Taa, ero yinhîrî Akas tak xakn̂e Xuta pono komo kayaritomon me hara. Xotaw mumuru mîk xakn̂e Akas, Usias parî ha. Ero yimaw tak mokyakn̂e Hesin, Siria pono komo kayaritomon, Peka marha mokyakn̂e Hemarias mumuru. Ixaw Yana komo kayaritomon mîk xakn̂e Peka ha. Xerusaren pono komo waparî me mokyatken̂e okwe. Xerusaren pono komo yar̂mara rma tko xatken̂e.

2 Ero yinhîrî on wara takî tî n̂encetken̂e Tapi pen yepamtho komo, Eprain yepamtho komo rowon po tak naxe Siriu sowtatun komo kopi. Iina men n̂epanacexe, kacho tî n̂encetken̂e. Ero ke n̂eraswakn̂e takî tî Akas, noro maywen komo marha. Wîî kan̂e wara ro mak xakn̂e yîropotarî komo. Wîî kesî weewe comota pono ocowo yanme ero wara xatken̂e yîropotarî komo.

3 Ero yinhîrî on wara kekn̂e Kporin komo Isaias ya, Ai, Isaias, etoko Akas yenso. Amumuru marha arko awakro, Xea Xaxubi. Iito nai Akas tuuna totopo mapitaw, n̂ikitho kwawno nîhcesî tuuna, yaasîno kwawno ero mapitaw ha. Poono korokan̂e yesamarî yaw xa nasî.

4 On wara kasko yîwya, Ai, apa, on wara wîîkes awya, n̂examro yanme eserepokara ro mak men esko. Erasîra ro mak esko, ahwokara marha. Poturemtho warai mak mîkyam tosutosu kan̂e warai ha. Nîrwona rma re Hesin, Siriu komo ahnoro nîrwonatu. Hemarias mumuru marha nîrwona, nîrwonasî ro mak. Erasîra rma tko esko pona so.

5 Awaparî komo me tmohtopo komo poko rma re n̂esencetken̂e Siriu komo, Eprain yepamtho komo yakro, Hemarias mumuru yakro ha.

6 On wara ketken̂e ha re, Kaikatko Xuta pono komo waparî me. N̂examro rowon tîraconkacerî, yîraconhîrî mahsîyaxe amyamro, yîraconhîrî amna nahsîyas hara. Tabeaw mumuru takî ciicerî n̂examro kayaritomon me hara, ketken̂e rma re.

7 On wara tko kesî Kaan, Aporin komo, Tîmtapotachonhîrî yaw roro cirihra rma naxe. Arowon yahsîra rma naxe.

8 Siriu komo kayaritomon yewton mîn Tamasku. Tamasku pono komo kayaritomon mîk Hesin. 65 cimn̂ipu yenatîche tak Eprain yepamtho komo tak naxe tar̂matîkaxi okwe. N̂examro kayaritomon exihra tak nas okwe.

9 Eprain yepamtho komo kayaritomon yewton Samaria. Ero pono komo kayaritomon mîk Hemarias mumuru. Omtapotarî ponarora awexitaw so amyamro marha maxe waapa nar̂marî me hara okwe.

10-11 On wara marha kekn̂e Kporin komo Akasî ya, Ai, Akasî, yaaro xa omtapotacho kuknon poko amtapotak amoro oyakro. Kaan Ow ha, Aporin komo. Ero ke on wara kasko owya, Yuhnawno enpoko amtapotachonhîrî kuknon, kasko owya. Kah yawno xa enpoko, mîîke ha na yiixe awexitaw, kekn̂e yîwya.

12 On wara tko n̂eyukyakn̂e Akasa, Ero wa kahra ro mak wasî Kporin komo ya. Noro yukukmara wasî, kekn̂e.

13 On wara tko n̂eyukyakn̂e Isaias, Omtapotarî men entacoko amyamro, Tapi pen yepamtho komo, tooto komo yexpokanon̂e me maxe okwe. Kicicme oyehtopo pînî n̂he cik mîn ero wa oyehtopo, mîîke ham. Kaan meero tko mexpokanoyaxe hara kica ponaro oyehtopo ha.

