Taa, Isaias ow ha, Amos mumuru. Kaan n̂enpotho ween̂akn̂e Xuta pono komo pokono, Xerusaren pono komo pokono marha mîn ween̂akn̂e. Emapona roro ween̂akn̂e. Yaake xatken̂e Xuta pono komo kayaritomon komo ero yeen̂ataw owya. On wara xatken̂e n̂examro kayaritomon komo ero yimaw, Usias ka xakn̂e kayaritomo me. Amn̂e een̂ataw xa hara owya, Xotaw tak xakn̂e hara, Akas tak, Esekias tak hara. Ero wara xatken̂e Xuta pono kayaritomon komo Kaan n̂enpotho yeen̂ataw owya.

2 Ai, kah yawno komo, omtapotarî ka entacoko. Roowo pono komo, awya so wekatîmyas hara. Kporin komo rma nîmtapowakn̂e. On wara kekn̂e, Omxîkrî komo Ow por̂mamnoyakn̂e. Cetîtîkaxi ro por̂mamnoyakn̂e. Wara rma oyanwekn̂e me naxe okwe.

3 Ahce wa nai awoh kom hara? Tosomî rma n̂een̂asî paaka. Buhu marha tosom n̂iritho n̂een̂asî cuupu yen. Camkî mak naxe Ixaw Yana komo reha, takîhso esehtînopîra ro mak naxe oyanan komo okwe.

4 Okwe ro mak okwe, wîîkesî n̂examro poko. Kicicitho re mîkyam ham kayaritomo maywen komo. Kicicitho ke tîmponoyem warai komo mîkyam okwe. Kicicitho xîkrî re mîkyam okwe, kekatî matacho pokono mak. On wara naxe n̂examro, Kporin komo nahsîpînketken̂e okwe. Kir̂wanî ro Mîk, ponaro Ixaw Yana komo yehtopo cma re. Noro yipu rma nîrwonmekyatken̂e. Yîhyai cetaknamaxmu wara xatken̂e okwe.

5 Ahce kacho cerewrem ke tpanaresom me mehtîket okwe. Cetanwesom me mehtîketu rma okwe. Ereh ken̂e ro mak nasî ahtîpîrî komo ahnoro. Kar̂pera ro mak maxe aropotaw so.

6 Kir̂wan̂he exihra ro mak nasî apun komo. Ahtarî n̂ixa ro rma nasî ero wara ahtîpîrî meretkoso rma. N̂erewas oko awetapachonhîrî komo, kamxukre nasî awetamatoponhîrî komo oko, aweparaxkachonhîrî komo marha. Ereh ken̂e marha maxe oko. Korokan wara rma nasî awerekrî, yimihnî wara mak okwe. Ehceman wara ro mak nas okwe.

7 Pohnî me ro mak nasî arowon komo. Cecahso tak nasî awewtonthîrî komo okwe. Amararîn komo pono naatîkexe okwe anarî yana komo. Awero ro so rma naar̂axe. Ahce na exihra ro mak nasî arowon komo po. Waapa nîwîrîmatho me mak nasî. Ero wa nasî.

8 Ero ke on wara tak nasî Siaw yemsîrî, pohnîtho wara mak nasî mîîmocitho wara, uupa yatî chewno wara. Mîîmocitho wara mak nasî, pepinu yatî chewno wara. Ewto wara marha nasî waapa ke mamtoxapu wara. Ero wara mak nasî Siaw yemsîrî.

9 Asak mak kpoino komo nîmcekn̂e Kporin komo, kantoman̂e ro, asakî xa mak ha. Yîmtora exitaw ketaw ha re Sotoma pono komo wara thakwa re tasî, Komoha pono komo wara ha re okwe.

10 Ero ke Kporin komo mtapotarî tak entacoko amyamro, Sotoma pono komo yantoman̂e kom ha. Kaan ya kpanatanmetopo komo men entacoko amyamro Komoha pono komo.

11 Mer̂pono pînî ro mak awoh komo pun makn̂iyaxe owya tîmsom me. Tpoxwe ma re nai ero yipu owya? nîîke Kporin komo. N̂eexi tak awoh komo puntho yakn̂itopo owya tîmsom me. Kahn̂eru pun xera tak wasî, awoh komo pen katîtho xera marha wasî, tupurukyem katîtho xera meero wasî. Poxumra ro mak nas owya bui kamxukutho, oper̂a xîkîtho kamxukutho, boce kamxukutho marha.

12 Ohyaka amokyataw so onoke xa nîîke awya so, Kaan mîn roron pona rma ehcoko awoh komo, nîîke onok ha na?

13 N̂eexi tak awoh komo yehtopo ohyaka. Tohnaw ro mak mekyaxe kica. Poxumra ro mak nas owya kotoporem yakn̂itopo awya so. Mesenmekyaxe rma re nuun̂i yepataketaw roro, awepokaretopo po roro marha. Opokono wara rma re mesenmekyaxe. Kicicme rma tko maxe awesenmekyataw so kica. Ero wa awehtopo komo yînmîra ro mak tak was okwe.

14 Poxumra ro mak nas owya awesenmetopo komo nuun̂i yepatakacho yimawno, ahcemaw so na awahwotacho kom ha. Tawsîn̂em wara nasî owya kica. Ero wa awesenmetopo komo wînîmkayas okwe.

