Ero wara kehtopo komo poko kesehtînoyakn̂e. Ero yinhîrî on wara wîîkekn̂e, Kaan xa ahce wa na kiir̂axe so tanme ro mak. Kir̂wan komo n̂iir̂asî Kaan tanme ro, takîhsom komo n̂iir̂asî ero wara. Wara rma pahxaro kehtopo yîhtînopîra ro mak tas okwe. Anarimaw kîîxatî komo chewno me na tatu, anarimaw na kîîxatî pîn komo chewno me na tatu.

2 Ero wara re kiitopo komo kepor̂axe so ahce wa so na cehsom komo. Kir̂wan komo n̂eporasî, kicicitho komo marha n̂epor̂asî etîme re. Ahce warai ciitopo n̂eporasî kir̂wan komo, yusmumnî kom ha, ero warai xa marha ciitopo n̂epor̂asî tusmuyem kom hara. Kaan ya tîmsom tîmn̂e komo, yîwya tîmsom tîmn̂e pîn komo marha, kir̂wan komo, kicicitho komo marha, tîmtapotarî yewetîtopo yetacin̂e komo, tîmtapotarî yewetîtopo yetacitopo pona cerahsom komo marha. Ero wara re kiitopo epono riyasî, cerepore kehtopo, kîwîrîmacho marha. Ero wa taxe ahnoro.

3 Kahwokacho xa mîn okwe ero wara re kiitopo kom okwe, etîme re cesmetanmekyaxe tooto komo ahnoro mak. On wara naxe tooto me ewruxapu komo, kicicitho ponaro xa naxe okwe. Wara ro mak kan̂e me cexi xe naxe kica waipîra ka cexitaw so. Ero yinhîrî tak waixapu komo cheka cexe hara okwe.

4 Waipîn komo chew kexitaw so ka cerepore kehtopo ponaro rma taxe. Wara n̂he nasî xapari waipîra exitaw. Noro pîntho me mak nasî reaw rma twaihso exitaw okwe.

5 On wara taxe waipîn komo, kwaihtopo ponaro taxe. Waihxapu komo reha naxe ahce na ponarora ro mak okwe. Cehtoponhîrî komo yepetho yahsîra tak naxe okwe. Osotî komo meero n̂ehcamnoyas okwe.

6 Cehcamnoso tak nasî ahce na xe ehtoponhîrî komo, ahce na xera ehtoponhîrî komo marha. Tpoyino komo poko tpohnîmtoponhîrî komo marha nasî cehcamnoso. Kaamo makatawno komo yakronomara ro mak naxe ahce na poko exitaw so okwe.

7 Ero ke etocoko, eseresmatatko tahwore. Tahwore marha awokru komo eetatko. Pahxa rma an̂irithîrî komo n̂een̂akn̂e Kaan kir̂wan̂he.

8 Tumutwem yaw roro ehcoko poono yaw. Ehkapecoko roro marha.

9 Tahwore marha ehcoko apici komo yakro, yiixe awehtopo komo yakro. Ero wara roro ehcoko awaitopo komo pona roro. Atî wicakî pahkî na awenmanoketu so Kaan tan roowo po. Tohnaw rma wa taxe tan okwe. Ero warai me tko kakîhcetken̂e so Kaan. Ero mak nasî ahce poko na awehtoponhîrî komo yepetho waipîra ka awexitaw so, kaamo makataw awexitaw so ha.

10 Ahce na exitaw awemyawno komo ero poko xa ehcoko kar̂pe. Amn̂e tak roowo yatumnaka wa mîîcexe hara okwe. Iito tak etapickara thakwa maxe, an̂irirî poko esehtînopîra marha, ahce na yîhtînopîra marha, takîhso exihra ro mak maxe. Ero wa exihra thakwa maxe iina awtoche so.

11 On wara marha ween̂asî tooto komo yehtopo, kar̂pe tîtotopo komo poko cetkukmetaw so iyoponkano cirihra rma na natu kar̂pe tîtosom komo. Tooto komo yetar̂metaw so iyopo so exihra marha na natu karitî komo. Tînahke exihra marha na natu takîhso cehsom komo. Emyawnomra marha na natu anarimaw so ehcamhokaxapu komo rma. N̂esenmetanmekyatu so marha na ahce na poko yaana me cehsom komo okwe.

12 Ero yimaw xa kwaihyasî, kahra thakwa tasî. Mîîye yaka n̂emciyasî ootî twaihkacho yaka. Ahsîtopo yaka marha cesî torowo. Ero wa xa marha n̂emciyaxe tooto kom hara tîwîrîmacho yaka. Ponan̂e rma kepor̂atu so okwe ero wara kiitopo komo. Ero wara tas okwe.

13-14 Pahxa on wara tooto komo yehtopo wencekn̂e. Keserepokekn̂e ro mak noro poko, kaamo makatawno poko rma. Meye tî xakn̂e ewto wahrai mak. Asak mak xatken̂e iipono komo. Iitono komo waparî me takî tî mokyakn̂e kayaritomo yukurumîkno xa kopi. Ewto takî tî wamcetken̂e noro sowtatun komo. Ewto wacan yawkacho tî nakîhcetken̂e waaca mamhoko.

15 Iito tko tî xakn̂e ewto po takîhsom emyawnomnî rma. Noro yipu tî nîmtapowakn̂e cenmayipu komo yakro waapa yen̂epetopo poko. Ero ke cetken̂e hara waapa me mohxapunhîrî komo waihkano cirihra rma. Takîhso yîmtapotarî yanme rma tî cetken̂e okre. Ero yinhîrî tko emyawnomnî poko tî nîtwen̂ekarînwatken̂e hara kica ewto pono komo.

16 Noro yehtoponho yentache owya on wara wîîkekn̂e, Kown̂e me nai ham takîhso kehtopo. Kowhîra n̂he reha nai kar̂pe kehtopo, wîîkekn̂e. Wara rma ero pîntho me ro makî tî n̂een̂atken̂e iitono komo emyawnomnî yehtopo, takîhso ehtopo ha. Yîmtapotarî ponarora takî tî xatken̂e okwe waapa komo toche.

17 Anarimaw yamoro mak nîmtapowatu takîhsom komo. Yîmtapotarî komo ponaro rma tko cexpore nasî tahwore kehtome so. Anarimaw akpîn komo kayaritomon nîmtapowa kar̂pe ro mak. Yîmtapotarî ponarora n̂he tko cexpore nas okwe.

18 Kwaparî komo yopono me rma na re kiir̂atu so raapu, kacipara imo, waiwî kom ha. Kwaparî komo yopono me xa tak kiir̂axe so takîhso kehtopo komo. Wara rma kir̂wan komo yîwîrîman̂e me reha nasî kicicitho cewn̂e rma okwe. Ero wa nasî kicicitho okwe.