Oyepeka me awexi xe wasî. Yememe nwokpatho mîkro moomo ke. Noro warai me awexi xe wasî. Ero me awexitaw ketaw re anarimaw na keen̂a katpanaw. Iito so awen̂ataw owya kewcokesî. Ero poko oyen̂ataw owîrîyakara natu iitono komo.

2 Yememe mîn yaka marha kekyasî, ohcamhokan̂enho mîn yaka. Iito tak kwokpesî poxurexapu ke wooku ke. Onatîrî yeperîrî ke kwokpesî roman yukun ke.

3 Poowa me ohtîpîrî n̂ecehcesî noro. Eeco ke hara opun nahsîyasî.

4 Ai, emasî komo, Xerusaren pono komo, on wara wîîkes awya so, yiixe oyehtopo men enpakara ehcoko. Tanme ro mak pakape amn̂e, wîîkesî.

5 Onoke mîkro mehxa tmohsom axawa imo n̂ixa? Yiixe cehtopo yaporî yaw mokyasî onoke? Masan yepu yapomyaw awexitaw kenpaka. Iito rma anocwan n̂ewruyakn̂e aame. Iito aame n̂ewruyakn̂e tîropotawnonhîrî. Iito rma kenpaka.

6 On wara xa wîîkes awya, ow tak yîhtînoko aropotarî yahkoromacho wara, awaporî yahkoromacho wara marha. Karitî ro mak mîn etîxe kehtopo, kwaihtopo wara rma nasî kar̂pe xa. Kîpînîn yawno pîn wara ro mak nasî kewyomacho, okoputho yewtarî wara. Wehto wara nasî, mararî yecakyatawno wara ro mak oco.

7 Tuuna mokyataw mer̂pora ro mak, etîxe kehtopo yeihkara rma nasî. Tuuna yukmache etîxe kehtopo yarîhra rma nasî. On wara na nîîke cemyawnoyem yipici xatî ya, Yiixe awehtopo cma re wowyasî epethîrî pona. Oyemyawno ahnoro wîmyasî awya noro yepetho me, nîîke. Ero wara ketaw kîwya epethîrî yahsîra ro mak nasî. Kica nîîkesî ro mak epethîrî poko.

8 Taa, on wara wîîkes hara, amna yakno nasî emasîntan ha ka. Etawkara ka nasî noro manatîrî. Amn̂e tak na noro pokonome kar̂pamxan, Noro xe cma re wasî opici me, nîîke. Ahce wa noro cicir̂a ero yimaw?

9 Waaca wara rma exitaw mîîmo warai cicir̂asî noro pona, prata ciixapu warai. Metata wara exitaw noro tîtwacancesî setru ke, sahsamaxapu ke.

10 Waaca warai xa marha ow hara. Mîîmoci wara nasî omanatîrî, waaca pono wara. Ero ke kir̂wan̂he xa oyen̂asî oyin̂o. Noro yereporen̂e me wasî.

11 Saromaw natîrî xakn̂e Baaw Amon po. Uupa yatî mîn xakn̂e. Ero tî nîmyakn̂e anarî komo yemyaka. On wara kekn̂e eperîrî yahsîn̂e komo ya, Eperîrî yepetho ehcoko amn̂e exepeyu, prata ha. 1.000 wicakî so ehcoko ahnoro apoko hakî so, kekn̂e yîwya so.

12 Onatîrî marha nasî tan, owyanî ro. Epethîrî ahsîko amoro rma, Saromaw, yiixe awexitaw, 1.000 sikru ahsîko ha. 200 wîmyasî marha onatîrî yenîn̂e komo ya epethîrî komo me.

13 Ai, naatî yewtî pono amoro, yakeno ke tmayweyem amoro awya wîîkesî, amtapotarî yenta xe wasî.

14 Amok ha yiixe oyehtopo. Pixkaru wara esko. Kooso kîîrî wara esko, kar̂pamxan me cehsom wara. Ero wara esko îh po so, knahrî poxuretopo ken̂arî po so. Ero wara xa esko.