Taa, on wara wîxakn̂e ow, Usias pen waihyakn̂e kayaritomonhîrî pen. Noro pen waihtoponho po tak Kporin komo ween̂akn̂e. Kayaritomo yapon po xakn̂e kawno po. Kayaritomo me xa n̂esenpekn̂e. Kawno yaw xakn̂e poono yaw. Noro ponon mapirî xakn̂e porin me, Kaan mîn yawronohkatîkan̂e me.

2 Noro yepoi n̂ecececetken̂e serapin komo piiri. 6 so xakn̂e n̂examro yaporî. 2 ke n̂esewyahruyatken̂e, 2 ke tîhtarî nahruyatken̂e hara. 2 ke narinatken̂e hara. Ero wara so xatken̂e.

3 N̂examro nîmtapowatken̂e kar̂pe. On wara ketken̂e, Kir̂wanî ro, kir̂wanî ro, kir̂wanî ro Mîk Kporin komo, kantoman̂e ro. Roowo poko hak nasî kir̂wanî ro me Noro yehtopo.

4 Ero wa yîmtapowataw serapin komo, metata yecepu nîrîrînakn̂e kar̂pe karî ke oko. Kaan mîn marha xakn̂e copoyi wehto yîsîn ke.

5 Ero yinhîrî on wara wîîkekn̂e, Okwe ro mak okwe, etwîrîmaxapu ro mak ow okwe. Ero wara wasî tîmtasmui oyexirî ke kica. Tîmtasmuyem komo chewno marha ow ha kica. Kayaritomo ro xa wenwo, Kporin komo, kantoman̂e ro, Noro xa wenwo kopi. Ero ke cetwîrîmaxi was okwe.

6 Ero yinhîrî anarînhîrî serapin mokyakn̂e kaikokoro rma ohyaka. Kaan ya tîmsom yakn̂itopo pono ka namekyakn̂e wehto roron. Ahsîtopo ro ke namekyakn̂e. N̂ekyakn̂e tak ohyaka tamorî yaw.

7 Ero ke rma tak teme kekn̂e omtarî poko. On wara kekn̂e owya, On wehto tak amtarî napeu. Ero ke akpîra awehtoponhîrî tak nasî towso, tîhcamnoso tak nasî kicicme awehtoponhîrî, kekn̂e owya.

8 Ero yinhîrî Kporin komo mtapotarî wencekn̂e hara. On wara kekn̂e, Onoke xa wantome? Onoke xa cee amna mtapotarî yentamexposo? kekn̂e. Ero ke on wara wîîkekn̂e ow, Tan was ow Apa. Ow xa en̂epeko, wîîkekn̂e.

9 Taa, kekn̂e owya, etoko amoro. On wara kasko tantono komo ya, Entan̂e me roro ehcoko, yuhnari yîhtînon̂e pîn me rma tko okwe. Enîn̂e me roro marha ehcoko, takîhso enîn̂e pîn me rma tko okwe.

10 Moxam ropotarî ceipamnoko tak, wara kyam mak entan̂e me mak cirko panarî komo, ewru komo marha ahruko. Ero wa moxam cirko enîhra ro mak ehtome so cewru komo ke, entara marha ehtome so tpanarî komo ke, yuhnari yîhtînon̂e mera marha ehtome so tîropotarî komo ke. Ero wara moxam cirko ohyaka mokuhra ehtome so takir̂waman̂e komo yaka, kekn̂e.

11 Ero ke on wara wîîkekn̂e yîwya, Apa, atî wicakî pahkî natu ero wara? wîîkekn̂e. On wara oyeyukyakn̂e, Pahkî naxe ero wara ewtotho me cehso ro ewtonthîrî komo, yarîhra cehso ro yîmînthîrî komo, pohra ro mak cehso ro yîrowonthîrî komo.

12 Miya kr̂a on roowo pono komo wen̂epes Ow Aporin komo. Pohra ro mak tak nasî yîrowonthîrî kom okwe.

13 Wara rma 10 komo poyinonho 1 n̂etîmcesî iito rma. Ero yinhîrî pohnî me tak n̂ehtîkesî xa hara on roowo. Teremintu yepu yamache natîkwa hara na yîmîtîthîrî. Ero wa xa marha nasî kahpar̂u yepu. Ero ke n̂examro yatho rma nasî yîmîtîthîrî yaw, atîhtachome xa hara. Ero wara nasî on roowo pono komo.