On wara marha wîîkes awya so, anarimaw werewere na n̂epîrke kotoporem kwaka, katî kwaka. Waihyasî tak iito rma. Iina epîrkache kotopesî mak kica kotoporemînhîrî. Ero wa xa marha kîwîrîmexe so akpîra kehtopo cik wahrai rma. Anarimaw kponaro so na natu kpoyino komo takîhso kexirî ke. Ero yinhîrî akpîra kexitaw cik hara wahra mak kokem wara xa marha nasî kehtoponhîrî kica.

2 Kar̂me tîtotopo ponaro naxe takîhso komo. Poowa me makî tko tîto xe naxe akpîra cehsom kom hara.

3 Akpîra n̂esenpexe akpîn me cehsom komo esama yaw tîcetaw so rma. Akpîra mak n̂esehtînoyasî kica. Akpîra ehtopo n̂esenpesî mîk hak ya cetaw so rma.

4 Anarimaw apoko so tko nîrwona akayaritomon komo. Ero wa exitaw apoko so iito mak ehcoko emahcira. Eserepokara mak awexitaw so kicicme xa awehtoponhîrî komo ponarora tak na nai.

5-7 On wara xa ciino ritopo ween̂asî anarimaw kayaritomo komo, kaamo makatawno komo, kicicme ween̂axe so tmaywen komo poko. Anarimaw so akpîn komo n̂iir̂axe mer̂pono pîn komo yantoman̂e me kica. Cemyawnoyem komo reha n̂iir̂axe enîno rin̂e pîn me mak. Tooto yanton komo ween̂asî kawaru mkaw tîtosom me. Ero yimaw rma ween̂asî antomano rin̂e komo totopo tîhtarî komo po mak, anto komo wara rma okwe. Ero wara ciino ritopo ween̂asî kayaritomo komo ya okwe.

8-9 On wara marha kehtopo ween̂asî, ewtarî yahtoche kîwya so iina rma na cepîrketu kîwyamu rma oko. Mîîmo wacan yawkache kîwya so okoyi na keske oko. Toopu towrî poko kexitaw so ero rma na kamoyapikmetu so oko. Weewe kararakarî poko kexitaw ero rma na kamokr̂amanke oko.

10 Iyohra na nai anarimaw kyawakan. Ero yipu iyohtora kexitaw kar̂pe n̂he thakwa tar̂mesî yawaka weewe yamachome. Takîhso kexitaw reha kemyawno cicir̂asî ehn̂ara rma.

11 Waano yentara ka cexitaw na okoyi keske oko. Ero wara rma nasî ero pîntho poko tîmtapotatîkaxmu komo.

12 Tpoxwe nasî takîhsomu mtapotarî okre. Akpînî mtapotarî reha nasî noro yîwîrîman̂e me rma okwe.

13 Yihcirî me yîmtapowataw akpîn ero pîntho poko mak nîmtapowasî. Ero yinhîrî kicicitho me ro mak nîmtapocetîkesî kica.

14 Mer̂pora ro mak nîmtapowaxe akpîn komo. Taa, ahce wa na tatu pahxaro? Ero yîhtînon̂e exihra ro mak nasî tooto. Onoke thakwa re n̂ekatîmya akpîn ya, Ero wa xa mai pahxaro, kacho ha?

15 N̂ekar̂kesî mak akpîra cehsom komo cetapicketaw so. Camkî mak n̂een̂axe esama ewto imo yakanî rma kopi.

16 Taa, anarî rowon pono komo amyamro, on wara wîîkes awya so, metwîrîmexe ro mak men okwe rikomo warai me mak exitaw akayaritomon komo. Metwîrîmexe marha awantoman̂e komo wenataw pahxaxaro rma okwe.

17 Tawake tko maxe amyamro rma kayaritomo yepamtho me exitaw akayaritomon. Awantoman̂e komo marha na n̂eseresmetu keseremetopo me exitaw mak. Wenîmtome eseresmara marha natu, kar̂pe cehtome so mak n̂eseresmetu. Ero wara exitaw awantoman̂e komo tawake maxe okre, wîîkesî.

18 On wara nasî tuwun̂urem mîn, n̂ewananîyasî mak makwanan okwe. Ahce na cirihra ro mak exitaw tîmîn yakir̂wamacho nîkrokwasî tak yîmîn okwe.

19 Kpoyino komo yakro ceseresmexe kewretome so. Tahwore taxe okre wooku yeer̂ataw. Ahnoro mak tahsîyasî puranta pona reha.

20 On wara marha wîîkes awya so, akayaritomon komo yîwîrîyakara ro mak men ehcoko. Ahnaw so rma yîwîrîyakara ehcoko. Cemyawnoyem komo yîwîrîmacho an̂ikîra marha ehcoko. Awîntopo komo yaw rma an̂ikîra ehcoko, amtakpo yaw. Anarimaw kaikokoro cee torowo amtapotachonhîrî komo yaan̂e kopi. Torowo rma na cee amtapotachonhîrî yekatîmso kopi. Ero wara men nas okwe kehtopo komo.