Kir̂wan̂he nai ha re katî, kekotopetopo, cepethîkem. Wara n̂he xa tko tasî kir̂wan me cekaiporesom me kexitaw. Kir̂wan̂he rma re nasî kewrutoponhîrî, kaamo. Wara n̂he xa nasî kwaihtopo, kaamo.

2 Kir̂wan̂he nas ha re kîwtotopo ceseresmaxmu komo mîn yaka. Wara n̂he nasî tîwrataxmu komo mîn yaka kîwtotopo reha. Twaihsom thakwa kîwyam tooto. Ero ke ero wara kehtopo komo ponaro tak na tatu waipîn komo.

3 Kir̂wan̂he tasî kewretaw, wara n̂he tasî ahwora kexitaw. Kir̂wan̂he kropotarî ciin̂e me nasî ewyahwora kehtopo.

4 On wara naxe takîhsom komo, tîwrataxmu komo yaw cexi xe naxe. On wara naxe akpîn kom hara, cewresom komo yaw mak cexi xe so naxe.

5 Akpîn komo wanorî na cencetu enta xe kexitaw so. Wara n̂he xa tko taxe kîtwermacho komo yencetaw, takîhsom komo ya kîtwermacho kom ha.

6 Cetow kesî cekyekyem, ecakyataw tahrem makataw. Ero wara xa marha nasî akpîn komo yewretopo. Tohnaw mak n̂ewrexe kica.

7 On wara natu anarî komo, takîhsomînhîrî tak natu purantanano yowtopo pokono me hara okwe, kicicitho me towtopo pokono me. Ero wa exirî ke so rma akpîra cehsom me tak nat hara kica. Puranta nahsîyatu anarî komo, tîmn̂enhîrî yen̂ekara cehtamci okwe. Ero yipu yahsîtopo n̂ekiciciresî kropotarî komo kica.

8 Ahce na poko kexitaw kir̂wan̂he nai ha re ero yihcitopo. Wara n̂he xa tko nasî ero ciitîkacho tak. Anarî komo naxe tpoyino komo yopono me cesehtînosom me kica. Wara n̂he tasî pahkî ahce na yînîmn̂e me kexitaw.

9 Yohno so yîrwomra ehcoko. Akpîn komo ropotawno ro me nasî yîrwon komo.

10 On wara kahra cexpore nasî, Ahce wa exirî ke so pahxan pen komo xatken̂e cerepore n̂he kyopo so, kahra cexpore. Akpîra mak tasî ero wa ketaw.

11 Kir̂wan̂he nasî yuhnari yîhtînon̂e me kehtopo. Kîîm pen yemyawnonho yahsîtopo wara rma nas okre. Kaamo yenîn̂e komo yerepotacho me nas okre.

12 Kukurunpen̂e mîn takîhso kehtopo. Kupurantan marha nasî kukurunpen̂e me takîhso kehtopo wara rma. Waipîra kiin̂e mînî reha, mîn hak poko kehcamhokacho, takîhso kehtopo marha.

13 Kaan n̂iritho poko ka eserepokacoko. Onoke thakwa re pexunke hara Noro nîkwexixiretho.

14 Esemetanmekîra awexitaw so cerepore ehcoko. Awesenmekyataw so reha on wara kacoko, Kaan n̂iritho rma on kesemetanmetopo kom hara. Noro n̂iritho marha esemetanmekîra kehtopo hara. Ero ke, Ero wa xa was amn̂e pahxaro, kahra thakwa tas okwe.

15 Tohnawno wara wasî tan roowo po okwe. Tan oyexitaw on warai komo ween̂akn̂e, anarî ween̂akn̂e kir̂wan. Noro penî tko waihyakn̂e kir̂wan̂he cexitaw rma okwe. Anarî ween̂akn̂e hara kicicitho tak kica. Noro tko xakn̂e pahkî ro mak waipîra rma. Kicicme roro xakn̂e okwe.

