Oroto tak kewanomesî yiixe oyehtopo n̂entarî me. Noro natîrî pokono tan waar̂asî waano, uupa yatî pokono. Yiixe oyehtopo natîrî nai uupa yatî. Îh po nai, ewtî mexan po.

2 Pahxa ewtî pomekn̂e Noro, toopu marha nar̂mekn̂e iitononhîrî. Ero yinhîrî uupa yatî n̂iir̂akn̂e iina, cepetaxmu xa okre. Ewtî rakataw mîîmo n̂iir̂akn̂e kawno. Ero mîtkoso marha eperîrî yewkukacho n̂iir̂akn̂e hara. Taa, kekn̂e tak ciin̂enhîrî, Kir̂wan me tak n̂eperwasî okre amn̂e, kekn̂e. Okwe, apupnî me mak tko n̂eperwakn̂e kica.

3 Ero ke on wara wîîkes awya so Xerusaren pono komo ya, Xuta pono komo ya ahnoro. Ahce wa nai awya so, ahce kacho kir̂wan me epetara n̂eexi onatîtho? Oyanme katî ero wa xakn̂e? Tanmero rma katî ero wa xakn̂e?

4 Ahce wa xa katî cirpore xakn̂e onatîtho? Kir̂wan̂he ro mak wiir̂akn̂e. Ahce kacho oyemîknon̂e me xakn̂e kica? Kir̂wan me n̂eperwasî amn̂e okre, wîîkekn̂e cma re. Okwe, kicicitho me makî tko n̂eperwakn̂e kica. Ahce kacho ero wara xakn̂e okwe?

5 Ero ke on wara ka xe was awya so, on wara tak wiir̂asî, onatîrî wacantho warai mohkesî, naatî wara atîhtaxaputho. Wakn̂iyasî kr̂a tak. Naatî wacan marha wixkesî tooto komo ya apihtome tak.

6 Pohnî me ro mak tak wiir̂asî ewtîthîrî. Iito atîhtaxapu yatîkronkara wasî, aiwara marha wasî. Cekyekyem makî natîkwasî iito. On wara marha wîîkesî tuuna yewru ya, Iitono tîpîhra ro mak esko, wîîkesî. Ero wa men wîîkesî onatîrî poko.

7 Ixaw Yana poko xa tko wîîkesî, Kporin komo natîrî, kacho, kantoman̂e ro natîrî, kacho ha. Xuta pono komo pokono marha mîn, Yînatîrî, tpoxwem me cepetaxmu, kacho ha. N̂examro n̂een̂akn̂e Kaan, yaaro en̂ekano rin̂e komo yenî xe xakn̂e. Okwe, emetanmekno rin̂e komo makî tko n̂een̂akn̂e okwe. Kir̂wan komo yenî xe xakn̂e. Tîwrataxmu komo mak tko n̂een̂akn̂e okwe.

8 Ero ke on wara wîîkes awya so, metwîrîmexe ro mak okwe on wara awexirî ke so, amîn komo miir̂axe yaake xa. Mararî pen marha mahsîtîkexe hara yaake. Ero wa ahsîtîkarî ke awya so apoyino komo yeken exihra tak nas okwe. Cewyaro so tak maxe amyamro iito rma.

9 On wara kekn̂e Kporin komo on̂entarî me, Yaaro men tan wîîkesî, yarîhra tak nasî mîîmo mer̂pono pîn okwe. Porin komo mîîmo, cenporem komo, ero yipu komo rma nasî yarîhra okwe.

10 On wara marha nasî anatîrî kom hara, wahra mak n̂eperwasî uupa yatî. 22 ritru wicakî mak wooku miir̂axe mer̂pono pîn yatî yeperîrî ke. Anarimaw 220 ritru wicakî puruma yatho miir̂axe. Epetache tak 22 ritru mak menmekyaxe hara ero yeperîrî cik okwe, kekn̂e Kporin komo.

11 Metwîrîmetîkexe ro mak okwe amyamro. Pahxaxaro mîpakexe kawaxiyem pona mak. Ero meer̂axe kokmamso ro kica. Ero ke cetîrwonmesom me xa tak mehtîkexe okwe wooku yanme.

12 Ero yipu meer̂axe wooku. Ahpa marha miyorkexe eer̂ataw, ahpaci marha, maraka marha, cecesom marha meceyaxe raatî, ero yipu poko maxe awetaworetaw so. Wara rma Kporin komo n̂iritho ponarora ro mak maxe okwe. Kporin komo n̂iritho mîn okre, kahra ro mak maxe yin̂irithîrî poko rma.

13 Ero wa exirî ke so oyanan komo nahsîyaxe waapa komo, miya naar̂axe anarî roowo pona emahcin me. Camkî ro mak naxe. Ero ke waapa narîrî me naxe okwe. Iito rma re naxe, Takîhsom komo mîkyam, kacho komo. Rooma poko ro mak naxe noro yipu komo meero. Miyan komo rma tak naxe kar̂pera twokru komo exihtorî ke thakwa tuuna.

14 Ero ke n̂esenmamyasî tak wehto imo. Cemtayankaxmu wara ro mak nasî waihxapu komo yermomtome. Ero yaka thakwa cexe moxam kayaritomon, maywenînho pen komo marha mer̂pono pîn. Iina cexe n̂examro wara ro mak kan̂e komo rma.

15 Ero yimaw anarî komo mamawno me mak tak n̂ehtîkexe tooto komo ahnoro. Cehn̂axmu me tak naxe etpoyino pîn okwe. Kyopono me cesehtînosom komo tak n̂esenpexe kyopono pîn me ro mak tak okwe.