14 Ero ke Kaanî rma n̂enpesî tîmtapotacho kuknon awya so. Amn̂e tak emasî n̂etahsîyasî, n̂ewruyasî marha kîîrî ciki. Kîîrî pokono pînî ro mak mîk emasî ero wara n̂etahsîyasî. Yîmrerî ciki tak nosohcexe Iman̂uew me.

15 Noro cik nasî paaka mownu yahn̂e me, yîkîtîtîrexapu yahn̂e me. Ween yemen̂e me marha nasî. Ero yipu ke n̂eseresmesî cetakîretome tak, kicicitho yanwekn̂e me cehtome, kir̂wan men̂ekan̂e me cehtome marha.

16 Yohno tko n̂examro kayaritomon pen komo exihra tak naxe asakno roro rma. Pona so meraswaxe n̂examro kayaritomon exihra tak naxe. Ero wa naxe yohno rma wahra rma exitaw rikomo, kicicitho yanwekn̂e pîn me, kir̂wan men̂eken̂e pîn me exitaw marha, ero yimaw rma n̂examro kayaritomon pen exihra tak naxe.

17 Ero yimaw Asiriu komo kayaritomon tak n̂ekyasî Kporin komo awaparî me, amaywen komo waparî me, ayanan komo waparî me marha. Ero yimaw tak awetwîrîmacho komo me xa tak nasî. Mehxa ro rma metwîrîmetken̂e anarimaw so. Eprain yepamtho komo n̂etowyatken̂e Xuta pono komo yai ero yimaw rma re metwîrîmetken̂e ha re. Amn̂e tak metwîrîmexe xa tak kopi.

18 Ero yimaw on wara tak nasî Kporin komo, kokoko kesî werewere yan̂ihtome. Exitu pono komo yewkuru yecihtawno nan̂ikyasî, n̂examro mapitawno komo yewkuru yecihtawno. Ween marha nan̂ikyasî Asiriu Yana rowon pono hara.

19 N̂examro mokyaxe xiya. Tan tak n̂etahsîyaxe capahno pona so pohnî me cehsom pona so ha. Toh pona so marha n̂etahsîyaxe etîmtakaxapu pona. Cekyekyem pona marha n̂etahsîyaxe, cuh ken̂arî pona so marha.

20 Ero yimaw rma tantono komo poci pahyasî Kporin komo kun̂imixi ke, epethîrî pona antomaxapu ke. Tuuna yepu mehxan komo mîkyam nan̂ikyasî, Asiriu komo kayaritomon maywen komo. N̂examro ke tantono komo poci pahyasî yîhtîpîrî pokononho, yîhrepu pokononho marha. Etpoci komo marha pahyas okwe.

21 Ero yimaw tak on wara naxe tantono komo anarî komo mak, tokye naxe paaka ke, emasî me cehsom ke, kahn̂eru ke marha asak hakno ke.

22 Noro yipu komo mownu nasî mer̂pora ro mak. Ero ke tahsom n̂iir̂axe, yîkîtîtîrexapu me. Ero yipu yahn̂e me nas osom. Ahnoro rma on roowo po tînomxapu komo ero yipu nahyaxe weenu ke yîkporexapu okre.

23 Ero yimaw tak on wara nasî roowo uupa yatî yewtî me cehsomunho, 1.000 yatî yewtîtho wicakno me cehsomînho mîn roowo. Cepethîkemînhîrî mîn roowo ero yipu, 1.000 sikru wicakî epethîrî. Pohra tko nasî ero yimaw. Peen ken̂e mak nasî, cekyekyem ken̂e kica.

24 Ero yipu pona cexe kîrkomo krapa ke cemyarke, waiwî ke cemyarke marha. Ero wa mak cexe ero yipu pona peen ken̂e exirî ke mak, cekyekyem ken̂e exirî ke.

25 Mînto mînto wara nasî îîpî mko naatî yewtî mexanînho, pururi ke tpomosomînhîrî ha. Iina so tohra maxe peen ken̂e exirî ke thakwa, cekyekyem ken̂e xa. Ero yimaw paaka nahrî mak natîkwasî iito cuupu, kahn̂eru yetaritopo me marha nasî. Ero wa nasî on roowo amn̂e.