On wara anarî komo ween̂as hara, kaamo makatawno kom ha, Ahwora ro mak naxe on wara cexirî ke so okwe,

2 Kaanî rma nîmyasî anarî komo ya yupurantan mer̂pora, emyawno merpora marha. Kyopono me cekaiporesom me marha n̂examro n̂iir̂asî. Ero ke esemetanmekîra ro mak naxe okre. Yiixe cehtopo rma nasî yîhyaw etpoyino pînî ro mak. On wara tko na nai amn̂e, somînhîrî komo yai nowpesî Kaan anarî yana komo ya okwe. Tohnawno me tasî ero wara kexitaw so. Kahwokamexpotopo xa mîn ero wara kehtopo.

3 Noro yipu xîkrî komo na n̂ewruyatu 100 okyo. Noro yipu marha na nai pahkî waipîra mer̂pora ro mak cimn̂ipu. Noro yipu rma tko na erepotara nai pahkî cehtopo poko, tîmxîkye xa cehtopo poko marha. Waipuche okoputhîrî ahrura mak nat okwe. Okwe xa thakwa, tîtkesî noro yipu poko. Rikomo xa nasî wara n̂he owya akpîra emarakaxapu rma.

4 On wara nasî rikomo emarakaxapu, tohnaw mak n̂ewruyasî, awarpanawno wara tak waihyas hara. Osotîthîrî marha nasî awarpanawno wara.

5-6 Kaamo yenîhra ro mak nasî. Ahce na yîhtînopîra ro mak nasî. Wara rma noro yipu n̂epokaresî cemyawnoyemînhîrî pen yopo. Anarimaw cemyawnoyem na nai pahkî waipîra. 1.000 cimn̂ipu na nai ewrutoponhîrî. Asakî ro na 1.000 cimn̂ipu n̂enatke. Ero yimaw rma tko erepotara nai cemyawno poko, cehtopo poko marha. Ero wa exitaw, Okwe kan̂e me xa nas okwe. Iina re katî tohra tatu? Iina re xa mak tîhcexe.

7 Knahrî yahsîtome mak cetapickexe. Wara rma erepotara rma nasî kropotarî komo okwe.

8 Kir̂wan̂he ma re nai takîhsom komo akpîn komo yopo. Emyawnomra kexitaw wara n̂he ma re tai ketakîretaw kir̂wan me kesenpotome kpoyino komo ya.

9 Wara n̂he tasî censom ponaro mak kexitaw. Mîn hakî xatî me xa natu anarî komo, erepotan me ro mak okwe. Tohnaw ro mak naxe ero yipu ponaro. Ocowo yahsî xatî wara mak naxe noro yipu komo.

10 Pahxa rma tosohtoso xakn̂e ahnoro. Kar̂pera tooto yehtopo nîhtînoyatken̂e pahxan pen komo rma. Kyopono komo yakro etar̂mara ro mak tasî tooto kaxi.

11 Mer̂pora ro mak kîmtapowataw so wahra n̂he mak tak natu kentan̂e komo kîmtapotarî ponaro. Ero ke wara n̂he ma re tatu mer̂pora kîmtapowataw so.

12 Asakî ro mak cenmayasî tan roowo po. Tohnawno me mak cenmayasî tan. Onoke thakwa re n̂ekatîmya kîwya so, Ero wa xa cexpore nai miya roro awaitopo komo pona roro, kacho ha? Onoke thakwa re n̂ekatîmya kîwya so, Ero wara maxe amyamro, kaamo makatawnonho komo amn̂e awaipuche, nîîke onoke ha re? Pîra ro mak, ero yipu yîhtînopîra taxe okwe. Ero wa mak wîîkes ow.