16 Kyopono me tak n̂esenpesî Kporin komo reha, kantoman̂e ro ha. Ero wa n̂esenpesî takîhso ciino rin̂e me cexirî ke. Kir̂wanî ro Mîk Kaan. Kir̂wanî ro me cehtopo n̂enpesî kir̂wan̂he ciino rirî ke.

17 Ero yimaw tak cuupu nahyasî kahn̂eru xîkrî tosom woskaran po cexitawno wara. Tupurukyem pen komo yewtontho po tak n̂eseresmesî.

18 On wara naxe anarî komo, akpîra cehtopo komo yixikn̂e wara naxe ruupu warai ke. Cemaro rma mîn ruupu warai, tarara yixihtopo warai. Ero ke rma kicicme cehtoponhîrî komo yihxikn̂e wara naxe. Ero ke n̂etwîrîmexe ro mak okwe.

19 Ero wa xa marha n̂etwîrîmexe on wara kan̂e kom hara, Yohno enî xe nas amna ahce na Kaan n̂iritho. Yohno n̂irpe entome kîwya so. Ahce wa na nîhtînoyakn̂e Kir̂wanî ro, ponaro Ixaw Yana komo yehtoponho? Ero wara rma kiicowpe tînîhtînoputhîrî yenpotome tak kîwya so, kan̂e komo n̂etwîrîmexe.

20 On wara marha kexe n̂examro, Kir̂wan̂he nasî ero wara kehtopo, kexe kicicme kehtopo poko rma kica. Kicicme ro mak nasî ero wara kehtopo, kexe marha kir̂wan̂he kehtopo poko hara. Katpan mîn ha, kexe awarpan poko rma kica. Awarpan mîn, kexe katpan poko hara. Tîkporem mîn okre, kexe, cîmîkno poko rma. Cîmîkno mîn kica, kexe, tîkporem poko hara. N̂etwîrîmexe ro mak ero wa kan̂e pen komo.

21 N̂etwîrîmexe ro mak on wara kan̂e kom hara, Takîhsom ow ha, kan̂e komo, ehcamhokaxapu xa ow okre, kan̂e komo marha.

22 N̂etwîrîmexe ro mak on wara kan̂e kom hara, Ow xa wooku yeen̂e ro, anarî komo yopo een̂e ro mak, kan̂e komo. On wara kexe anarî kom hara, Ow xa anarmerpan yesman̂e ro, kawaxiyem yesman̂e ro, kexe kica. Ero wa kan̂e komo n̂etwîrîmexe ro mak okwe.

23 On wara marha naxe anarimaw, Kir̂wan mîkro, kexe kicicme ehxapu komo poko rma. Epethîrî pona ero wa kexe. On wara marha kexe anarimaw hara, Noro pen memetanmekye kica. Ero ke epemakî, kexe marha emetanmekn̂e pîn ya rma kica.

24 Kporin komo ya kpanatanmetopo yanwekn̂e komo mîkyam okwe. Kir̂wanî ro mtapotachonho nîwîrîyakexe okwe. Ero ke wehto ywawno wara naxe amn̂e. Puruma yeputho nakn̂iyasî wehto yohno ro mak. Ero wa xa marha yohno n̂ecakyasî cuupu waixaputho wehto ke. Ero wa noro yipu komo micin natîhyasî. N̂examro yepemrutun warai tak naar̂asî ocowo roowo pupuntho wara.

25 Ero ke tîyanan komo poko rma nîrwonasî xa Kporin komo. Napockanwasî tak, n̂examro pen tak n̂etapesî tar̂maxi ro oko. N̂esewsîyasî tak matîwîn. Ero yimaw n̂examro yokoputho tak nasî esama yaw so rma yukpurukpurun wara mak okwe. Wara rma etîrwoxinkara rma nasî Kporin komo. Tapockantaxi rma nasî etapano ciitome xa hara okwe.

26 Ero ke tîbanteiran tak nanîmyasî Kporin komo mîk hak rowon pono komo n̂enîrî me, meyeno komo n̂enîrî me. Pii kesî marha roowo mapitawno komo yan̂ihtome. Ero ke mokyaxe yohno rma. Kar̂pe ro mak mokyaxe.

27 Exihra ro mak nasî cekar̂kaxmu n̂examro mokyataw, Cehrokaxmu exihra marha nasî. Yîwînkîra ro mak naxe tmokyataw so. Cewn̂e n̂hema etîmhokara ro mak nasî n̂examro yaan̂opotun. Cewn̂e n̂hema ehkotora marha nasî yîhtarî mici.

28 Tpotkem xa mîn yuwuhre komo waiwî. Ceipuru mîn iyoh komo roxoxon, kawaru roxoxon ha. Saama wara ro mak nasî. Yohno so marha n̂etapomrikyasî n̂examro tararan tarî, ocowo wara, woi woi kan̂e wara.

29 N̂etîrwonmekyaxe ro mak reaw wara kopi, kar̂pamxan wara. Tînahsîrî komo yahsîyataw mayanaxe. Ero yinhîrî naar̂axe ahsîpînkara ro mak yukurunpen̂e exihtorî ke thakwa okwe.

30 Ero yimaw tak tînahsîthîrî komo poko mayanaxe ro mak tuuna imo n̂ewtunasî ero wara ro mak kopi. Ero wa naxe amn̂e waapa komo oyanan komo poko. Ero yimaw Kanan wece een̂ataw awya so awarpan mak tak meen̂axe, ahwokaxapu komo marha meen̂axe. Katpan meero nasî xîrpe kaapu smun ke. Ero wa nas amn̂e.