15 Anarimaw so cma re mapockanwaxe oyakro amtapotaw so. Ero wa awexitaw so kesewyahruyasî mak tak awenîra so oyehtome. Emapona amtapowataw so rma oyakro awentara so wasî. Tooto pen kamxukutho ken̂e xa nasî awamorî komo okwe.

16 Ekorokacoko tak ha, esmunkacoko ro makî. Kicicme awehtoponhîrî komo yenî xera ro mak tak wasî. Ero ke ahsîpînkacoko tak ha.

17 Kicicme exihra tak ehcoko, kir̂wan̂he awehtopo komo poko tak ehcamhokacoko n̂he. Yaaro mak en̂ekano ciitopo ponaro tak ehcoko. Emetanmekno rin̂e komo en̂ekacoko. Yîmîhnî komo yemetanmekn̂e komo panarecoko. Iin̂o waixapu komo akronomacoko amtapotarî komo ke noro yipu komo yen̂eketaw tohnaw.

18 On wara marha wîîkes awya so, Aporin komo Ow wîîkesî, ohyaka amohcoko. Cesentacerî ka awehtoponhîrî komo poko. Cucurem wara rma nasî kicicme awehtoponhîrî komo. Wara rma tumutwe xa tak nas amn̂e n̂eepi wara rma okre. Cucurem wara xa nas okwe awehtoponhîrî komo, wara rma kahn̂eru poci wara mak tak nas amn̂e okre.

19 Ero wara awexi xe na matu, oyewetîn̂e me awexi xe na matu. Ero wara awexitaw so tpoxwem tak mahyaxe okre amararîn komo pono.

20 Ero wara awexi xera rma tko na matu. Ero ke omtapotarî yanwekn̂e me rma awexitaw so mîwaiyaxe tak men okwe kacipara imo ke paraxkaxapu me rma. Owî rma ero wara wîîkes awya so, Aporin komo Ow ha.

21 Kir̂wan̂he cma re ka xatken̂e iitono komo, ewto pono komo. Oponarono me xatken̂e etowîn me ro mak ha ka. Oroto tak mîk hak pokono wara naxe wooxam wara. Yaaro mak ciino rin̂e me xatken̂e iitono komo pahxa. Takîhsom komo yeken me makî ka mîn xakn̂e ewton komo. Oroto tak waihkano rin̂e komo yeken me mak nas hara okwe.

22 Prata wara ka xakn̂e awehtopo komo. Oroto tak awehtopo komo nasî prata smuntho wara mak okwe. Tpoxwe ka xakn̂e awokru komo okre. Oroto tak nasî xukrape ro mak kica.

23 Kanwekn̂e komo mak mîkyam awantoman̂e komo okwe, cen̂epan̂em yakronoman̂e rma kica. On wara kexe yîwya so kicicitho komo, On ahsîcoko awepethîrî komo, oyen̂ekara awehtamci, kexe. Tpoxwe n̂encexe ero wa kacho kica. Miya so cexe tîwya so tîmsom yahsîtome. Yîmîhnî komo yukurunpera rma naxe okwe. Iin̂o waixapu komo yemetanmekn̂e komo yen̂ekara marha naxe okwe.

24 Ero ke on wara tak kesî Kporin komo, kantoman̂e ro Mîk kesî, Ixaw Yana komo yecehton̂e ro ha, Taa, ooxera cehsom komo kr̂a tak wen̂epesî. Ooxatî pîn komo poko tak kesepanîyasî.

25 Awemetanmekn̂e me tak was Ow hara. Prata smuntho warai tak wowtîkesî, akro esmaxapunhîrî komo. Ero pîntho wara ehxapu komo tak wowyasî achewnonhîrî komo.

26 Kir̂wan komo tak wiir̂asî awen̂ekan̂e komo me, pahxa xatken̂e ero warai komo xa hara. Pahxa kir̂wan komo xatken̂e akayaritomon komo yakro cesentaxmu komo. Ero warai komo tak wiir̂as hara amn̂e. Ero yimaw tak, Kir̂wan komo yewton mîn, kacho me tak nas awewton komo, Kemîknon̂e pîn komo yewton mîn, kacho me marha nasî.

27 Kir̂wan komo yewton, kacho me tak nas hara Siaw, yaaro tîmtapotaxmu me cexirî ke so tak iipono komo. Kir̂wan me tak naxe iitono komo, cehtoponhîrî poxunkan̂e komo. Ero wara n̂examro wakir̂wamesî.

28 Kaan tak waihkesî tîmtapotarî yanwekn̂enho pen komo, kicicme ehxapunhîrî pen komo yakro rma. N̂exponkexe tak Kporin komo yahsîpînkan̂e pen kom okwe.

29 Kahpar̂u yepu xe xa mîxatken̂e. Kir̂wan marha mîmen̂eketken̂e naatî yewtî mko. Mîhyapamyaxe takî tko yiixe awehtoponhîrî komo pona rma.

30 Kahpar̂u yepu wara rma tak maxe aawaixapu wara. Naatî yarî wara marha mîxamanwaxe tîpîhnî yarî wara ha.

31 On wara naxe karitînhîrî pen komo, wehto yetahsîtopo wara tak naxe. N̂examro n̂iritho nasî poturem wara hara. Asakno roro rma n̂ecahtîkexe okwe. Wehto yeihkan̂e exihra ro mak tak nas okwe. Ero wa maxe amn̂e okwe.