Onoke xa nai takîhso cehsom me? Onoke xa yuhnari yîhtînon̂e me nai? Kewyahworen̂e me nai takîhso kehtopo. Ewyahwora ehxapunhîrî cewtawakem me tak kiin̂e me nasî.

2 Kayaritomo mtapotarî men ewetko. Kayaritomo wewehcasî, mîîkekn̂e towîhnî me ro mak, Kaan metahcakn̂e amtapotachonhîrî yakronoman̂e me. Ero ke amtapotachonhîrî yaw roro men ehcoko.

3 Yohno tohra esko kayaritomo yai. Kicicitho komo mtapotarî yakronoman̂e me exihra ro mak esko. Tanme ro mak kayaritomo nîhtînoya ahce wa na kiitopo.

4 Kyopono me xa nîmtapowasî kayaritomo. Ero ke onoke ma re nîîke yîwya, Ahce poko mai iito okwe? nîîke?

5 Kayaritomo komo mtapotarî yewetîn̂e me kexitaw kerepera nasî noro. Takîhso kexitaw on wara kacho ponaro tasî, Ahcemaw xa tîmtapotapore nai noro yakro? kacho ponaro. Ero wa xa wîîkesî yîwya, kacho marha tîhtînopore nasî. Ero wa tîmtapowasî kayaritomo yakro takîhso kexitaw.

6 Nasî xa, Ero yimaw xa kayaritomo yakro tîmtapotapore nasî ero poko, kacho. Nasî marha, Ero wa xa kapore nasî yîwya, kacho hara. Ero wa kacho tîhtînopore nasî kesenmekyataw rma.

7 Ero wa xa was amn̂e, kahra thakwa tasî. Camkî taxe pahxarono poko. Onoke ma re nîîke kîwya, Ero yimaw xa masî ero wara, kacho?

8 On wara thakwa taxe, kekatî yahsîtîkan̂e me exihra thakwa taxe, waipîn me kehtome so. Kwaihtopo komo yenmamnon̂e me exihra marha taxe. Ketar̂macho wara rma nasî kwaihtopo komo. Ahsîxapu komo yahsîpînkara ro mak naxe ero yipu waapa. Ero wara xa marha nasî kicicme kehtopo komo, ero poko kexitaw kowhra ro mak nasî awipîra kehtome. Ero wara nasî kwaihtopo.

9 Mer̂pono pîn komo yehtopo ween̂akn̂e, kaamo makatawno komo yehtopo. Yin̂irithîrî komo xa ween̂akn̂e. Yuhnari xa yîhtînopu xe wîxakn̂e yin̂irithîrî komo. Ero wara oyexitaw on wara ween̂akn̂e antomano rin̂e komo, tanton komo nantomexe tîwîrîmacho me rma okwe.

10 Anarimaw kicicitho pen komo yokoputho ween̂akn̂e roowo cheka ahruru. Kaan mîn yaka tîtosomînhîrî pen mîkyam xatken̂e. Ahruche so n̂examro pen yehtoponho nîhcamnoyatken̂e okwe enmayipunhîrî komo rma. Tohnaw ro mak xakn̂e ham Kaan mîn yaka totoponhîrî komo okwe.

11 Anarimaw so yohno so kicicme ehxapu komo yen̂ekara naxe en̂ekano rin̂e komo. Ero wara exirî ke tak miya xe xa tak n̂ehtîkexe tooto komo kicicme cexi xatî me.

12 On wara naxe anarî komo, kicicitho poko naxe kica. Emapona roro ero wa naxe 100 ro okwe. Waipîra rma na natu anarimaw pahkî. Wara rma on wara wîhtînoyasî, Kaan ponarono komo xa naxe Noro nakronomarî me. Ero wa naxe Noro poko tweeno kom ha.

13 Kaanî nakronomarî mera reha naxe kicicitho komo. Pahkî xa waipîn me exihra naxe. Ekatî wara mak nasî noro yipu komo yenmacho tan roowo po, kaamo n̂iritho wara. Ero wa naxe Kaan ponarora cexirî ke so okwe.

14 On wara marha ween̂asî anarî komo yehtopo. Tohnaw ro mak noro yipu komo yehtopo ween̂asî. Anarimaw so n̂esemetanmekyaxe takîhsom komo rma okwe. Kicicitho komo yepetho yahsîn̂e wara rma naxe okwe. Anarimaw so marha Kaanî nakronomarî me naxe kicicitho kom hara. Kir̂wan komo yepetho yahsîn̂e wara xa marha naxe noro yipu kom hara. Tohnaw ro mak nasî ero wa kehtopo kom okwe, wîîkai.

15 Ero ke on wara cexpore nas owya, tahwotapore mak nasî, wîîkekn̂e. Ceseresmapore nasî, wooku cerpore marha, tahwore roro cexpore nasî. Ero wara kexitaw so ceserepotanmekyaxe tak kemyawno komo poko, kaamo makatawno poko. Miya roro tahwore taxe kwaihtopo komo pona roro, Kaan nukuknomatho pona roro ha.

16-17 Ero yimaw takîhso kehtopo poko oyehcamhoka xe ro mak wîxakn̂e. Roowo pono komo yetapickacho tak ween̂akn̂e. Miya xe ro mak n̂etapickexe anarî komo Kaan n̂iritho yîhtînotome. Yîwînkîra ro mak naxe katpanaw, kosope marha. Ahnoro Kaan n̂iritho cma re ween̂akn̂e owî. Ahce kacho ero wara ciino n̂iir̂a Kaan, kacho yeyuhtopo yenta xe wîxakn̂e. Ponaro xa na natu anarî komo marha. Wara rma yîhtînopîra rma thakwa taxe okwe. Ahce kacho ero wara ciino n̂iir̂a Kaan, kacho yîhtînopîra taxe. Anarimaw ero poko nîmtapowa takîhsom, Kaan n̂irirî yîhtînotîka xe ro mak wasî, nîîke na. Pîra, yîhtînotîkara rma nas okwe, wîîkesî, Ero wara wîîkesî.