On wara tak nasî Kporin komo Xuta pono komo poko, Xerusaren pono komo poko marha, iitono komo yemyawnonho pen tak nowyasî, yupurantanthîrî pen komo marha. Yînaputhîrî komo marha nowyasî, yutunathîrî komo marha napainokes okwe.

2 Karitî komo ke yîchewnomra tak n̂examro wiir̂asî, sowtatu komo ke yîchewnomra marha. En̂ekano rin̂e komo ke marha, weronoman̂e komo ke, amn̂e kehtopo yenîn̂e komo ke, poritomo komo ke, noro yipu ke yîchewnomra n̂examro wiir̂as okwe.

3 50 komo yantoman̂e komo exihra marha naxe yîchew so, takîhsom komo, kayaritomo yakro cesentaxmu komo, yaana komo ahce na ciitopo pokono, eremkano rin̂enho komo, noro yipu komo ke yîchewnomra tak naxe amn̂e okwe Kporin komo yanme rma.

4 On wara kesî Noro, rikomo komo mak tak wiir̂asî n̂examro kayaritomon me. Ewruxan komo mak naxe n̂examro yantoman̂e me kica.

5 Ero yimaw n̂esemetanmekyaxe tak n̂examro re rma okwe. Mehxarpa n̂esemetanmekyaxe. Tîmîtwono pen komo rma n̂emetanmekyaxe kica. Camra ro mak tak nîmtapowaxe rikomo komo poritomo komo yakro kica. Camra marha nîmtapowaxe akpîntho komo takîhso komo yakro kica.

6 Ero yimaw tak takno yaporî poko tak nahsîyaxe iitono komo tîîm komo mîn yawno rma. On wara kexe yîwya, Tponoyemu cma amoro. Ero ke amna yantoman̂e me esko. Ontho mîîmotho yosom me tak esko amoro, etawkatîkaxaputho yosom me, kesî.

7 On wara tko kesî noro yîmtaka hara, Awehci komo exihra ro mak nas ohyaw. Omîn yaw exihra ro mak nasî knahrî, poono marha. Antomano rin̂e me ow cirihra ehcoko, kesî noro hara okwe.

8 Ehrokaxapu wara mak naxe Xerusaren pono komo, epîrkaxapu me marha naxe Xuta pono komo ahnoro. Kporin komo xatî pîn me nîmtapowaxe kica. Noro yanwekn̂e me marha naxe okwe. Kir̂wanî ro Mîk Kporin komo. Noro yipu rma kicicitho me n̂een̂axe okwe. Ero wara naxe Xuta pono komo Kporin komo poko.

9 Kicicitho yewke rma naxe kica. Kicicme ehtopo komo n̂esenpesî ewru komo ke rma kica. Kicicme cehtopo komo n̂ekatîmyaxe Sotoma pono pen komo wara rma kica. Kicicme cehtopo komo yeyamra ro mak naxe. Ero ke n̂etwîrîmatîkacowpe ro mak okwe. Tîwîrîmacho komo yan̂ikn̂e me rma naxe n̂examro rma okwe.

10 On wara tko kacoko takîhsom komo ya, Awakronoman̂e komo me reha tak nasî Kporin komo. Kir̂wan̂he awehtoponhîrî komo yeperîrî warai tak mahsîyaxe okre amn̂e.

11 Okwe, kapore ro mak nasî kicicitho komo poko reha. N̂etwîrîmetîkexe ro mak n̂examro okwe. Kicicitho me cehtoponhîrî komo yepetho men nahsîyaxe amn̂e.

12 Rikomo komo rma naxe oyanan pen komo yemetanmekn̂e me okwe. Wooxam komo naxe kayaritomon komo me. On wara wîîkes awya so oyanan komo ya, anato mak apanatanmekyaxe so apanatanmekn̂e komo okwe. Esama poko awewkukman̂e me mak naxe okwe.

13 Ero ke yîmtayar̂man̂e komo me tak nawomyasî Kporin komo. Piiri nawomyasî tîyanan komo yen̂ekachome.

14 Tîyanan poritomon komo xa n̂en̂ekesî, antomano rin̂e komo marha. On wara kesî yîwya so, Amyamro xa onatîrî warai mîwîrîmexe okwe uupa yatî pen warai. Cesemetanmesom komo yemyawnonho nasî amîn komo yaw so. Anarîthîrî komo rma mîn okwe.

15 Ahce kacho oyanan komo matmunukyatu ro mak okwe? Ahce kacho cesemetanmesom komo yeepatarî yakihn̂e wara mat hara okwe?, kesî. Ero wara kesî Kporin komo awya so, kantoman̂e ro Mîk ero wa kesî.

16 Taa, on wara kesî Kporin komo wooxam komo poko hara, Cehcoyoponkaxmu me naxe kica wooxam komo, Siaw yemsîrî komo. Tîpîmîrî komo n̂ehyatkexe cetar̂ataw so kica. Kîrkomo n̂entîkexe pohkachome so. Sah sah me mak n̂etar̂axe kica. Yoroyoro nîyorwasî yîhraknu komo pokono.

17 Ero wa exirî ke so wooxam komo tîpîrî takî n̂erekresî Kporin komo. Ero wa n̂iir̂asî wooxam komo Siaw pono kom ha. Kanahmurinkesî meero, pononkesî marha.

18-23 Ero yimaw tak wooxam komo porokutho nowyasî Kporin komo. On warai komo nowyasî, Yîhraknumcithîrî komo, arokothîrî komo, wathîrî komo, panatarînthîrî komo, emeknumcithîrî komo, eewoponthîrî komo, yîhtîpîrî komo porokutho, resmithîrî komo, aan̂apotunthîrî komo, kotoporem yenho, yîhyasîthîrî komo, amoyeknathîrî komo, ewnarî yakanthîrî komo, pononthîrî komo cepethîkem, pononthîrî komo yîmkarinonhîrî, pononthîrî komo yahcono, pakaranthîrî komo, kanapanthîrî komo, pononthîrî komo riin̂u kahxapu, yîhtîpîrî komo womînho, ponon komo motawnonhîrî, ero warai komo kr̂a nowyasî Kporin komo wooxam komo porenomachonho.

24 Kotopore exihra tak naxe, kokem me mak tak naxe kica. Aan̂apotunthîrî komo yekenho to tak nasî ruuputho mak okwe. Yîhpocithîrî komo, anarmerpa so ciixaputho exihra tak nasî. Kanahmuri yaw so mak tak naxe okwe. Pononthîrî komo exihra tak nasî cepethîkemînhîrî pen. Kumixitho mak tak nasî ponon komo me. Ceepataporemînhîrî tak naxe ecahxapu yotho ken̂e mak eepatarî komo okwe.

25 Ero yimaw marha akîrîn komo waihyaxe kacipara imo ke oko. Karitî pen komo waihyaxe okwe cetar̂metaw so.

26 Tîwrataxmu wara tak nasî Siaw wacan metatan komo okwe. Pohra ro mak tak nas ewtotho. Roowo pona ceremaxmu wara mak naxe okwe Siaw yemsîrî komo okwe. Ero wa naxe amn̂e.