi mak etocoko. Akpîn komo warahra ehcoko. Yohno kahra ehcoko, Ero men wîmyas amn̂e awya Apa, kahra ehcoko yohno. Camkî na natu ero wa tîmtapotaxmu komo. Kicicme wasî wara kyam mak Kaan yakro omtapowataw, kahra nat okwe.

2 Kaan yakro amtapowataw so, yohno so yîmtapotara ehcoko. Yohno so marha yîhtînopîra ehcoko amtapotarî komo Noro yakro. Kah yawno Mîkî Kaan. Roowo pono mak reha amyamro kopi. Ero ke wahra mak amtapotakî.

3 Mîwosowasî cemyarke xa awexitaw so. Mer̂pora ro mak amtapowataw so, Akpîn mîkro, kexe awentan̂e komo.

4 On wara na mîmtapowatu Kaan yakro anarimaw, Apa ero men wîmyasî roro awya, mîîketu na. Ero wa kache awya so ecmamra ro mak men ehcoko tîmtopo poko. Ahwora men nai Kaan akpîn komo poko okwe. Ero ke tîmcoko men.

5 Wara n̂he tasî, Ero men wîmyasî awya Apa, kahra ro mak kexitaw. Ahwora nai Kaan kpoko so tîmîhra kexitaw, Wîmyasî men, kan̂enho ha.

6 Kicicme men kiir̂atu so anarimaw kîmtarî komo rma okwe. On wara kahra men ehcoko amn̂e Kaan yanton ya, Camkî kîmtapowakn̂e kica Kaan ya onîmrî poko, kahra ehcoko. Ero wa ketaw awya so nîrwona men Kaan apoko so. An̂irithîrî komo tak men n̂ixke ero wara amtapotache so.

7 Tohnaw marha nasî ahce na yeen̂ataw kîwya so wosoto mak, mer̂pora ero yipu yeen̂ataw rma tohnaw nasî. Tohnaw marha nasî kîmtapotarî mer̂pora kîmtapowataw so hara. Kaan poko twerî xa matko ehcoko.

8 Anarimaw on warai komo na meen̂atu, emyawnomnî komo yemetanmetopo na meen̂atu. Kir̂wan̂he epemara ro mak natu apickano rin̂e komo. Etîme re en̂ekano ritopo marha na meen̂atu. Esen̂ekapora ehtamci komo marha na meen̂at okwe. Ero pokono komo yeen̂ataw awya so eserepokatîkara ehcoko. Nasî rma kayaritomo me cehsom n̂examro yenîn̂e. N̂examro yenîn̂e yopono komo xa hara naxe, enîn̂e yenîn̂e kom hara.

9 Kmararîn komo pono yeperîrî nasî miyan komo nahrî me rma. Kayaritomo nahrî me meero nasî kmararîn komo pono yeperîrî.

10 On wara marha tasî, puranta xatî me kexitaw erepotara rma thakwa tasî puranta ke mak. Kemyawno xatî me kexitaw so erepotara marha tasî kemyawno yahsîche. Kerepotanmekn̂e pîn mîn kemyawno.

11 Kemyawno rma na n̂epamya anarimaw. Ero yimaw rma tko n̂epamyasî ahn̂e kom hara. Ero ke ahce wa thakwa re n̂erepowa osom ero yipu poko. N̂erepowa rma cik ha re enîrî ke mak okwe.

12 Tpoxwe xa nasî kîwîntopo kîwya cetapickaxmu me kexitaw. Ero wa nasî kîwîntopo yînahpen̂e kexitaw, yînapucme kexitaw marha. N̂etwînîkpormesî tko okwe cemyawnoyem mer̂pora exirî ke emyawno.

13 On warai marha ween̂asî kaamo makatawno komo yehtopo, kicicme ro mak ehtopo komo, anarî komo n̂esewakrexe mer̂pono pînî ke ro mak okyo. Emyawno komo rma tko nasî yîwîrîmacho komo me okwe.

14 Ero yinhîrî cemyawnoyem yemyawnonho pen tak na n̂ehcamnoya hara okwe camkî exirî ke osom. Ero ke cemyawnoyemînhîrî pen waihyataw exihra tak nasî tumumuru ya tîmsom okwe.

15 Ponomra ro mak n̂ewruyakn̂e tînocwan ropotai. Ponomra marha cee hara okwe. On wara ro mak mokyakn̂e oona roowo pona, ero wara xa marha ces hara roowo poi. Cemyawno yarîhra ro mak wa nasî twaihyataw, cetapickachonhîrî yepetho ha.

16 Ero wa noro yipu komo yehtopo nasî kahwokacho me mak okwe. Emyawnomra ro mak n̂ewruyasî, emyawnomra marha waihyas hara. Ahce poko ma re n̂erepowa? Ocowo warai yahsîtome mak n̂etapickekn̂e ham okwe.

17 Enmar̂atîxera ceseresmexe awarpanawno wara mak. Ahwora ro mak taxe, tamotoyaxe marha, tîrwonaxe marha okwe, wîîkekn̂e. Ero wa wîîkekn̂e kehtopo poko.

18 Ero yimaw tak on wara wîîkesî, tooto komo yehtopo yenîrî ke wîîkesî, ceseresmapore rma nasî, wooku marha cerpore nasî. Ketapickacho poko marha cerepotapore nasî, kpokaren̂e poko rma. Atî wicakî na enmarî nîmya Kaan kîwya so, waipîra kehtopo komo. Ero wicakî rma tko cerepotapore nasî ero yipu poko, kaamo makataw kehtopo komo poko. Ero warai me thakwa kakîhcetken̂e so Kaan.

19 On warai ke kwakrexe so Kaan, kemyawno nîmyasî kîwya so, kmararîn komo marha. Kar̂pe marha kiir̂axe ero poko kerepotachome so okre. Cerepore kiir̂axe so ketapickacho poko rma. Kaan ya kwakrecho rma mîn ero wara kehtopo komo.

20 Ero wara kexitaw, Ero wara wîxakn̂e pahxa okwe, kahra n̂he taxe. Kahworexe so rma Kaan kemyawno komo poko rma pahxan ponarora n̂he kehtome so. Ero wa kiir̂axe so Kaan.