Ero yimaw on wara tak naxe wooxam komo, 7 wooxam komo nahsîyaxe kîîrî yamorî, cewn̂e kîîrî. On wara kexe yîwya, Ai, on wara kes amna awya, apici warai me amna ahsîko awosoken me tak amna yehtome. Tînahrî rma amna nahyasî, tpononî rma amna namruyasî. Awosoke mak cexi xe nas amna yîhyapamra tak amna yehtome.

2 Ero yimaw tak kir̂wanî ro me tak nasî Kporin komo peremru warai, cenpore xa. Ero yimaw marha tpoxwem me tak n̂eperwasî Kanan pono komo natîrî okre. Ero ke tahwore tak naxe Ixaw Yana komo, etîmtoxapu kom ha.

3 On wara kacho me tak naxe Siaw po etîmtoxapu komo, Xerusaren po etîmtoxapu kom ha, Kaan yananî ro komo mîkyam, kacho me naxe. Ero wa naxe karita yaka osotî mewrexapu komo, Waipîn Komo Yosotî Tan, kacho yaka mewrexapu kom ha.

4 Ero yimaw tak wooxam komo korokesî Kporin komo, Siaw pono komo, kicicme ehtoponhîrî ke tusmuyem komo. Xerusaren pono komo marha korokesî, yînwaikathîrî pen komo kamxukutho ke esmurexapu. Cekatî ke rma korokano n̂iir̂asî. En̂ekano rin̂e ro Mîk Noro Yekatî, akn̂ino rin̂e ro marha Mîk. Noro ke korokano n̂iir̂asî.

5 Ero yimaw tak kaapu smun n̂iir̂asî Kporin komo Siaw Yîpîn yahruru me. Iitono komo mîn yahruru me nasî, etpoyino pîn yahruru me. Esenmexapu komo yahruru me marha nasî. Katpanaw yîsîn nasî ahruru me, kosope wehto tak nasî katparen̂e me hara. Kir̂wanî ro me Kaan yehtopo mîn ero wa nasî.

6 Ero rma tak nasî iitono komo mîn me. Ero yaka n̂etkurunpexe puu ketaw ocowo kar̂pe, tuuna mokyataw marha mer̂pora. Ero warai n̂iir̂asî Kporin komo Xerusaren pono komo yukurunpetopo me amn̂e.