16 Ayopo xa kir̂wan̂he exihra esko. Ayopo xa yuhnari yîhtînon̂e me marha exihra esko. Ahce kacho metwaike amoro rma okwe?

17 Kicicitho me xa exihra esko. Kicicitho poko cesehtînosom me marha exihra esko. Ahce kacho mîwaiya awaitopo mera ka exitaw okwe?

18 Ero wa awehtopo ahsîko, ero warahra awehtopo marha ahsîpînkatîkara esko. Kaan ponaro kexitaw ahce na poko ehtîkara tasî miya xe xa.

19 Kar̂pe xa kiin̂e mîn takîhso kehtopo. Takîhso kexitaw kar̂pe xa tasî 10 antomano rin̂e komo yopo rma, ewto imo pono komo yantoman̂e yopo.

20 Takîhso ehtîkaxapu tko exihra ro mak nasî tan roowo po. Exihnî ro mak mîk kir̂wanî ro, kicicitho ken̂arî pînî ro mak ha.

21 Eserepokara esko tooto komo mtapotarî poko, ahnoro yîmtapotarî poko. Miyan poko rma aweserepoketaw awantonî mtapotarî rma na mence, Kaan ya awîrîmapotopo rma na mence na kopi yîmtapotarî kom ha.

22 Mîhtînoya rma tko aropotarî rma. Emapona anarî komo mîwîrîmapekn̂e Kaan ya okwe amoro rma.

23 Ero wara kehtopo komo wîhtînoyasî takîhso yukukmarî ke owya. On wara wîîkekn̂e, Takîhso men wehtîkesî, wîîkekn̂e cma re. Ero wara oyehtopo tko xakn̂e mooxe okwe.

24 Nai rma takîhso kehtopo. Meyeno wara tko nas okwe. Yuhnaw xa nas okwe. Onoke thakwa re n̂een̂a?

25 Ero ke yuhnari yîhtînotopo ponaro xa tak wehtîkai. Takîhso kehtopo wepor̂akn̂e cerewre ro mak. Ahce wa na kehtopo komo men̂eka xe wîxakn̂e. Ahce kacho kicicitho me kehtopo nai, ahce kacho akpîra kehtopo nai hara? Ahce kacho, Kicicitho mîkyam, kacho me natu panatan komo, wara ro mak kan̂e komo marha? wîîkekn̂e. Ero yipu poko oyehcamhoka xe wîxakn̂e.

26 On wara xa ween̂asî, kicicme ro mak ween̂asî anarî komo, wooxam komo, kîrkomo pohkan̂e komo. Tîmîyen warai yaka ahsîno rin̂e wara nasî noro yipu ropotarî, kamina warai yaka ahsîn̂e wara ha. Kamorî mici wara rma nasî noro yipu komo yamorî okwe. Kaan n̂enîrî mexan me kexitaw so noro yipu ya etahsîpora taxe. Kicicitho pen komo tko nahsîyasî rma okwe.

27 Kaanî mtapotarî yekatîmn̂e ow ha, on wara wîîkesî, anarmerpa kehtopo wentîkai. Ahce wa kiir̂a ero wa kehtopo? wîîkekn̂e. Ero yinhîrî wîîkekn̂e xa hara, Ahce wa kiir̂a ero wa kehtopo hara? Miyanî rma wukukmai anarmerpa kehtopo.

28 Pahkî takîhso kehtopo wepor̂akn̂e. On wara tooto komo yehtopo ween̂e, cewn̂e ciki re ween̂akn̂e takîhsom kîîrî. 1.000 xa hara ween̂akn̂e akpîn komo hara. Ero warahra ween̂e wooxam komo reha. 1.000 poyinonho rma cewn̂e takîhsom yenîhra wîxakn̂e okwe wooxam.

29 On wara xa tko kehtopo komo ween̂e, takîhsom me rma kakîhcetken̂e so Kaan. Anarmerpa so cehtopo komo n̂epor̂axe mer̂pono pîn okwe. Ero wara tooto komo yehtopo ween̂e okwe.