Ero yinhîrî on wara kacho tak ween̂akn̂e hara ow, Isaias, Amos mumuru ha. Xuta pono komo pokono xa hara mîn ween̂akn̂e, Xerusaren pono komo pokono marha.

2 On wara tak nasî Kporin komo mîn amn̂e, eromanhîrî kaamo pahnoke exitaw, Îîpî mko meretwo tak nasî. Matîwîn komo yopo ro mak nasî. Ero pona tak mokyaxe mîk hak rowon pono komo ahnoro.

3 Mer̂pono pîn komo mokyaxe anarî yana komo. On wara kexe, Kaikatko Kporin komo yekenî ro pona îh pona. Kaan mîn iito nasî, ponaro Xako yehtopo mîn. Ero yaka kaikatko. Noro tak kîhcamhokexe so cehtopo poko. Noro yehtopo yaw roro rma tak taxe okre, kexe. Ero yimaw Siaw po tak nîmtapowasî Kporin komo kpanatanmetopo komo me, Xerusaren po nîmtapowasî. En̂exa tak n̂etakpayasî yîmtapotachonhîrî kpanatanmetopo me.

4 Ero yimaw etpoko exitaw so mîk hak rowon pono komo, Noro rma kicicme ehxapu komo n̂en̂ekesî. Noro rma yîtîtmamnono n̂iir̂asî anarî yana komo eseixapunhîrî komo. On wara tak naxe roowo poko hakno komo, tîkaciparanthîrî komo n̂iir̂axe roowo pomotopo me hara, tîrahnuthîrî komo tak n̂iir̂axe naatî yatkacho me hara. Waapa me tohra ro mak tak naxe mîk hak rowon pono komo. Waapa me tîtotopo komo poko ehcamhokara ro mak tak naxe okre.

5 Amohcoko amyamro Xako yepamtho komo. Kweipexe so tak Kporin komo okre. Ero ke Noro weyuru po cetaricerî.

6 On wara tko mai ham Apa ayanan komo poko, Xako yepamtho komo poko, n̂examro mahsîpînkai okwe. On wara naxe kica, kaamo yepatakacho n̂ixan komo yehtopo ponaro mak naxe, anarî ro poko ehtopo komo ponaro kica. Pahxarono marha n̂ekatîmyaxe cehtopo komo, Piristew komo wara rma. Anarî yana komo yakrono ro me marha naxe okwe.

7 Tawronohkatîkaxi nasî ayanan komo rowon prata ke, ooru ke marha. Enatîn me ro mak nasî n̂examro yemyawno, cepethîkem kom ha. Miya ro mak nas iyoh komo kawaru komo, yîrowon komo poko hakî. Enatîn me ro mak nasî n̂examro tararan.

8 Tawronohkatîkaxi nasî yîrowon komo marha mîk hak wara ciixaputho mko ke, ponaro ehtopo komo ke kica. Oporin xa amoro, kexe ero yipu ya. Tamorî ke tîn̂irithîrî komo ya rma kexe kica.

9 Ero yipu mamakan me nutupenwaxe. N̂esewnapexe ro mak okwe. Ero ke kicicme ehtoponhîrî komo yîhcamnopîra ehcoko ha.

10 Yukurumîkno me xa tak n̂esenpesî Kporin komo amn̂e. Kayaritomo me xa tak n̂esenpesî. Ero ke tak toopu cheka eseyamcoko ero yimaw, roowo cheka marha.

11 Ero yimaw on wara tak maxe, kyopono me cesenposom komo n̂enpesî Kporin komo yîxawyakan me xa matko. Ero wara n̂enpesî, Takîhsom xa ow ha, kan̂e komo. Tuupe cewruno me tak noro yipu komo n̂iir̂asî. Ero yimaw tak Kporin komo mak n̂esenpesî, kyopono xa ha.

12 En̂ekano tak n̂iir̂asî Kporin komo amn̂e. Ero wara ciino ritopo me enmayataw tak, Ow ha takîhsom, kan̂e komo nar̂mesî, kyopono ro me cesenposom kom ha. Noro yipunhîrî komo tak n̂iir̂asî kyopono mera ro mak tak.

13 Ero wara n̂iir̂asî setru yepu ahnoro Ribanu pono komo, kawno komo, anarî komo yopono kom ha. Kahpar̂u yepu marha ero wa n̂iir̂asî Basan pono mko ha.

14 Ero wa xa marha n̂iir̂asî îîpî, kawno komo, matîwîn komo marha anarî komo yopono kom ha.

15 Ero wa xa marha n̂iir̂asî mîîmo, kawno komo ahnoro, waaca marha ahnoro ero wara n̂iir̂asî, sowtatu mîn ke tkanahtawnoyem kom ha.

16 Ero wa xa marha n̂iir̂asî Tahsisi pono komo kanawarî ahnoro. Kir̂wan komo ero wa n̂iir̂asî kanawa komo.

17 Ero wara cehcoyoponkaxmunhîrî komo n̂iir̂asî, anarî komo mamawno me n̂iir̂asî. Ow xa wasî ayopono me so, kan̂enhîrî komo tak n̂iir̂asî anarî komo mamawno me xa. Kporin komo mak tak n̂esenpesî kyopono komo me ero yimaw, en̂ekano ritopo po.

18 Noro rma tak nîhcamnotîkesî mîk hak wara ciixaputho mko, ponaro tooto komo yehtoponho pen ahnoro.

19 On wara n̂esenpesî Kporin komo ero yimaw, kayaritomo me xa tak n̂esenpesî kir̂wanî ro me. Yukurumîkno me marha n̂esenpesî. Ero wa n̂esenpesî cekaricetaw roowo yewsîrî poko. Ero ke toopu yaka tak n̂eseyamyaxe tooto komo ero yimaw ewtarî yaka so. Yuhnawno yaka marha n̂eseyamyaxe ewtarî yaka so.

20 Ero yimaw tak nar̂mexe, ponaro cehtoponhîrî pen komo. Oporin amoro, kachonho tîwya so, prata n̂iir̂atken̂e ero yipu me, ooru marha anarimaw. Ero yipu pen tak nar̂mexe kr̂a cawa yaka, rere yaka marha.

21 Ewtarî yaka tak n̂emahciyaxe tooto komo toopu yetîmtakaxapu yaka. Toopu makataka marha n̂emahciyaxe. Iina so n̂emahciyaxe Kporin komo yai cerahtîke so kopi. Yukurumîkno me xa tak n̂esenpesî Noro ero yimaw. Kayaritomo me marha n̂esenpesî kir̂wanî ro me. Ero yimaw marha n̂ekaricesî xa tak roowo yewsîrî poko. Ero ke n̂emahciyaxe okwe.

22 Ero ke tooto komo pona enîhra tak ehcoko. Cewnarî yaro mak n̂ehsesaxe tooto komo. Aweceton̂e komo me ma re natu noro yipu komo awya so?