Ero yinhîrî on wara kekn̂e Kporin komo owya, Ai Isaias, karita ahsîko porin. Ero yaka mewreko omtapotarî. Karita mewretopo ke mewreko, Yohno ahsîcoko ar̂maxapu komo yemyawnonho, kacho, kekn̂e owya.

2 Ero ke oyehtopo mewren̂e komo wan̂ikyakn̂e asakî. Urias wan̂ikyakn̂e Kaan ya tîmsom pokono. Sakarias marha wan̂ikyakn̂e Xeberekias mumuru.

3 Ero yinhîrî weronomano rin̂e yaka kîwcekn̂e, wooxam yaka. Ero ke n̂etahsîyakn̂e tak noro, omumuru cik tak n̂ewruyakn̂e. Ewruche on wara kekn̂e Kporin komo owya, Amumuru cik osohtoko Maye-sararasbasî me.

4 Wahra exitaw rma amumuru ciki, Tamasku pono komo yemyawnonho tak naar̂asî Asiriu komo kayaritomon, Samaria pono komo yemyawnonho marha. Yeme, apa, kacho komo poko ehcamhokara ka exitaw amumuru cik ero yipu naar̂asî, kekn̂e owya.

5-6 Ero yinhîrî on wara kekn̂e hara Kporin komo owya, On wara naxe moxam, tuuna xera naxe yamoro tîhtosom, Siroe pore tîhtosom ha. Hesin poko xa matko nahwowaxe kica, Hemarias mumuru poko marha.

7 Ero ke tuuna warai tak wekpesî n̂examro yenorinohkan̂e warai me thakwa okwe, tuuna yepu warai. Asiriu komo kayaritomon mîk wekpesî tuuna warai. Tmaywei xa noro mokyasî. N̂examro tak nasî tuuna yukmacho wara ro mak kopi. Ahnoro tarenakem yoponkan̂e me nasî.

8 Xuta pore marha cesî tuuna wara. Cewukmatîkaxmu wara cesî. Kexenari tukmaxmu wara nasî kopi. Taporarakantaxmu wara rma nasî. Arowon nawronohketîkes okwe, wîîkes awya, Iman̂uew ya, kekn̂e. Ero wa kekn̂e Kporin komo owya.

9 Anarî yana komo, awya so wîîkes hara, esenmecoko amyamro. Etakuhr̂apoxapu wara ro makî tko maxe amn̂e waapa yanme. Omtapotarî men entacoko amyamro meyeno komo, akurun komo ahsîcoko. Wara rma etakuhr̂apoxapu wara maxe okwe. Wîîkesî xa hara, akurun komo ahsîcoko, wara rma etakuhr̂apoxapu wara ro mak maxe okwe, wîîkesî.

10 Esentacoko awaparî me tmohsom komo yen̂epetopo poko. Mehn̂exe thakwa mak okwe. On wara xa cen̂epepore nasî, kacho ekatîmcoko apoyino komo ya. Mehn̂exe makî tko okwe. Kaan xa matko nas amna yakro. Ero wa kasko mîk hak rowon pono komo ya.

11 Kaanî rma nîmtapowakn̂e oyakro yukurumîkno me ro mak. On wara kekn̂e owya, Moxam yesamarî yaw so etarira esko amoro reha.

12 On wara kexe moxam, Kar̂macho komo poko n̂esencexe asakno roro rma kayaritomo komo kopi, kexe. Pîra, ero wa kahra ehcoko n̂examro yesentacho poko. Erasîra marha ehcoko n̂examro mtapotarî pona, Awaparî komo me amna mokyasî, kacho pona. Ahwokara ehcoko ero poko.

13 Kporin komo ponaro xa tak ehcoko, kantoman̂e ro ponaro. Noro xa encoko yukurumîkno me. Noro pona xa erahtîmcoko ha.

14 Ero wara een̂ataw awya so amîn komo warai me nasî Kporin komo. Ero warahra tko nasî Noro n̂examro poko. On wara nasî Ixaw Yana komo poko, asakno rorono komo poko rma, toopu wara nasî n̂examro yehrokacho wara. Mîîye wara marha nasî Xerusaren pono komo yemcinotopo wara hara okwe.

15 N̂examro poyino komo tak n̂ehrokexe mer̂pono pîn komo okwe, n̂epîrkexe marha oko, n̂etaxikwexe mak oko. N̂emciyaxe marha. Waapa komo nahsîrî me mak naxe okwe, kekn̂e. Ero wa kekn̂e Kporin komo owya.

16 On wara marha kekn̂e Noro owya, Taa, anmewrethîrî ahruko, wekatmo awya ero, yimiko marha. Owya apanatanmetopo ahruko, ahkoromakî marha. Onpanatanmekrî komo ya mak tîmko, kekn̂e owya.

17 On wara tak weyukyakn̂e, Taa, Kporin komo momokyas ow. Cesewopontoso ka nasî Noro Xako yepamtho komo ya esenpora cehtome. Noro pona rma tko ween̂asî.

18 Tan was ow, omxîkrî komo marha naxe tan Kporin komo nîmîtho owya, Karitî ro nîmîtho. Kporin komo yehtopo yenpotopo me nas amna yehtopo. Cirihnî n̂iir̂asî yaake ro ero yenpotopo ha. Ixaw Yana komo n̂enîrî me xa n̂iir̂asî. Siaw Yîpîn pono Mîk Kporin komo, kantoman̂e ro. Noro rma ero yipu n̂iir̂asî.

19 On wara na ketu apoyino komo awya so anarimaw, yaskomo mtapotarî entata, worokyam pokono mtapotarî. Ehtura nîmtapowaxe, anarî ro wara nîmtapowaxe tîmtapotarî ro pîn me, noro yipu komo mtapotarî entata, ketu na awya so. On wara xa ceyukpore nasî, Kaanî mtapotarî yentara ma tai ke, ponaro kehtopo mtapotarî ha? Waihxa penî mtapotarî ma re cence waipîn komo yehtopo yentachome?

20 Kporin komo ya kpanatanmetopo ponaro xa cexpore nasî. Kaanî mtapotari yekatîmn̂e komo mtapotarî ponaro marha cexpore nasî. Ero yaw roro ekatîmra exitaw so ekatîmn̂e komo on wara kacoko poko so, Weeyu ken̂arî pînî ro mak mîkyam kica, kacoko tak noro yipu komo poko.

21 On wara naxe noro yipu pokono komo, tîrowon komo pore n̂etar̂axe emetanmexapu me okwe, nîromanaxe marha okwe. Rooma poko cexitaw so nîrwonaxe tak. Tîkayaritomon komo yîwîrîmacho n̂etahcaxe. Kicicme nîmtapowaxe Kaan poko marha kahsî een̂ataw so rma.

22 Ero yinhîrî roowo wece tak n̂een̂axe hara. Iito tak n̂een̂axe cesemetanmetopo komo mak, awarpan marha, cerahtîmtopo marha, awarpanawno ha. Ero yipu mak tak n̂een̂axe okwe. Awarpanaka cen̂epesom me tak naxe okwe. Ero wa naxe noro yipu pokono komo reha okwe.